തിരുവനന്തപുരം: സംസ്ഥാനത്ത് ഇന്നും ഉയര്ന്ന താപനിലയ്ക്ക് സാധ്യത. സാധാരണയേക്കാള് രണ്ടു ഡിഗ്രി മുതല് മൂന്നു ഡിഗ്രി സെല്ഷ്യസ് വരെ താപനില ഉയരുമെന്നാണ് മുന്നറിയിപ്പ്. ആറ് ജില്ലകളിൽ ഉയർന്ന താപനില മുന്നറിയിപ്പ് ഉണ്ട്.
കൊല്ലം, പാലക്കാട്, കോഴിക്കോട് ജില്ലയില് ഉയര്ന്ന താപനില 37 ഡിഗ്രി സെല്ഷ്യസ് വരെ എത്തിയേക്കാം. പത്തനംതിട്ട, തൃശൂര്, കണ്ണൂര് ജില്ലകളില് ഉയര്ന്ന താപനില 36 ഡിഗ്രി സെല്ഷ്യസ് വരെയും ഉയരാന് സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചു. ഈ ജില്ലകളില്, മലയോര മേഖലകളിലൊഴികെ ചൂടും ഈര്പ്പവുമുള്ള അന്തരീക്ഷ സ്ഥിതിയ്ക്ക് സാധ്യതയുണ്ട് എന്നും മുന്നറിയിപ്പിൽ പറയുന്നു.
അതേസമയം പൊള്ളുന്ന വേനലിന് ആശ്വാസമായി സംസ്ഥാനത്ത് നേരിയ മഴയ്ക്ക് സാധ്യതയുണ്ട്. ആലപ്പുഴ, കോട്ടയം, ഇടുക്കി, പത്തനംതിട്ട ജില്ലകളിൽ ഒറ്റപ്പെട്ട നേരിയ മഴയ്ക്ക് ആണ് സാധ്യത. ഒപ്പം ഇടിമിന്നലിനും മണിക്കൂറില് 40 കിലോമീറ്റര് വേഗതയില് ശക്തമായ കാറ്റിനും സാധ്യതയുള്ളതായി കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകി.
