കോട്ടയം: ജോലിസമ്മര്ദ്ദം മൂലം യുവാവ് ആത്മഹത്യ ചെയ്തു. കോട്ടയം കഞ്ഞിക്കുഴിയില് താമസിക്കുന്ന ജേക്കബ് തോമസ്(23) ആണ് മരിച്ചത്. യുവാവ് താമസിക്കുന്ന ഫ്ളാറ്റിൽ നിന്ന് താഴേക്ക് ചാടുകയായിരുന്നു.
ഞായറാഴ്ച പുലര്ച്ചെ അഞ്ചരയോടെയാണ് സംഭവം നടന്നത്. കാക്കനാട് പ്രവര്ത്തിക്കുന്ന ലിന്വേയ്സ് ടെക്നോളജീസ് എന്ന കമ്പനിയിൽ കമ്പ്യൂട്ടര് എന്ജിനീയറാണ് ജേക്കബ് തോമസ്. ഈ സ്ഥാപനത്തിലെ ജോലിസമ്മര്ദ്ദം താങ്ങാനാവുന്നില്ലെന്ന് ജേക്കബ് മാതാപിതാക്കളോട് പലതവണ പറഞ്ഞിരുന്നതായാണ് വിവരം.
ശനിയാഴ്ച പുലര്ച്ചെ രണ്ടുമണിക്ക് ഇതുമായി ബന്ധപ്പെട്ട വീഡിയോ സന്ദേശം ജേക്കബ് തന്റെ അമ്മയ്ക്ക് അയച്ചു. ജോലിസമ്മര്ദ്ദം താങ്ങാന് ആകുന്നില്ലെന്നാണ് ഈ വീഡിയോയിൽ പറഞ്ഞിരുന്നത്. ഇതിന് പിന്നാലെയാണ് യുവാവ് ആത്മഹത്യ ചെയ്തത്.
ഡിഗ്രി പഠനം പൂർത്തിയായതിന് പിന്നാലെ കഴിഞ്ഞ ഡിസംബറിലാണ് ജേക്കബ് എന്ജിനിയറായി ജോലിയില് പ്രവേശിക്കുന്നത്. എന്നാൽ ഉറങ്ങാന് പോലും സാധിക്കാത്ത രീതിയില് ജോലി സമ്മര്ദ്ദം ജേക്കബ് നേരിട്ടിരുന്നതായാണ് കുടുംബം പറയുന്നത്. സംഭവത്തിൽ കുടുംബം പൊലീസില് പരാതി നല്കിയിട്ടുണ്ട്.
