തദ്ദേശ തിരഞ്ഞെടുപ്പ്; ഈ വകുപ്പുകളിൽ പ്രത്യേക ശ്രദ്ധ വേണമെന്ന് സിപിഎം
തിരുവനന്തപുരം: തദ്ദേശ തിരഞ്ഞെടുപ്പ് പ്രഖ്യാപിച്ച പശ്ചാത്തലത്തിൽ സംസ്ഥാന സർക്കാരിന് സിപിഎം അതീവ ജാഗ്രതാ നിർദേശം നൽകി.
ജനങ്ങളുമായി നേരിട്ട് ഇടപെടുന്ന ആരോഗ്യ, പോലീസ് വകുപ്പുകളിൽ പ്രത്യേക ശ്രദ്ധ വേണമെന്ന് പാർട്ടി മുഖ്യമന്ത്രിയോട് ആവശ്യപ്പെട്ടു.
ചെറിയ പിഴവുകൾ പോലും ആയുധമാക്കി സർക്കാരിനെതിരെ പ്രചാരണം നടത്താൻ സാധ്യതയുള്ളതിനാൽ വിവാദങ്ങൾ ഒഴിവാക്കാൻ പരമാവധി കരുതൽ വേണമെന്ന് മുഖ്യമന്ത്രി പിണറായി വിജയനും ബന്ധപ്പെട്ട വകുപ്പുകൾക്ക് നിർദേശം നൽകി.
തിരുവനന്തപുരം മെഡിക്കൽ കോളജ്, എസ്എടി ആശുപത്രി എന്നിവയെ ചുറ്റിപ്പറ്റി ഉയർന്ന സമീപകാല ആരോപണങ്ങളുടെ പശ്ചാത്തലത്തിലാണ് പാർട്ടിയുടെ ആശങ്ക ശക്തമായത്.
കേരളത്തിന്റെ പൊതുജനാരോഗ്യ മേഖലയ്ക്ക് നേരെ ആസൂത്രിത നീക്കങ്ങൾ നടക്കുന്നുവെന്നാണ് സിപിഎം വിലയിരുത്തൽ.
ആരോഗ്യവകുപ്പിന്റെ മേൽനോട്ടം കൂടുതൽ കാര്യക്ഷമമാകണമെന്നും മന്ത്രിതല ഏകോപനം ശക്തമാക്കണമെന്നും പാർട്ടി നേതൃത്വത്തിൽ അഭിപ്രായമുണ്ട്.
സംസ്ഥാനത്തെ സർക്കാർ ആശുപത്രികളുടെ പ്രവർത്തനമികവ് സ്വകാര്യ ആരോഗ്യ ലോബികൾക്ക് തിരിച്ചടിയാണെന്നും, അതിനാൽ നേട്ടങ്ങളെ തകർക്കാൻ ശ്രമങ്ങൾ ഉണ്ടാകുമെന്നും പാർട്ടി മുന്നറിയിപ്പ് നൽകുന്നു.
മെഡിക്കൽ കോളജ്, എസ്എടി ആശുപത്രി വിവാദങ്ങൾ രാഷ്ട്രീയ ലക്ഷ്യത്തോടെയാണെന്ന നിലപാടിലാണ് സിപിഎമ്മും ആരോഗ്യ വകുപ്പും.
തിരഞ്ഞെടുപ്പ് കാലത്ത് ഇത്തരത്തിലുള്ള നീക്കങ്ങൾ ശക്തമാകുമെന്നതിനാൽ അപവാദ പ്രചാരണങ്ങളെ പ്രതിരോധിക്കാൻ സംവിധാനങ്ങൾ ജാഗ്രത പുലർത്തണം എന്നാണ് നിർദേശം.
പോലീസ് വകുപ്പും പ്രത്യേക കരുതൽ പുലർത്തണം. പോലീസ് സംവിധാനത്തിന്റെ ചെറിയ വീഴ്ചകൾ പോലും സർക്കാരിനും പാർട്ടിക്കും ക്ഷീണമുണ്ടാക്കുമെന്ന് നേതൃത്വം ചൂണ്ടിക്കാട്ടി.
ഷാഫി പറമ്പിൽ വിഷയത്തിലും തൃശൂരിലെ യൂത്ത് കോൺഗ്രസ് നേതാവിനെതിരായ കസ്റ്റഡി മർദന ആരോപണത്തിലും ഉണ്ടായ പ്രതിസന്ധികൾ പോലുള്ള സാഹചര്യം തിരഞ്ഞെടുപ്പ് സമയത്ത് ആവർത്തിക്കാൻ അനുവദിക്കരുതെന്നും സിപിഎം മുന്നറിയിപ്പ് നൽകി.
എല്ലാ പ്രതിപക്ഷ പാർട്ടികളും സമരങ്ങളിലേക്കും സംഘർഷങ്ങളിലേക്കും നീങ്ങാൻ സാധ്യതയുണ്ടെന്നും, പ്രകോപനങ്ങളിൽ പോലീസ് വീഴരുതെന്നും മുഖ്യമന്ത്രി നേരിട്ട് നിർദേശം നൽകിയിട്ടുണ്ട്.
സിപിഎം സെക്രട്ടേറിയറ്റ് യോഗത്തിൽ വിഷയം വിശദമായി ചർച്ച ചെയ്തതായും, ബന്ധപ്പെട്ട എല്ലാ സ്ഥാപനങ്ങളോടും കർശന ജാഗ്രത പാലിക്കാൻ നിർദ്ദേശം നൽകിക്കഴിഞ്ഞതായും നേതൃത്വം അറിയിച്ചു.
English Summary
Following the announcement of Kerala’s local body elections, the CPM has issued a strong alert to the state government, urging heightened vigilance, especially in the Health and Police departments. The party warned that opposition forces may exploit even minor administrative lapses to damage the government’s image. Chief Minister Pinarayi Vijayan has directed all departments to avoid controversies and remain cautious.
