ഗുരുവായൂരിൽ വിവാഹ തിരക്ക്; ജനുവരി 25-ന് 245 കല്യാണങ്ങൾ, പ്രത്യേക ക്രമീകരണങ്ങൾ
തൃശൂർ: ഗുരുവായൂർ ശ്രീകൃഷ്ണ ക്ഷേത്രത്തിൽ ജനുവരി 25 ഞായറാഴ്ച ഒറ്റ ദിവസത്തിൽ 245 വിവാഹങ്ങൾ നടക്കും.
ദർശനവും വിവാഹ ചടങ്ങുകളും സുഗമമായി നടത്തുന്നതിനായി ഗുരുവായൂർ ദേവസ്വം പ്രത്യേക ക്രമീകരണങ്ങൾ ഒരുക്കിയതായി അധികൃതർ അറിയിച്ചു.
വലിയ ഭക്തജന തിരക്ക് പ്രതീക്ഷിക്കുന്നതിനാൽ നിയന്ത്രണങ്ങൾ ഉൾപ്പെടെയുള്ള പ്രത്യേക സംവിധാനങ്ങളാണ് ഏർപ്പെടുത്തുന്നത്.
കല്ലുകൾ പതിച്ച സ്വർണകിരീടം ഗുരുവായൂരപ്പന്; വഴിപാടുമായി തൃശൂരിലെ വ്യവസായി
പുലർച്ചെ മുതൽ വിവാഹ ചടങ്ങുകൾ
വിവാഹങ്ങൾ സമയബന്ധിതമായി പൂർത്തിയാക്കുന്നതിനായി പുലർച്ചെ 4 മണി മുതൽ താലികെട്ട് ചടങ്ങുകൾ ആരംഭിക്കും.
താലികെട്ടിനായി അഞ്ച് മണ്ഡപങ്ങൾ സജ്ജമാക്കും. ചടങ്ങുകൾ വേഗത്തിൽ നടത്തുന്നതിനായി ക്ഷേത്രം കോയ്മമാരെ അധികമായി നിയോഗിക്കും.
വിവാഹ മണ്ഡപത്തിന് സമീപം മംഗളവാദ്യ സംഘത്തെയും ഒരുക്കും.
പ്രവേശനവും പുറപ്പെടലും കർശന നിയന്ത്രണത്തിൽ
തിരക്ക് നിയന്ത്രിക്കുന്നതിനായി കിഴക്കേ നട പൂർണമായും വൺവേ ആക്കുമെന്ന് ദേവസ്വം അറിയിച്ചു.
വരനും വധുവുമടങ്ങുന്ന വിവാഹ സംഘം നേരത്തെ എത്തി തെക്കേ നടയിലെ പുതിയ നടപ്പന്തലിലെ കൗണ്ടറിൽ നിന്ന് ടോക്കൺ കൈപ്പറ്റണം.
തുടർന്ന് മേൽപത്തൂർ ആഡിറ്റോറിയത്തിൽ പ്രവേശിപ്പിച്ചാകും വിവാഹ ചടങ്ങുകൾ നടത്തുക.
വിവാഹം കഴിഞ്ഞാൽ സംഘം തെക്കേ നട വഴി മാത്രം മടങ്ങണം. കിഴക്കേ നട വഴി പുറപ്പെടൽ അനുവദിക്കില്ല.
വധൂവരന്മാരോടൊപ്പം ഫോട്ടോഗ്രാഫർമാർ ഉൾപ്പെടെ 24 പേർക്ക് മാത്രമേ മണ്ഡപത്തിന് സമീപം പ്രവേശനം അനുവദിക്കൂ.
ദർശന നിയന്ത്രണങ്ങൾ
ക്രമാതീതമായ തിരക്ക് കണക്കിലെടുത്ത് ക്ഷേത്രത്തിൽ പ്രദക്ഷിണം, അടി പ്രദക്ഷിണം, ശയനപ്രദക്ഷിണം എന്നിവ ജനുവരി 25-ന് അനുവദിക്കില്ല.
ദർശനത്തിനായി എത്തുന്ന ഭക്തർക്കും വിവാഹ സംഘങ്ങൾക്കും ആവശ്യമായ സഹായവും സുരക്ഷയും ഉറപ്പാക്കാൻ ദേവസ്വം ജീവനക്കാരും പൊലീസ്, സെക്യൂരിറ്റി വിഭാഗവും സജ്ജമാകും.
English Summary:
Guruvayur Temple will host 245 weddings on January 25, prompting the Devaswom to introduce special arrangements to manage heavy crowds. Marriages will begin from 4 am across five mandapams, with strict crowd-control measures, one-way movement, and restrictions on rituals like pradakshina to ensure smooth darshan and wedding ceremonies.
