തിരുവനന്തപുരം: മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിലെ നീന്തൽ കുളത്തിന് വീണ്ടും പണം അനുവദിച്ചു. നാലര ലക്ഷത്തിലധികം രൂപയാണ് ടൂറിസം വകുപ്പ് അനുവദിച്ചത്. ആറാം ഘട്ട പരിപാലനത്തിനാണ് തുക അനുവദിച്ചത്.
നീന്തൽ കുളത്തിന്റെ നവീകരണത്തിനും പരിപാലനത്തിനുമായി ഇതുവരെ അര കോടിയിലേറെ രൂപയാണ് അനുവദിച്ചത്. ഊരാളുങ്കല് സൊസൈറ്റിയാണ് വാര്ഷിക പരിപാലനം നടത്തുന്നത്.
പിണറായി സര്ക്കാര് അധികാരത്തിൽ വന്ന 2016 മെയ് മുതൽ 2022 നവംബർ 14 വരെ മാത്രം നീന്തല് കുളത്തിനായി 31,92, 360 രൂപയാണ് ചെലവിട്ടത്. ക്ലിഫ് ഹൗസിൽ ലിഫ്റ്റ് പണിയാൻ 25.50 ലക്ഷം രൂപ അനുവദിച്ചതും ഏറെ വിമര്ശങ്ങള്ക്ക് ഇടയാക്കിയിരുന്നു.
ക്ലിഫ് ഹൗസില് കാലിത്തൊഴുത്ത് നിർമിക്കാൻ പണം അനുവദിച്ചതും നേരത്തെ വിവാദമായിരുന്നു. കൂടാതെ ക്ലിഫ് ഹൗസ് ഉള്പ്പെടെ മന്ത്രിമന്ദിരങ്ങളിൽ മരപ്പട്ടി ശല്യം രൂക്ഷമാണെന്ന മുഖ്യമന്ത്രിയുടെ പരസ്യ പ്രതികരണവും വാര്ത്തകളില് ഇടം പിടിച്ചിരുന്നു.
