കാൻഡിഡേറ്റ് ചെസ്സ് ടൂർണമെൻ്റിൽ ഉജ്വല വിജയവുമായി ഇന്ത്യയുടെ ഗ്രാൻഡ്മാസ്റ്റർ ഗുകേഷ് ദൊമ്മരാജു. പതിനേഴുകാരനായ ഗുകേഷ് കാൻഡിഡേറ്റ് ചെസ്സ് ടൂർണമെൻ്റിൽ ചാമ്പ്യനാകുന്ന ഏറ്റവും പ്രായംകുറഞ്ഞ വ്യക്തിയാണ്. വിജയത്തിനൊപ്പം ചരിത്രനേട്ടം കൂടിയാണ് സ്വന്തമാക്കിയത്.
കാനഡയിലെ ടൊറൻ്റോയിൽ നടന്ന 14 റൗണ്ട് കാൻഡിഡേറ്റ് ടൂർണമെൻ്റിൻ്റെ അവസാന റൗണ്ടിൽ ഇന്ത്യയിൽ നിന്നുള്ള കൗമാരക്കാരൻ ഏക ലീഡറായി ഫിനിഷ് ചെയ്തു. ഈ വർഷാവസാനം ലോക കിരീടത്തിനായി നിലവിലെ ലോക ചാമ്പ്യൻ ഡിംഗ് ലിറനെയാണ് ഗുകേഷ് നേരിടുക.
9 പോയിൻ്റണ് ഗുകേഷ് ടൂർണമെൻ്റിൽ. അവസാന റൗണ്ട് മത്സരത്തിൽ ലോക മൂന്നാം നമ്പർ താരം അമേരിക്കയുടെ ഹിക്കാരു നക്കാമുറയെ സമനിലയിൽ തളച്ചാണ് നേട്ടം കൊയ്തത്. ടൂർണമെന്റ് ജയത്തോടെ ഡി ഗുകേ ലോകചെസ്സ് ചാമ്പ്യൻഷിപ്പിൽ നിലവിലെ ചാമ്പ്യനെ നേരിടാനുള്ള യോഗ്യത നേടി.
2014ൽ വിശ്വനാഥൻ ആനന്ദിന് ശേഷം കാൻഡിഡേറ്റസ് ടൂർണമെന്റ് ജയിക്കുന്ന ആദ്യ ഇന്ത്യൻ താരം കൂടിയാണ് ഗുകേഷ്. മാഗ്നസ് കാൾസണും ഗാരി കാസ്പറോവും ലോക ചാമ്പ്യന്മാരാകുമ്പോൾ ഇരുവർക്കും 22 വയസ്സായിരുന്നു പ്രായം. ചരിത്ര നേട്ടത്തിൽ ഗുകേഷിനെ അഭിനന്ദിച്ച് വിശ്വനാഥൻ ആനന്ദ് രംഗത്തെത്തി. ഗുകേഷിന്റെ നേട്ടത്തിൽ വ്യക്തിപരമായി ഏറെ സന്തോഷമെന്ന് ആനന്ദ് ‘എക്സിൽ’ കുറിച്ചു.
