കൊച്ചി: വൈപ്പിനും ഫോർട്ടുകൊച്ചി ബീച്ചും ചീനവലകളും ഡോൾഫിനുകളും കണ്ട് ഒരു അടിപൊളി ആഡംബര യാത്ര. ഈ അവധിക്കാലത്ത് ജലഗതാഗത വകുപ്പിന്റെ ആദ്യ സൗരോർജ ബോട്ടായ ‘ഇന്ദ്ര”യിൽ ഉല്ലാസയാത്ര പോകാം. സ്വകാര്യ ബോട്ടുകളേക്കാൾ നൂറിരട്ടി സുരക്ഷിതവും നിരക്ക് കുറവുമാണ് ഇന്ദ്രയിലെ മുഖ്യ ആകർഷണം.മറൈൻഡ്രൈവ്, ബോൾഗാട്ടി പാലസ്, വല്ലാർപാടം കണ്ടെയ്‌നർ ടെർമിനൽ, വൈപ്പിൻ, കമാലക്കടവ്, ഫോർട്ട്‌കൊച്ചി, വില്ലിംഗ്ഡൺ ഐലൻഡ് എന്നിവിടങ്ങളിലൂടെ യാത്ര നടത്തും.
യാത്രയിൽ നല്ല കൈപുണ്യമുള്ള കുടുംബശ്രീ ചേച്ചിമാർ ഭക്ഷണവുമൊരുക്കിത്തരും. ഓരോ സ്ഥലത്തിന്റെ പ്രത്യേകതയും ചരിത്രം പറഞ്ഞ് ബോട്ടിൽ വിവരിക്കും. സ്വകാര്യ ബോട്ടുകളെക്കാൾ കുറഞ്ഞ നിരക്കാണ് എ.സിയിലുള്ള ആഢംബര യാത്രയ്ക്ക് ഈടാക്കുന്നത്. കർണാടക, തമിഴ്നാട്, മഹാരാഷ്ട്ര എന്നിവിടങ്ങളിൽ നിന്നുള്ളവരും തൃശൂർ, പാലക്കാട് തുടങ്ങിയ ജില്ലകളിൽ നിന്നുള്ളവരുമാണ് കൂടുതലെത്തുന്നത്.
വൈകിട്ട് സൂര്യാസ്തമയവും ഇളംകാറ്റും കൊച്ചിയിലെത്തുന്ന കപ്പലുകളും മത്സ്യബന്ധന ബോട്ടുകളുമെല്ലാം യാത്രക്ക് വേറെ ലെവൽ സമ്മാനിക്കും. ഏറ്റവും ആകർഷണം കടൽപ്പരപ്പിൽ ചാടിമറിയുന്ന ഡോൾഫിനുകളാണ്. കുട്ടികളെ ഏറെ ആകർഷിക്കുന്നതും ഇതുതന്നെ.
ഉല്ലാസ യാത്രകൾ കൂടാതെ സ്വകാര്യ പരിപാടികൾക്കും യോഗങ്ങൾക്കും ബോട്ട് ബുക്ക് ചെയ്യാം. മുൻകൂട്ടി അറിയിക്കണമെന്ന് മാത്രം. വിവിധ സ്ഥാപനങ്ങളും സംഘടനകളും യോഗം ബോട്ടിൽ നടത്തിയിട്ടുണ്ട്. നേരത്തെ അറിയിക്കുന്ന പ്രകാരം ഭക്ഷണവും എത്തിക്കും. വലിയ ആഘോഷങ്ങളില്ലാതെയാണ് സ‌‌ർവീസ് ആരംഭിച്ചതെങ്കിലും വരുമാനത്തിൽ കുറവ് വന്നട്ടില്ല. ആദ്യത്തെ മാസത്തിൽ 5,10,000 രൂപ നേടി. അതും മറ്റ് ചെലവുകളില്ലാതെ. സോളാറിൽ പ്രവർത്തിക്കുന്നതിനാൽ വൈദ്യുതി ചെലവ് കുറവാണ്. എ.സിക്ക് മാത്രമായി ഡീസൽ വേണ്ടി വരും. ബുക്കിംഗിന്: 9400050351, 9400050350
