കൊല്ലം: കൊവിഡ് കാലത്ത് ലോക്ഡൗൺ നിയമം ലംഘിച്ചവർക്കെതിരെ നടപടിയുമായി പോലീസ്. നാല് വർഷം മുൻപുള്ള കേസുകൾക്കാണ് സമൻസ് അയച്ചിട്ടുള്ളത്. കൊവിഡ് കാലത്ത് നിയമം ലംഘിച്ച് മീൻ വാങ്ങാൻ പോയ കൊല്ലം സ്വദേശിക്കെതിരെയാണ് ഇരവിപുരം പോലീസിന്റെ നടപടി.
ലോക്ഡൗൺ നിയമം ലംഘിച്ചതിനാൽ അദാലത്തിൽ പങ്കെടുത്ത് പിഴ അടയ്ക്കണമെന്നാണ് പൊലീസ് സമൻസിൽ പറയുന്നത്. രോഗ വ്യാപനം നടത്തുന്നു, കൊവിഡ് നിയന്ത്രണങ്ങൾ ലംഘിച്ചു എന്നീ കുറ്റങ്ങൾ ചുമത്തിയാണ് ഇയാൾക്കെതിരെ കൊവിഡ് കാലത്ത് കേസ് എടുത്തിരുന്നത്.
അതേസമയം കൊവിഡ് മാനദണ്ഡങ്ങൾ ലംഘിച്ചവർക്കെതിരെയുള്ള കേസ് പിൻവലിക്കുമെന്ന് സർക്കാർ നേരത്തെ പറഞ്ഞിരുന്നു. 12 ലക്ഷം ആളുകൾക്കെതിരെയാണ് ലോക്ക് ഡൗൺ സമയത്ത് പൊലീസ് കേസ് രജിസ്റ്റർ ചെയ്തിരുന്നത്.
