രേഖകളില്ലാതെ കടത്തിയ സ്വർണവും പണവും പിടികൂടി
മഞ്ചേശ്വരം എക്സൈസ് ചെക്ക്പോസ്റ്റില് രേഖകളില്ലാതെ കടത്താൻ ശ്രമിച്ച സ്വർണ്ണവും പണവും പിടികൂടി. 55 പവൻ സ്വർണ്ണവും നാല് ലക്ഷം രൂപയുമാണ് പിടികൂടിയത്.
സംഭവത്തിൽ കോഴിക്കോട് കക്കോടി സ്വദേശി മുഹമ്മദ് ഫാസിലിനെ എക്സൈസ് കസ്റ്റഡിയിൽ എടുത്തു. എക്സൈസ് വാഹന പരിശോധനക്കിടെയാണ് സ്വർണവും പണവും പിടികൂടിയത്.
എക്സൈസ് സർക്കിൾ ഇന്സ്പെക്ടര് ഷിജിൽ കുമാർ കെ കെയുടെ നേതൃത്വത്തിലാണ് വാഹന പരിശോധന നടത്തിയത്. മംഗലാപുരത്ത് നിന്നും കാസര്കോട് ഭാഗത്തേക്ക് കർണാടക കെഎസ്ആര്ടിസി ബസിലാണ് സ്വർണവും പണവും കടത്തിയിരുന്നത്.
നിലവാരമില്ലാത്ത 5800 ലിറ്റര് വെളിച്ചെണ്ണ പിടികൂടി
കൊല്ലം: കൊല്ലത്ത് നിന്നും നിലവാരമില്ലാത്ത വെളിച്ചെണ്ണ പിടികൂടി. വ്യാജ ലേബലോട് കൂടിയ വെളിച്ചെണ്ണയാണ് ഭക്ഷ്യസുരക്ഷാ വിഭാഗം പിടികൂടിയത്.
പരിശോധനയില് 5800 ലിറ്റര് വ്യാജ വെളിച്ചെണ്ണയാണ് കണ്ടെത്തിയത്. കേര സൂര്യ, കേര ഹരിതം എന്നീ ബ്രാന്ഡുകളുടെ വെളിച്ചെണ്ണയാണ് പിടികൂടിയത്. വ്യാജ ഫുഡ് സേഫ്റ്റി നമ്പറിലായിരുന്നു വെളിച്ചെണ്ണ നിറച്ചിരുന്നത്.
അതേസമയം വ്യാജ വെളിച്ചെണ്ണയുടെ വിപണനം തടയാന് ഓപ്പറേഷന് നാളികേര എന്ന പേരിൽ ഭക്ഷ്യ സുരക്ഷാ വകുപ്പ് പരിശോധന ആരംഭിച്ചു. കൊല്ലത്ത് വ്യാജ വെളിച്ചെണ്ണ പിടികൂടിയതിനെ തുടര്ന്നാണ് നടപടി.
വെളിച്ചെണ്ണ നിര്മ്മാണ യൂണിറ്റുകളിലും മൊത്ത, ചില്ലറ വ്യാപാര കേന്ദ്രങ്ങളിലുമാണ് പരിശോധന നടത്തുന്നത്. സംസ്ഥാനത്തൊട്ടാകെ 980 സ്ഥാപനങ്ങളിലാണ് പരിശോധന നടന്നത്. ഇതില് 25 സ്ഥാപനങ്ങള്ക്ക് റെക്ടിഫിക്കേഷന് നോട്ടീസ് നല്കിയിട്ടുണ്ട്.
ഏഴ് സ്ഥാപനങ്ങള്ക്ക് പിഴ ഈടാക്കുന്നതിനുള്ള കോമ്പൗണ്ടിംഗ് നോട്ടീസും നല്കി. 161 സ്റ്റാറ്റിയൂട്ടറി സാമ്പിളുകളും 277 സര്വൈലന്സ് സാമ്പിളുകളും തുടര് പരിശോധനയ്ക്ക് അയച്ചിരിക്കുകയാണ്.
മായം ചേര്ത്ത വെളിച്ചെണ്ണയുടെ വില്പനയ്ക്കെതിരെ പൊതുജനങ്ങള്ക്കും ജാഗ്രത നിര്ദേശം നല്കിയിട്ടുണ്ട്. വെളിച്ചെണ്ണയുടെ ഗുണമേന്മയെക്കുറിച്ച് സംശയം തോന്നിയാല് ഭക്ഷ്യ സുരക്ഷാ വകുപ്പിന് പരാതി നല്കാവുന്നതാണ്.
പരാതി നല്കേണ്ട ടോള് ഫ്രീ നമ്പര്- 1800 425 1125.
Summary: At the Manjeshwaram excise checkpost, officers seized 55 sovereigns of gold and ₹4 lakh cash that were being transported without proper documents. Authorities have launched further investigation into the attempted smuggling.
