അയോധ്യ: ഉദ്ഘാടനം കഴിഞ്ഞിട്ട് രണ്ടുമാസം മാത്രമായ അയോധ്യാ ധാം റെയില്വേ സ്റ്റേഷന്റെ വൃത്തിഹീനമായി കിടക്കുന്ന വീഡിയോ വൈറൽ. സമൂഹമാധ്യമങ്ങളിൽ വീഡിയോ വ്യാപകമായി പ്രചരിച്ചതോടെ ഇന്ത്യൻ റെയിൽവേ നടപടിയെടുത്തു. അയോധ്യാ രാമക്ഷേത്രം ഉദ്ഘാടനത്തോട് അനുബന്ധിച്ചാണ് രണ്ട് മാസം മുമ്പ് പ്രധാനമന്ത്രി നരേന്ദ്രമോദി അയോധ്യാ ധാം റെയില്വേ സ്റ്റേഷനും ഉദ്ഘാടനം ചെയ്തത്.
രാജ്യത്തിന്റെ വിവിധ ഭാഗങ്ങളില് നിന്ന് നിരവധി പേരാണ് ദിവസവും അയോദ്ധ്യ രാമക്ഷേത്രം സന്ദര്ശിക്കാനെത്തുന്നത്. ഇതിനിടെ റെയില്വേ സ്റ്റേഷന്റെ വൃത്തിഹീന സാഹചര്യങ്ങളെ വെളിപ്പെടുത്തുന്ന വീഡിയോ സാമൂഹിക മാധ്യമങ്ങളില് വൈറലായി. പിന്നാലെയാണ് നടപടിയുമായി ഇന്ത്യന് റെയില്വേ രംഗത്തെത്തിയത്.
@reality5473 എന്ന എക്സ് ഉപയോക്താവാണ് റെയില്വേ സ്റ്റേഷന്റെ വൃത്തിഹീന സാഹചര്യങ്ങള് ചൂണ്ടിക്കാണിച്ച് മൂന്ന് വീഡിയോകള് പങ്കുവച്ചത്. ‘ശ്രീനഗറിലെ രാജ്ബാഗ് ഝലം നദീമുഖത്തേക്ക് സ്വാഗതം ‘ എന്ന് കുറിച്ച് കൊണ്ട് ജെംസ് ഓഫ് എഞ്ചിനീയറിംഗ് എന്ന എക്സ് അക്കൌണ്ടില് നിന്നും പങ്കുവച്ച ചില ചിത്രങ്ങള്ക്ക് താഴെ ‘സഹോദരാ ഈ വീഡിയോ പങ്കുവയ്ക്കൂ. പുതിയതായി പണിത രണ്ട് മാസം മുമ്പ് തുറന്ന് കൊടുത്ത അയോധ്യ സ്റ്റേഷന്റെ അവസ്ഥ.’ എന്ന് കുറിച്ച് കൊണ്ട് മൂന്ന് വീഡിയോകളാണ് പങ്കുവയ്ക്കപ്പെട്ടത്, സ്റ്റേഷന്റെ പുറത്ത് നിന്നും ആരംഭിക്കുന്ന വീഡിയോ സ്റ്റേഷന്റെ അകത്തേക്ക് നീങ്ങുന്നു.
പുല്ത്തകിടിയില് കിടന്നുറങ്ങുന്നവരെ കടന്ന് അകത്തേക്ക് പോകുമ്പോള് ഓരോ മൂലയിലും കൂട്ടിയിട്ട നിലയില് മാലിന്യ നിക്ഷേപങ്ങള് കാണാം. വീഡിയോകള് വളരെപെട്ടെന്ന് തന്നെ സാമൂഹിക മാധ്യമത്തില് വൈറലായി. ഒപ്പം നിരവധി പേര് വീഡിയോ റെയില്വേയ്ക്ക് ടാഗ് ചെയ്തു.
ആരോപണം ഉയര്ന്നതിന് പിന്നാലെ നടപടിയുമായി റെയില്വേ രംഗത്തെത്തി. സ്റ്റേഷന് വൃത്തിയാക്കാന് കരാര് എടുത്തയാളില് നിന്നും 50,000 രൂപ പിഴ ഈടാക്കിയതായി റെയില്വേ അറിയിച്ചു. പിന്നലെ അണുവിമുക്തമാക്കിയ സ്റ്റേഷൻ പ്രദർശിപ്പിക്കുന്ന ഫോട്ടോകളും വീഡിയോകളും ഡിആര്എമ്മം ലഖ്നൌവിന്റെ ഔദ്യോഗിക എക്സ് അക്കൗണ്ടിൽ നിന്നും പങ്കുവെച്ചിട്ടുണ്ട്.
