കുപ്രസിദ്ധ ഗുണ്ടാ നേതാവ് മരട് അനീഷ് പൊലീസ് കസ്റ്റഡിയിൽ
കൊച്ചി: കുപ്രസിദ്ധ ഗുണ്ടാനേതാവ് മരട് അനീഷിനെ മുളവുകാട് പൊലീസ് കസ്റ്റഡിയിലെടുത്തു. പനമ്പുകാട് പ്രദേശത്തുനിന്നാണ് അനീഷിനെ പിടികൂടിയതെന്ന് പൊലീസ് അറിയിച്ചു.
ഒരു സ്ത്രീയിൽ നിന്ന് ചില രേഖകൾ കൈപ്പറ്റിയ ശേഷം തിരികെ നൽകാതെ ഭീഷണിപ്പെടുത്തിയെന്ന പരാതിയുടെ അടിസ്ഥാനത്തിലാണ് കസ്റ്റഡിയെന്ന് പൊലീസ് ഔദ്യോഗികമായി വിശദീകരിച്ചു.
അതേസമയം, തമിഴ്നാട്ടിലെ ഒരു കേസുമായി ബന്ധപ്പെട്ട അന്വേഷണത്തിന്റെ ഭാഗമായാണ് അനീഷിനെ കസ്റ്റഡിയിലെടുത്തതെന്ന സൂചനകളും പുറത്തുവരുന്നുണ്ട്.
ഹണിട്രാപ്പ് കേസിലെ പ്രതിയെ പിടികൂടാൻ എത്തിയ പൊലീസ് സംഘം അനീഷിനെ അവിടെയുണ്ടായിരുന്ന സാഹചര്യത്തിലാണ് കസ്റ്റഡിയിൽ എടുത്തതെന്നും റിപ്പോർട്ടുകളുണ്ട്.
നിലവിൽ അനീഷ് കരുതൽ തടങ്കലിലാണെന്നും, ഇയാൾക്കെതിരെ വിവിധ കേസുകളിൽ വാറന്റുകളുണ്ടോ എന്നത് പൊലീസ് പരിശോധിച്ചുവരികയാണെന്നും അറിയിച്ചു.
ഇക്കഴിഞ്ഞ നവംബറിൽ കൊച്ചിയിലെ അധോലോക സംഘങ്ങളെ കുറിച്ച് മരട് അനീഷ് നടത്തിയ വെളിപ്പെടുത്തലുകൾ വലിയ വിവാദങ്ങൾക്ക് വഴിവച്ചിരുന്നു.
കൊച്ചിയിലെ കുപ്രസിദ്ധ ക്രിമിനൽ സംഘങ്ങളുടെ പ്രധാന വരുമാന മാർഗം ലഹരി കച്ചവടമാണെന്നും, വിവിധ ഗ്യാങ്ങുകൾ ‘എഫ് കമ്പനി’ എന്ന പേരിൽ ഒരൊറ്റ ശൃംഖലയായി പ്രവർത്തിക്കുന്നുവെന്നുമാണ് അനീഷ് വെളിപ്പെടുത്തിയത്.
ലഹരി കച്ചവടത്തെ എതിർത്തതിനാലാണ് തന്നെ കേരളത്തിന് പുറത്തുവെച്ച് എൻകൗണ്ടറിലൂടെ കൊല്ലാൻ ശ്രമം നടന്നതെന്നും, ഇതിന് ചില പൊലീസ് ഉദ്യോഗസ്ഥരുടെ ഒത്താശയുണ്ടായിരുന്നുവെന്നും അനീഷ് ആരോപിച്ചിരുന്നു.
തമിഴ്നാട്, കർണാടക സംസ്ഥാനങ്ങളിലായി ഇത്തരം നീക്കങ്ങൾ നടന്നുവെന്നും, വിയ്യൂർ ജയിലിൽവെച്ചും തന്നെ കൊല്ലാൻ ക്വട്ടേഷൻ നൽകിയെന്നുമായിരുന്നു അവകാശവാദം.
കൊച്ചിയുടെ അധോലോകത്തെക്കുറിച്ചും ലഹരിമരുന്ന് വ്യാപാര ശൃംഖലകളെക്കുറിച്ചും തുറന്നുപറഞ്ഞ ഗുണ്ടാനേതാവെന്ന നിലയിലാണ് മരട് അനീഷ് ഏറെ ശ്രദ്ധേയനായത്.
തായ്വാനിൽ നിന്നടക്കം വൻതോതിൽ ലഹരിമരുന്നുകൾ നഗരത്തിലേക്ക് എത്തുന്നതായും, അതിന് പിന്നിൽ കൊച്ചിയിലെ അധോലോക സംഘങ്ങളാണെന്നും അനീഷ് നേരത്തെ ആരോപിച്ചിരുന്നു.
English Summary
Notorious gangster Maradu Anish has been taken into custody by Mulavukad Police from Panampukad in Kochi. Police stated that the arrest was based on a complaint alleging that Anish collected documents from a woman and threatened her without returning them. There are also indications that the custody is linked to investigations in Tamil Nadu, possibly connected to a honey trap case. Anish is currently under preventive detention, and police are verifying whether there are pending warrants against him. Previously, Anish had made sensational revelations about Kochi’s underworld, claiming that drug trafficking is the main source of income for criminal gangs operating under the banner of an “F Company.”
maradu-anish-taken-into-police-custody-kochi
Maradu Anish, Kochi Crime, Gangster Arrest, Kerala Police, Underworld, Drug Mafia, Mulavukad Police, Crime News
