മലയാളി മദ്യപാനികൾക്ക് മനംമാറ്റം; കുടി കുറഞ്ഞു, അടി ആഘോഷങ്ങൾക്ക് മാത്രം
കേരളത്തിൽ മദ്യപാനം അതിതീവ്രമായി കുറയുന്നുവെന്ന വസ്തുത കണക്കുകൾ വ്യക്തമാക്കുന്നു. ഓണം, ക്രിസ്തുമസ്, ന്യൂ ഇയർ പോലുള്ള ആഘോഷകാലങ്ങളിലെ ഉയർന്ന വിൽപ്പന കണ്ട് തെറ്റിദ്ധരിക്കപ്പെടേണ്ട.
ദീർഘകാല കണക്കുകൾ പരിശോധിക്കുമ്പോൾ, കഴിഞ്ഞ ഒന്നര പതിറ്റാണ്ടിനിടെ സംസ്ഥാനത്തെ മദ്യ ഉപഭോഗം കുറവാണിപ്പോൾ.
സംസ്ഥാനത്തെ മദ്യവിൽപ്പനയുടെ കുത്തകയായ ബീവറേജസ് കോർപ്പറേഷൻ (ബെവ്കോ) കണക്കുകൾ പ്രകാരം 2015–16, 2016–17 സാമ്പത്തിക വർഷങ്ങളിലാണ് ഏറ്റവും കൂടുതൽ മദ്യവിൽപ്പന നടന്നത് – യഥാക്രമം 357 ലക്ഷം, 356 ലക്ഷം കെയ്സ്. ഒരു കെയ്സ് മദ്യമെന്നത് 9 ലിറ്ററാണ്.
എന്നാൽ 2022–23ൽ 331 ലക്ഷം കെയ്സ്, 2023–24ൽ 330 ലക്ഷം കെയ്സ്, 2024–25ൽ 333 ലക്ഷം കെയ്സ് എന്നിങ്ങനെ വിൽപ്പന കുറഞ്ഞു. 2015–16നുമായി താരതമ്യം ചെയ്യുമ്പോൾ 24 ലക്ഷം കെയ്സ് കുറവാണിത്.
ലിറ്റർ കണക്കിൽ പറഞ്ഞാൽ പത്ത് വർഷത്തിനിടെ ഏകദേശം 2.16 കോടി ലിറ്റർ മദ്യ ഉപഭോഗം കുറഞ്ഞു.
കോവിഡിന് മുൻപുള്ള 2019–20ൽ 335 ലക്ഷം കെയ്സ് വിറ്റെങ്കിലും, കോവിഡ് കാലത്ത് ഇത് കുത്തനെ കുറഞ്ഞു. പിന്നീട് വിൽപ്പന ഉയർന്നെങ്കിലും മുൻകാലത്തെ നിലവാരത്തിലെത്തിയിട്ടില്ല.
മലയാളിയുടെ മദ്യരുചി മാറി
ഉമ്മൻ ചാണ്ടി സർക്കാരിന്റെ കാലത്തെ ബാർ അടച്ചുപൂട്ടൽ മലയാളികളുടെ മദ്യാഭിരുചിയിൽ വലിയ മാറ്റമുണ്ടാക്കി. ഐ.എം.എഫ്.എൽ വിഹിതം കുറഞ്ഞു, ബിയർ ഉപയോഗം ഉയർന്നു.
ബാറുകൾ വീണ്ടും തുറന്നിട്ടും ഐ.എം.എഫ്.എൽ പഴയ 70 ശതമാനം വിപണി വിഹിതം തിരികെ പിടിച്ചിട്ടില്ല.
കുടിയന്മാർ കുറയുമ്പോഴും സർക്കാർ വരുമാനം കൂടുന്നു
ദേശീയ കുടുംബാരോഗ്യ സർവേ പ്രകാരം മദ്യപിക്കുന്ന പുരുഷന്മാരുടെ ശതമാനം 37ൽ നിന്ന് 20ൽ താഴെയായി. സ്ത്രീകളിൽ ഇത് 1.6 ശതമാനത്തിൽ നിന്ന് 0.2 ശതമാനമായി കുറഞ്ഞു.
എന്നാൽ നികുതി വർധനവിലൂടെ സർക്കാരിന്റെ മദ്യവരുമാനം ഉയരുകയാണ്. കഴിഞ്ഞ 25 വർഷത്തിനിടെ ബെവ്കോയുടെ വിറ്റുവരവ് 1338 കോടിയിൽ നിന്ന് ഏകദേശം 20,000 കോടിയായി.
നിരോധനങ്ങളുടെ പാഠങ്ങൾ
എ.കെ. ആന്റണിയുടെ ചാരായനിരോധനവും ഉമ്മൻ ചാണ്ടിയുടെ ബാർ നിരോധനവും മദ്യ ഉപഭോഗം കാര്യമായി കുറച്ചില്ലെന്ന് അനുഭവങ്ങൾ പറയുന്നു. മറിച്ച്, ലഹരിമരുന്ന് ഉപയോഗം വർധിക്കുകയും അതുമായി ബന്ധപ്പെട്ട കുറ്റകൃത്യങ്ങൾ കൂടുകയും ചെയ്തുവെന്നാണ് വിലയിരുത്തൽ.
ചുരുക്കത്തിൽ, മദ്യനിരോധനവും വിലവർധനവും സമൂഹത്തിന് പ്രതീക്ഷിച്ച ഗുണം നൽകിയില്ല. പകരം, കൂടുതൽ അപകടകരമായ ലഹരികളിലേക്കുള്ള വഴികൾ തുറക്കപ്പെട്ടുവെന്നാണ് കണക്കുകളും അനുഭവങ്ങളും സൂചിപ്പിക്കുന്നത്.
English Summary
Long-term data from Kerala Beverages Corporation shows that alcohol consumption in Kerala has declined over the past decade, despite high sales during festive seasons. Compared to peak sales in 2015–16, alcohol consumption has reduced by over 21 million litres. However, government revenue from alcohol has increased due to higher taxation. Policy measures like prohibition and price hikes failed to curb substance abuse, instead pushing sections of society towards more dangerous narcotics.
kerala-alcohol-consumption-decline-bevco-data
Kerala, Alcohol consumption, Bevco, Liquor policy, Bar ban, Excise revenue, Substance abuse, Public health
