കംബോഡിയയിൽ വ്യോമാക്രമണം നടത്തി തായ്ലൻഡ്
ബാങ്കോക്ക്: കംബോഡിയയുമായി അതിർത്തി തർക്കം നിലനിൽക്കുന്ന പ്രദേശങ്ങളിൽ തായ്ലൻഡ് നടത്തിയ വ്യോമാക്രമണം ദക്ഷിണേഷ്യയിൽ വീണ്ടും കടുത്ത സംഘർഷാവസ്ഥ സൃഷ്ടിച്ചിരിക്കുകയാണ്.
ഈ ആക്രമണത്തിൽ ഒരു തായ് സൈനികൻ കൊല്ലപ്പെട്ടതായാണ് ഔദ്യോഗിക സ്ഥിരീകരണം.
അടുത്തിടെ യു.എസ്. പ്രസിഡന്റ് ഡോണൾഡ് ട്രംപിന്റെ നേതൃത്വത്തിൽ ഉണ്ടാക്കിയെടുത്ത സമാധാന കരാറിൽ നിന്നാണ് ഇപ്പോൾ ഇരു രാജ്യങ്ങളും പിന്മാറിയിരിക്കുന്നത്.
കരാർ ലംഘിച്ചത് ആരാണെന്ന വിഷയത്തിൽ തായ്ലൻഡും കംബോഡിയയും പരസ്പരം ശക്തമായ ആരോപണങ്ങളാണ് ഉന്നയിക്കുന്നത്.
സമാധാന ശ്രമങ്ങൾ വീണ്ടും തകർന്നുവീഴുന്നതാണ് ഇപ്പോഴത്തെ സാഹചര്യം സൂചിപ്പിക്കുന്നത്.
ജൂലൈ മാസത്തിലാണ് തായ്ലൻഡും കംബോഡിയയും തമ്മിൽ ആദ്യമായി രൂക്ഷമായ സായുധ സംഘർഷം പൊട്ടിപ്പുറപ്പെട്ടത്. അതിർത്തി രേഖയുടെ കൃത്യമായ നിർണ്ണയത്തെ ചൊല്ലിയായിരുന്നു അന്നത്തെ ഏറ്റുമുട്ടൽ.
ആ സംഘർഷത്തിൽ 43 പേർ കൊല്ലപ്പെടുകയും ഏകദേശം മൂന്ന് ലക്ഷം പേർക്ക് വീടുകളും സ്വത്തുക്കളും നഷ്ടപ്പെടുകയും ചെയ്തിരുന്നു. ജനങ്ങൾ കൂട്ടത്തോടെ അതിർത്തി പ്രദേശങ്ങളിൽ നിന്ന് ഒഴിഞ്ഞുപോകേണ്ട സാഹചര്യമാണ് അന്ന് രൂപപ്പെട്ടത്.
ആ മുറിവുകൾ ഇനിയും ഉണങ്ങുന്നതിന് മുമ്പാണ് വീണ്ടും പുതിയ ആക്രമണങ്ങൾ അരങ്ങേറുന്നത്.
ഇന്നുണ്ടായ ആക്രമണം കംബോഡിയൻ സൈന്യം ഔദ്യോഗികമായി സ്ഥിരീകരിച്ചിട്ടുണ്ട്. പുലർച്ചെ തായ് സൈന്യം തങ്ങളുടെ സൈനിക താവളങ്ങളെ ലക്ഷ്യമാക്കി വ്യോമാക്രമണം നടത്തിയെന്നാണ് കംബോഡിയ പുറപ്പെടുവിച്ച പ്രസ്താവനയിൽ പറയുന്നത്.
ഈ ആക്രമണം കരാർ ലംഘനമാണെന്ന നിലപാടിലാണ് കംബോഡിയ. സംഭവത്തിന്റെ മുഴുവൻ വിവരങ്ങളും സൂക്ഷ്മമായി വിലയിരുത്തുകയാണെന്നും, തുടർനടപടികൾ സ്വീകരിക്കുന്നതിനെ കുറിച്ച് സർക്കാർ തലത്തിൽ ആലോചിച്ചുവരികയാണെന്നും കംബോഡിയൻ അധികൃതർ വ്യക്തമാക്കി.
ആക്രമണത്തിൽ സൈനികർക്കും സാധാരണ ജനങ്ങൾക്കും നാശനഷ്ടങ്ങളുണ്ടായോയെന്നതിൽ ഇപ്പോഴും വ്യക്തതയില്ല.
കഴിഞ്ഞ ഒക്ടോബർ 26നാണ് തായ്ലൻഡും കംബോഡിയയും തമ്മിൽ സമാധാന കരാർ ഒപ്പിട്ടത്. ഏഷ്യയിൽ ത്രിരാഷ്ട്ര സന്ദർശനത്തിനെത്തിയ യു.എസ്. പ്രസിഡന്റ് ഡോണൾഡ് ട്രംപിന്റെ സാന്നിധ്യത്തിലായിരുന്നു കരാർ.
മേഖലയിൽ സ്ഥിരത ഉറപ്പാക്കുക, അതിർത്തിയിലെ സൈനിക നീക്കങ്ങൾ നിയന്ത്രിക്കുക, പ്രശ്നങ്ങൾ നയതന്ത്ര മാർഗങ്ങളിൽ പരിഹരിക്കുക എന്നീ വ്യവസ്ഥകളായിരുന്നു കരാറിന്റെ അടിസ്ഥാനം.
അന്ന് ലോകം തന്നെ പ്രതീക്ഷയോടെ ആ കരാറിനെ സ്വാഗതം ചെയ്തിരുന്നു. ദീർഘകാല സമാധാനത്തിന് വഴിയൊരുങ്ങുമെന്നായിരുന്നു അന്താരാഷ്ട്ര സമൂഹത്തിന്റെ വിലയിരുത്തൽ.
എന്നാൽ, കരാർ ഒപ്പിട്ട് അധികം ദിവസങ്ങൾ പിന്നിടുന്നതിന് മുമ്പുതന്നെ തായ് സൈനികർക്കു അതിർത്തി മേഖലയിൽ കുഴിബോംബ് സ്ഫോടനത്തിൽ പരുക്കേറ്റതായി റിപ്പോർട്ടുകൾ പുറത്തുവന്നു.
ഈ സംഭവം കംബോഡിയയുടെ ഭാഗത്തുനിന്നുള്ള ആക്രമണമാണെന്നാണ് തായ്ലൻഡിന്റെ ആരോപണം. ഇതിനെ തുടർന്നാണ് തായ്ലൻഡ് സമാധാന കരാറിൽ നിന്നു പിന്മാറുന്നതായി പ്രഖ്യാപിച്ചത്.
കരാർ ലംഘിച്ചത് കംബോഡിയയാണെന്ന് തായ് അധികൃതർ ആവർത്തിച്ച് പറയുന്നുണ്ട്. കംബോഡിയ ഇതിനെ ശക്തമായി നിഷേധിക്കുകയാണ്.
ഇരു രാജ്യങ്ങളും തമ്മിലുള്ള ഈ പുതിയ സംഘർഷം മേഖലയിൽ വീണ്ടും വലിയ അസ്ഥിരത സൃഷ്ടിക്കുമെന്ന ആശങ്കയാണ് ഉയരുന്നത്.
അതിർത്തി പ്രദേശങ്ങളിൽ താമസിച്ചുവരുന്ന ആയിരക്കണക്കിന് സാധാരണ ജനങ്ങളാണ് ഈ രാഷ്ട്രീയ തീരുമാനങ്ങളുടെയും സൈനിക നടപടികളുടെയും യഥാർത്ഥ ഇരകൾ.
കഴിഞ്ഞതവണ വീടുകൾ നഷ്ടപ്പെട്ടവരുടെ ജീവിതം ഇപ്പോഴും പൂർണമായി പുനരുദ്ധരിക്കപ്പെട്ടിട്ടില്ല.
വീണ്ടും അക്രമം ശക്തമാകുന്ന സാഹചര്യം ഉണ്ടാകുകയാണെങ്കിൽ വലിയ മനുഷ്യാവകാശ പ്രതിസന്ധിയിലേക്ക് ഇത് മാറുമെന്ന മുന്നറിയിപ്പാണ് വിദഗ്ധർ നൽകുന്നത്.
അന്താരാഷ്ട്ര സമൂഹവും ഈ വിഷയത്തെ അതീവ ഗൗരവത്തോടെയാണ് പിന്തുടരുന്നത്.
അമേരിക്ക, ഐക്യരാഷ്ട്ര സഭ, ആസിയാൻ രാജ്യങ്ങൾ എന്നിവിടങ്ങളിലെ നയതന്ത്ര വൃത്തങ്ങൾ സമാധാന ചർച്ചകൾ വീണ്ടും പുനരാരംഭിക്കേണ്ടതിന്റെ ആവശ്യകത ചൂണ്ടിക്കാണിച്ചിട്ടുണ്ട്.
ഒരു കരാർ ഒപ്പിട്ടിട്ട് കുറച്ചു ദിവസങ്ങൾക്കുള്ളിൽ തന്നെ അത് തകരുന്നത് ലോകത്ത് ശക്തമായ തെറ്റിദ്ധാരണകളും ആശങ്കകളും സൃഷ്ടിച്ചതായി നിരീക്ഷകർ അഭിപ്രായപ്പെടുന്നു.
സൈനിക ശക്തിപ്രയോഗത്തിനു പകരം നയതന്ത്ര ചർച്ചകൾ വഴി പ്രശ്നങ്ങൾ പരിഹരിക്കണമെന്ന് പല രാജ്യങ്ങളും ഇരുവർക്കും മുന്നറിയിപ്പ് നൽകിയിട്ടുണ്ട്.
ഇപ്പോൾ നിലനിൽക്കുന്ന സാഹചര്യത്തിൽ അതിർത്തിയിലെ സുരക്ഷ ശക്തമാക്കിയതായാണ് തായ്ലൻഡ് അറിയിച്ചിരിക്കുന്നത്.
കംബോഡിയയും ഇതേപോലെ സൈനിക സന്നാഹങ്ങൾ കൂട്ടിയിട്ടുണ്ട്. ഇരു രാജ്യങ്ങളും തങ്ങളുടെ പരമാധികാരവും ദേശീയ സുരക്ഷയും സംരക്ഷിക്കേണ്ടതാണെന്ന നിലപാടിലാണ്.
എന്നാൽ ഈ നിലപാട് ആയുധമെടുത്തുള്ള പ്രതികരണത്തിലേക്ക് മാറുമ്പോൾ അത് സമാധാനത്തിന്റെയും മനുഷ്യജീവിതത്തിന്റെയും വലിയ നഷ്ടത്തിലേക്കാണ് നയിക്കുക എന്നതാണ് യാഥാർത്ഥ്യം.
ഈ സംഘർഷം എങ്ങനെ അവസാനിക്കും എന്നത് ലോകം ഉറ്റുനോക്കുന്ന ഒരു ചോദ്യമായി മാറുകയാണ്.
