ഇടുക്കി: മൂന്നാറില് ജനവാസ മേഖലയിൽ വീണ്ടും കാട്ടാന ശല്യം. മൂന്നാര് ഗൂഡാര്വിള എസ്റ്റേറ്റിലാണ് കഴിഞ്ഞ ദിവസം കാട്ടാന ആക്രമണം ഉണ്ടായത്. എസ്റ്റേറ്റില് നിര്ത്തിയിട്ടിരുന്ന ജീപ്പ് കാട്ടാന കുത്തിമറിച്ചു.(Wild elephant attack in munnar)
ലയത്തിലെ ജീവനക്കാരനായ ജയരാജിന്റെ വാഹനത്തിനു നേരെയാണ് ആക്രമണം ഉണ്ടായത്. സമീപത്തുണ്ടായിരുന്ന കുരിശുപള്ളിക്കും കാട്ടാന കേടുപാടുകള് വരുത്തി. കുരിശുപള്ളിയുടെ ചില്ലുകള് കാട്ടാന തകര്ത്ത നിലയിലാണ്. പ്രദേശവാസികള് വിവരമറിയിച്ചതോടെ വനപാലകരെത്തി പ്രദേശത്ത് നിന്നും കാട്ടാനകളെ തുരത്തി.
മൂന്നാറിൽ ദിനംപ്രതി കാട്ടാനയുടെ ആക്രമണം വർധിച്ചു വരികയാണ്. ഇത് മൂലം തൊഴിലാളി കുടുംബങ്ങളുടെ ജീവിതം ദുസ്സഹമാക്കുന്നുണ്ട്. കാട്ടാന ശല്യത്തിന് ശാശ്വത പരിഹാരം വേണമെന്നാണ് നാട്ടുകാർ ആവശ്യപ്പെടുന്നത്.
