‘രാഷ്ട്രീയം അല്ല, ക്രിമിനൽ കുറ്റമാണ്’ — രാഹുൽ മാങ്കൂട്ടത്തിലിനെതിരെ വി. ശിവൻകുട്ടിയുടെ കടുത്ത വിമർശനം
തിരുവനന്തപുരം: കോൺഗ്രസ് എംഎൽഎ രാഹുൽ മാങ്കൂട്ടത്തിലിനെതിരായ ആരോപണങ്ങൾ അത്യന്തം ഗുരുതരമാണെന്ന് സംസ്ഥാന വിദ്യാഭ്യാസ മന്ത്രി വി. ശിവൻകുട്ടി പ്രതികരിച്ചു.
ഒരു പെൺകുട്ടിയെ വിവാഹ വാഗ്ദാനം നൽകി വഞ്ചിച്ചുവെന്നതും, ഗർഭം ധരിക്കാൻ നിർബന്ധിച്ചുവെന്നും, തുടർന്ന് നിർബന്ധിത ഗർഭഛിദ്രത്തിന് വിധേയയാക്കുകയായിരുന്നുവെന്നുമുള്ള വിവരങ്ങൾ പുറത്ത് വരുന്നതായി അദ്ദേഹം പറഞ്ഞു.
‘സ്ത്രീത്വത്തിനെതിരായ കടന്നുകയറ്റം; രാഷ്ട്രീയ വിഷയമല്ല’
ഈ സംഭവം സാധാരണ രാഷ്ട്രീയ തർക്കമല്ല, സ്ത്രീയുടെ അവകാശങ്ങൾക്കും സുരക്ഷയ്ക്കുമെതിരായ കടന്നു കയറ്റവും ക്രിമിനൽ കുറ്റവുമാണ് എന്ന് ശിവൻകുട്ടി ഫേസ്ബുക്കിൽ പങ്കുവെച്ച കുറിപ്പിൽ പറയുന്നു.
ശിക്ഷിക്കപ്പെടേണ്ട വ്യക്തിയെ സംരക്ഷിക്കാനുള്ള രാഷ്ട്രീയ ശ്രമമാണിത് എന്നും അദ്ദേഹം ആരോപിച്ചു.
കോൺഗ്രസ് നടപടി നാടകം: ശിവൻകുട്ടിയുടെ വിമർശനം
കോൺഗ്രസ് നേതൃത്വം രാഹുലിനെ സസ്പെൻഡ് ചെയ്തതായി പ്രഖ്യാപിച്ചിരുന്നു, എന്നാൽ ഇത് വെറും നാടകം മാത്രമാണെന്ന് ഇപ്പോൾ തെളിഞ്ഞിരിക്കുന്നു എന്നും ശിവൻകുട്ടി പറഞ്ഞു.
സസ്പെൻഷൻ പ്രഖ്യാപിച്ചിട്ടും രാഹുൽ കോൺഗ്രസിന്റെ ഔദ്യോഗിക വേദികളിലും തെരഞ്ഞെടുപ്പ് പ്രചാരണങ്ങളിലും സജീവമായി നിൽക്കുന്നുവെന്നത് അദ്ദേഹം ചൂണ്ടിക്കാട്ടി.
“സ്ത്രീ സുരക്ഷയെക്കുറിച്ച് വാചാലരാകുന്ന കോൺഗ്രസ് നേതാക്കൾ, സ്വന്തം എം.എൽ.എക്കെതിരെ ഇത്രയും നീചമായ ആരോപണം ഉയർന്നിട്ടും അദ്ദേഹത്തെ സംരക്ഷിക്കുകയാണ്. കുറ്റാരോപിതനായ വ്യക്തിയെ മുന്നിൽ നിർത്തി വോട്ട് ചോദിക്കാൻ ഇവർക്ക് എങ്ങനെ സാധിക്കുന്നു? ഇത് കേരളത്തിലെ സ്ത്രീകളോടും വോട്ടർമാരോടും കാണിക്കുന്ന വെല്ലുവിളിയാണ്”. — വി. ശിവൻകുട്ടി, ഫേസ്ബുക്ക് കുറിപ്പിൽ.
English Summary:
Kerala Education Minister V. Sivankutty strongly criticized the Congress over its handling of serious allegations against MLA Rahul Mankootathil, stating that the case involves criminal acts, including cheating a woman with false marriage promises and allegedly forcing an abortion. He accused Congress of pretending to suspend Rahul while still allowing him active participation in official political activities, calling it a drama intended to mislead voters.
