ആലപ്പുഴയിൽ ബധിരയും മൂകയുമായ പത്തുവയസ്സുകാരിയായ പെണ്‍കുട്ടിയെ പീഡിപ്പിക്കാന്‍ ശ്രമിച്ച കേസിൽ അന്യസംസ്ഥാന തൊഴിലാളി അറസ്റ്റില്‍. ബുധനാഴ്ച്ച ഉച്ചയ്ക്കാണ് സംഭവം. ആലപ്പുഴ മാന്നാര്‍ ആലുംമൂട് ജങ്ഷന് കിഴക്ക് വാടകയ്ക്ക് താമസിക്കുന്ന പശ്ചിമ ബംഗാള്‍ സ്വദേശി ബിപുല്‍ സര്‍ക്കാര്‍ (24) ആണ് അറസ്റ്റിലായത്.
പെണ്‍കുട്ടിയുടെ മാതാപിതാക്കള്‍ ജോലിക്ക് പോയിരുന്ന സമയത്താണ് പ്രതി ഇവരുടെ വീട്ടില്‍ കയറി പെണ്‍കുട്ടിയെ പീഡിപ്പിക്കാന്‍ ശ്രമിച്ചതെന്ന് പോലീസ് പറഞ്ഞു.
പ്രതിയുടെ താമസസ്ഥലത്തിന് തൊട്ടടുത്ത വീട്ടില്‍ താമസിക്കുന്ന പെണ്‍കുട്ടിയെയാണ് പീഡിപ്പിക്കാന്‍ ശ്രമിച്ചത്. മാതാപിതാക്കള്‍ ജോലി കഴിഞ്ഞെത്തിയപ്പോഴാണ് വിവരമറിഞ്ഞത്. ഉടൻ മാന്നാര്‍ പോലീസില്‍ പരാതി നൽകുകയായിരുന്നു. മാന്നാര്‍ പോലീസ് ഇന്‍സ്‌പെക്ടര്‍ ബി. രാജേന്ദ്രന്‍ പിളള, എസ്.ഐ. സനീഷ് ടി.എസ്. എന്നിവരുടെ നേതൃത്വത്തില്‍ സീനിയര്‍ സിവില്‍ പോലീസ് ഓഫീസര്‍ ദിനീഷ് ബാബു, സി.പി.ഒ. ബിജോഷ് എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്.
