ന്യൂഡല്ഹി: മെറ്റ പ്ലാറ്റ്ഫോമുകളായ ഫെയ്സ്ബുക്കിന്റെയും ഇന്സ്റ്റഗ്രാമിന്റെയും പ്രവര്ത്തനത്തില് തടസം നേരിടുന്നു. രാത്രി എട്ടേ മുക്കാലോടുകൂടിയാണ് വ്യാപകമായി പ്രവര്ത്തനരഹിതമായത്. രാജ്യത്തുടനീളമുള്ള ഉപയോക്താക്കളുടെ അക്കൗണ്ടുകള് ലോഗ് ഔട്ട് ആയതായും അക്കൗണ്ടുകള് ലോഗിന് ചെയ്യാനും കഴിയാതെയാണ് തടസം നേരിടുന്നത്.
അക്കൗണ്ടില് കയറുമ്പോള് തനിയെ ലോഗൗട്ട് ആകുകയാണ്. പിന്നീട് ലോഗിന് ചെയ്യുമ്പോള് പാസ്വേര്ഡ് തെറ്റാണെന്നു നോട്ടിഫിക്കേഷന് വരികയും ചെയ്യുന്നു.
എന്താണ് ഇത്തരമൊരു തടസത്തിന് കാരണമെന്ന് മെറ്റയുടെ ഭാഗത്തുനിന്ന് ഔദ്യോഗികമായ പ്രതികരണം ഉണ്ടായിട്ടില്ല. ഉടന് തന്നെ അവരുടെ ഭാഗത്ത് നിന്ന് പ്രതികരണം ഉണ്ടാകുമെന്ന പ്രതീക്ഷയിലാണ് ഉപയോക്താക്കള്
സാമൂഹികമാധ്യമങ്ങളിലെ പ്രശ്നങ്ങള് റിപ്പോര്ട്ട് ചെയ്യപ്പെടുന്ന പ്ലാറ്റ്ഫോമായ ഡൗണ് ഡിറ്റക്ടറില് പതിനായിരക്കണക്കിന് പേരാണ് ഫേസ്ബുക്കിലും ഇന്സ്റ്റഗ്രാമിലും പ്രശ്നങ്ങളുള്ളതായി റിപ്പോര്ട്ട് ചെയ്തിരിക്കുന്നത്. ഇന്സ്റ്റഗ്രാം ഡൗണ്, ഫേസ്ബുക്ക് ഡൗണ്, സക്കര്ബര്ഗ്, മെറ്റ എന്നീ ഹാഷ് ടാഗുകള് ഇതിനകം എക്സില് (ട്വിറ്റര്) ട്രെന്ഡിങ് ആയിട്ടുണ്ട്.
