ആരെയെങ്കിലും തല്ലി ഹീറോ ആയതല്ല, വൈഭവ് തല്ലിയവരെല്ലാം ബോളിങ്ങിലെ സൂപ്പർ ഹീറോസ്; ബുമ്രയ്ക്കും റബാദയ്ക്കും പിന്നാലെ ഹെയ്സൽവുഡും; സൂര്യവംശി തല്ലി പതം വരുത്തിയവർ…
ഗുവാഹത്തി: ആദ്യ മത്സരത്തിൽ മാറ്റ് ഹെൻറി, പിന്നാലെ കഗീസോ റബാദയും ജസ്പ്രീത് ബുമ്രയും! പട്ടിക അവിടെ അവസാനിച്ചില്ല, ഇതാ പുതിയ ഇര—ജോഷ് ഹെയ്സൽവുഡ്! ആരെയെങ്കിലും തല്ലി ഹീറോ ആയതല്ല വൈഭവ്, അവൻ തല്ലിയവരെല്ലാം ബോളിംഗിലെ സൂപ്പർ ഹീറോകളാണ് എന്നതാണ് ഹൈലൈറ്റ്.
15-ാം വയസ്സിൽ ഹെയ്സൽവുഡിനെതിരെ ഒരു ഓവറിൽ 18 റൺസ്! ⚡️ വണ്ടർ വൈഭവ് ഇനി ക്രിക്കറ്റ് ലോകം ഭരിക്കും.ഐപിഎല്ലിൽ 15കാരൻ വൈഭവ് സൂര്യവംശിയുടെ വെടിക്കെട്ട് ഇന്നിങ്സിൽ റോയൽ ചാലഞ്ചേഴ്സ് ബെംഗളൂരുവിനെതിരെ രാജസ്ഥാൻ റോയൽസ് ആറു വിക്കറ്റിന്റെ തകർപ്പൻ ജയം നേടി. 26 പന്തിൽ 7 സിക്സും 8 ഫോറും ഉൾപ്പെടെ 78 റൺസ് നേടിയ വൈഭവാണ് മത്സരത്തിന്റെ ഗതി നിർണയിച്ചത്.
മഴമൂലം വൈകി ആരംഭിച്ച മത്സരത്തിൽ ആദ്യം ബാറ്റ് ചെയ്ത ബെംഗളൂരു 20 ഓവറിൽ 8 വിക്കറ്റ് നഷ്ടത്തിൽ 201 റൺസ് നേടി. ക്യാപ്റ്റൻ രജത് പാട്ടിദാർ 63 റൺസുമായി തിളങ്ങിയപ്പോൾ, വിരാട് കോലി (32), വെങ്കടേഷ് അയ്യർ (29 നോട്ടൗട്ട്) എന്നിവർ മികച്ച പിന്തുണ നൽകി.
മറുപടി ബാറ്റിങ്ങിൽ രാജസ്ഥാൻ തുടക്കത്തിൽ യശസ്വി ജയ്സ്വാളിനെ നഷ്ടപ്പെട്ടെങ്കിലും, വൈഭവിന്റെ ആക്രമണ ശൈലി മത്സരം കൈവശമാക്കി. വെറും 15 പന്തിൽ അർധസെഞ്ചുറി നേടിയ താരം ബെംഗളൂരു ബോളർമാരെ സമ്മർദത്തിലാക്കി.
ധ്രുവ് ജുറേൽ (43 പന്തിൽ 81 നോട്ടൗട്ട്) കരുത്തുറ്റ ഇന്നിങ്സുമായി പിന്തുണച്ചതോടെ രാജസ്ഥാൻ 18 ഓവറിൽ തന്നെ ലക്ഷ്യം മറികടന്നു. ഇരുവരും ചേർന്ന് രണ്ടാം വിക്കറ്റിൽ 108 റൺസിന്റെ കൂട്ടുകെട്ട് സൃഷ്ടിച്ചു.
ക്രുനാൽ പാണ്ഡ്യയുടെ ഇരട്ട പ്രഹരം രാജസ്ഥാൻ ഒന്ന് തളർത്തിയെങ്കിലും, ജുറേൽ അവസാനം വരെ നിലനിന്ന് വിജയം ഉറപ്പിച്ചു.
ഈ ജയത്തോടെ സീസണിൽ രാജസ്ഥാന്റെ നാലാം വിജയമാണ്. അതേസമയം, ബെംഗളൂരുവിന്റെ ആദ്യ തോൽവിയുമാണിത്.
English Summary
A stunning 78 off 26 balls by 15-year-old Vaibhav Suryavanshi powered Rajasthan Royals to a six-wicket win over RCB. Dhruv Jurel’s unbeaten 81 helped chase down 202 in 18 overs.
