ഒറ്റപ്പാലം: പാലക്കാട് വാണിയംകുളത്ത് കൈക്കൂലി വാങ്ങുന്നതിനിടയിൽ വില്ലേജ് ഫീൽഡ് അസിസ്റ്റന്റ് വിജിലൻസിന്റെ പിടിയിൽ.
500 രൂപ കൈക്കൂലി വാങ്ങുന്നതിനിടെയാണ് വില്ലേജ് ഫീൽഡ് അസിസ്റ്റന്റ് ഫസലിനെ വിജിലൻസ് കയ്യോടെ പിടികൂടിയത്.
ശനിയാഴ്ച വൈകുന്നേരം അഞ്ചോടെയായിരുന്നു സംഭവം നടന്നത്. കോതകുറുശ്ശി സ്വദേശിയുടെ പരാതിയുടെ അടിസ്ഥാനത്തിലായിരുന്നു നടപടി.
തണ്ടപ്പേർ സർട്ടിഫിക്കറ്റ് ആവശ്യപ്പെട്ടയാളോടാണ് കൈക്കൂലി നൽകാൻ ഇയാൾ ആവശ്യപ്പെട്ടത്.
പരാതിക്കാരന്റെ പിതാവിന്റെ പേരിലുള്ള 63 സെന്റിന് തണ്ടപ്പേർ ലഭിക്കാനായി ഈ മാസം 9ന് വില്ലേജ് ഓഫിസിൽ അപേക്ഷ സമർപ്പിച്ചു.
സ്ഥലപരിശോധന കഴിഞ്ഞതോടെ തണ്ടപ്പേർ സർട്ടിഫിക്കറ്റ് ലഭിക്കണമെങ്കിൽ 1,000 രൂപ കൈക്കൂലിയായി ഫസൽ ആവശ്യപ്പെട്ടു.
പരാതിക്കാരനിൽനിന്നും കൈവശമുണ്ടായിരുന്ന 500 രൂപ അപ്പോൾ വാങ്ങുകയും ബാക്കി സർട്ടിഫിക്കറ്റിനായി വരുമ്പോൾ നൽകണമെന്നും പറയുകയും ആയിരുന്നു.
പിന്നീട് പരാതിക്കാരന്റെ ബന്ധു 24ന് വില്ലേജ് ഓഫിസിലെത്തി സർട്ടിഫിക്കറ്റ് കൈപ്പറ്റിയപ്പോൾ 500 രൂപ ആവശ്യപ്പെട്ടെങ്കിലും പരാതിക്കാരൻ നൽകുമെന്ന് അറിയിച്ചു.
തുടർന്ന് 500 രൂപ 28ന് വില്ലേജ് ഓഫിസിൽ എത്തിച്ചുതരണമെന്ന് പരാതിക്കാരനെ ഫസൽ വിളിച്ചറിയിക്കുകയായിരുന്നു. തുടർന്ന് പരാതിക്കാരൻ പാലക്കാട് വിജിലൻസ് ഡെപ്യൂട്ടി പൊലീസ് സൂപ്രണ്ടിനെ അറിയിക്കുകയായിരുന്നു.
500 രൂപ ഫസലിന്റെ സ്‌കൂട്ടറിന്റെ മൊബൈൽ ഫോൺ ഹോൾഡറിൽ വെക്കാൻ നിർദേശിക്കുകയായിരുന്നു.
ഈ തുക ഫസൽ എടുക്കാൻ നേരം വിജിലൻസ് കൈയോടെ പിടികൂടുകയുമായിരുന്നു. പ്രതിയെ തൃശൂരിലെ വിജിലൻസ് കോടതിയിൽ ഹാജരാക്കുമെന്ന് സംഘം അറിയിച്ചു.
English Summary :
In Palakkad’s Vaniyamkulam, a Village Field Assistant named Fazal was caught red-handed by the Vigilance while accepting a bribe of ₹500.
