ഒരുവർഷത്തിനിടെ ലേഡീസ് കംപാർട്മെന്റിൽ കയറിയതിന് അറസ്റ്റിലായത് 601 പുരുഷന്മാർ
കോട്ടയം: ട്രെയിൻ യാത്രയ്ക്കിടയിൽ അപകടമോ ഉപദ്രവമോ നേരിടുന്ന സാഹചര്യത്തിൽ അടിയന്തര സഹായം തേടാൻ റെയിൽവേ നൽകിയിരിക്കുന്ന നിരവധി ഫോൺ നമ്പറുകളിലേക്ക് വിളിച്ചാൽ പ്രതികരണം ലഭിക്കാത്ത അവസ്ഥ തുടരുന്നു.
യാത്രക്കാരുടെ സുരക്ഷയ്ക്കായി പ്രസിദ്ധീകരിച്ചിരിക്കുന്ന 139, 112, 9846200100 എന്നീ നമ്പറുകളിൽ സഹായം ലഭിക്കുന്നതിൽ ഗുരുതരമായ വീഴ്ചകളാണ് ഇനിയും നിലനിൽക്കുന്നത്.
139 നമ്പറിലേക്ക് വിളിക്കുമ്പോൾ കോൾ കണക്ട് ചെയ്യുന്നു. എന്നാൽ സഹായത്തേക്കാൾ കൂടുതൽ സമയം ചുരുങ്ങാത്ത IVR നിർദേശങ്ങൾ കേൾക്കേണ്ടി വരുന്നു.
ബിലാസ്പൂരിൽ നടന്ന ട്രെയിൻ അപകട വിവരങ്ങൾക്കായി പൂജ്യം അമർത്തുക, സുരക്ഷാ പ്രശ്നങ്ങൾക്ക് ‘ഒന്ന്’, മറ്റു ചോദ്യം ചെയ്യലുകൾക്ക് ‘രണ്ട്’, പരാതികൾക്ക് ‘മൂന്ന്’, വനിതകളുടെയോ അംഗപരിമിതരുടെയോ അടിയന്തര ആവശ്യങ്ങൾക്ക് ‘നാല്’, അഴിമതി-കൈക്കൂലി അറിയിക്കാൻ ‘അഞ്ച്’, ഭാഷാമാറ്റത്തിന് ‘ആറ് ഇങ്ങനെ നീളുന്ന നിർദ്ദേശങ്ങൾക്കിടയിൽ, സഹായം ലഭിക്കുന്നതിന് മുമ്പേ യാത്രക്കാരൻ ഉപദ്രവത്തിനിരയാകുമെന്നതാണ് യാഥാർത്ഥ്യമായ വ്യഥ.
ഭാഷാ തിരഞ്ഞെടുപ്പിലും പ്രശ്നങ്ങൾ. മലയാളം, ഹിന്ദി, ഇംഗ്ലീഷ് തുടങ്ങിയ ഭാഷകൾ പറയുമ്പോഴും ഭാഷ മാറാതെ ആദ്യ നിർദേശങ്ങൾ വീണ്ടും വീണ്ടും ആവർത്തിക്കപ്പെടുന്നു. സഹായത്തിനായി വിളിക്കുന്നത് തന്നെ വെറുപ്പിപ്പിക്കുന്ന അനുഭവമാകുന്നു.
അതേസമയം, 112 എന്ന ദേശീയ അടിയന്തര നമ്പറിലേക്ക് നിരവധി ശ്രമങ്ങൾക്കൊടുവിലാണ് രണ്ടുതവണ ലഭിച്ചത്. എന്നാൽ “ട്രെയിനിനുള്ളിലെ പ്രശ്നങ്ങൾക്ക് മാത്രം ഈ സേവനം” എന്ന മറുപടിയാണ് ലഭിച്ചത്.
റെയിൽവേ പോലീസ് കൺട്രോൾ റൂം നമ്പറായ 9846200100-ലേക്ക് വിളിച്ചപ്പോൾ ആദ്യ ശ്രമത്തിൽ തന്നെ ബന്ധപ്പെടാൻ കഴിഞ്ഞു. കേരള പോലീസിന്റെ അടിയന്തര നമ്പറായ 100-ലേക്കും ആദ്യ ബെല്ലിൽ തന്നെ പ്രതികരണം.
“ട്രെയിൻ യാത്രയ്ക്കിടയിലെ ഏത് അടിയന്തര സാഹചര്യത്തിലും ഈ നമ്പറിലേക്ക് വിളിക്കാം. ഉടൻ റെയിൽവേ കൺട്രോൾ റൂമിൽ അറിയിക്കും,” എന്ന Kerala Police മറുപടി സ്ത്രീകൾക്ക് ആത്മവിശ്വാസമേകുന്നതാണ്.
ലേഡീസ് കോച്ചുകളിൽ 601 പുരുഷന്മാർ പിടിയിൽ
സ്ത്രീകൾക്കായി നീക്കിവച്ചിരിക്കുന്ന കോച്ചുകളിൽ അനധികൃതമായി കയറിയതിന് തൃശ്ശൂർ–തിരുവനന്തപുരം ഡിവിഷനിൽ മാത്രം ഈ വർഷം 601 പുരുഷന്മാരെ അറസ്റ്റുചെയ്തതായി റെയിൽവേ അറിയിച്ചു.
ഇതിൽ 6 പേർ സ്ത്രീകൾക്കെതിരെയുള്ള കുറ്റകൃത്യങ്ങൾ നടത്തിയവരാണ്. 34 പേരെ വിചാരണയ്ക്ക് വിധേയമാക്കി.
അതിനുപുറമേ 7193 പേരെതിരേ വിവിധ കുറ്റങ്ങളുടെ പേരിൽ കേസുകളും രജിസ്റ്റർ ചെയ്തു.
2025: സ്ത്രീസുരക്ഷയ്‌ക്ക് സിസിടിവി-ബോധവത്ക്കരണം
സ്ത്രീ യാത്രക്കാരുടെ സുരക്ഷ ഉറപ്പാക്കാൻ റെയിൽവേ 2025-ൽ സിസിടിവി നിരീക്ഷണം മുതൽ ബോധവത്കരണ പ്രവർത്തനങ്ങൾ വരെ ശക്തമാക്കിയിട്ടുണ്ട്.
പ്രശ്നങ്ങൾ നേരിടുന്ന സ്ത്രീകൾക്ക് നേരിട്ട് സഹായം നൽകാൻ 35,406 വനിതാ യാത്രക്കാരുമായി ഇടപെട്ടതായി രേഖകളിൽ പറയുന്നു.
യാത്രകളിൽ സുരക്ഷ, പ്രത്യേകിച്ച് സ്ത്രീകൾക്കുള്ള സംരക്ഷണം, കൂടുതൽ കഠിനമായ പരിശ്രമം ആവശ്യപ്പെടുന്ന മേഖലയാണെന്ന് ഈ സംഭവങ്ങൾ തെളിയിക്കുന്നു.
