ഭർത്താവിന്റെ വീട്ടുകാരെ കൊലപ്പെടുത്താൻ 50കാരി ഭക്ഷണത്തിൽ കലർത്തിയത് അത്യന്തം മാരകമായ ‘ഡെത്ത് ക്യാപ്’ എന്ന വിഷക്കൂൺ; പിന്നീട് നടന്നത് ഇങ്ങനെ:
ഓസ്ട്രേലിയയിൽ മുൻ ഭർത്താവിന്റെ മാതാപിതാക്കളെയും ബന്ധുവിനെയും വിഷക്കൂൺ കലർന്ന ഭക്ഷണം നൽകി കൊലപ്പെടുത്തിയ കേസിൽ 50കാരി എറിൻ പാറ്റേഴ്സൺക്ക് ജീവപര്യന്തം തടവ് ശിക്ഷ വിധിച്ചു. 2023 ജൂലൈ 29-നാണ് ഞെട്ടിക്കുന്ന സംഭവം നടന്നത്.
എന്നാൽ എറിൻ കുറ്റം സമ്മതിച്ചില്ല. കാൻസർ ബാധിതയാണെന്നും അത് സംബന്ധിച്ച് സംസാരിക്കാനാണെന്നും പറഞ്ഞ് മുൻ ഭർത്താവിന്റെ മാതാപിതാക്കളെയും ബന്ധുവിനെയും വീട്ടിലേക്ക് വിളിച്ചുവരുത്തുകയായിരുന്നു അവൾ. എറിന്റെ വീട്ടിൽ ഒരുക്കിയിരുന്ന പ്രത്യേക വിഭവമായ ബീഫ് വെല്ലിംഗ്ടൺ ഭക്ഷണത്തിലാണ് വിഷം കലർത്തിയത്.
‘ഡെത്ത് ക്യാപ്’ എന്ന് അറിയപ്പെടുന്ന അത്യന്തം മാരകമായ കൂണുകളാണ് ഇവർ ഭക്ഷണത്തിൽ ചേർത്തത്. ഭൂമിയിലെ ഏറ്റവും അപകടകാരിയായ വിഷമുള്ള കൂണുകളിലൊന്നാണിത്.
ഈ ഭക്ഷണം കഴിച്ചതിനെ തുടർന്ന് മുൻ ഭർത്താവിന്റെ മാതാപിതാക്കളായ ഡോൺ പാറ്റേഴ്സൺ, ഗെയ്ൽ പാറ്റേഴ്സൺ, അടുത്ത ബന്ധുവായ ഹെതർ വിൽക്കിൻസൺ എന്നിവർ ആഴ്ചകൾക്കകം മരണപ്പെട്ടു. അതേസമയം, മുൻ ഭർത്താവ് സൈമൺ പാറ്റേഴ്സൺക്ക് ക്ഷണം നൽകിയിരുന്നെങ്കിലും അദ്ദേഹം പങ്കെടുത്തിരുന്നില്ല.
സംഭവത്തിൽ സംശയം തോന്നിയ ആശുപത്രി അധികൃതരാണ് വിക്ടോറിയ പൊലീസിനെ വിവരം അറിയിച്ചത്. തുടർന്ന് നടത്തിയ അന്വേഷണത്തിൽ എറിൻ മനഃപൂർവ്വം വിഷക്കൂൺ കലർത്തിയതായി തെളിവുകൾ കണ്ടെത്തി.
പ്രോസിക്യൂഷൻ വാദിച്ചത്, കുട്ടികളുടെ സംരക്ഷണവുമായി ബന്ധപ്പെട്ട കുടുംബ കലഹമാണ് കൊലപാതകത്തിന് പിന്നിലെ പ്രധാന കാരണം എന്നായിരുന്നു.
2022 മെയ്, സെപ്റ്റംബർ മാസങ്ങളിലായി എറിൻ കൊലപാതകശ്രമം നടത്തിയിരുന്നുവെങ്കിലും അന്ന് പരാജയപ്പെട്ടിരുന്നു.
പത്ത് ആഴ്ച നീണ്ടുനിന്ന വിചാരണയ്ക്കു ശേഷമാണ് കോടതിയുടെ കർശന വിധി പുറപ്പെട്ടത്. ജീവപര്യന്ത തടവിനിടെ 33 വർഷത്തേക്ക് പരോൾ അനുവദിക്കില്ലെന്ന് കോടതി വ്യക്തമാക്കി.
ശിക്ഷയ്ക്കെതിരെ അപ്പീൽ സമർപ്പിക്കാൻ എറിന് ഒക്ടോബർ 6 വരെ സമയം അനുവദിച്ചിട്ടുണ്ട്. അതേസമയം, ഈ കേസ് ഓസ്ട്രേലിയയിലെ ഏറ്റവും വിവാദാസ്പദമായ കുടുംബ കൊലപാതകങ്ങളിൽ ഒന്നായി കണക്കാക്കപ്പെടുന്നു.
Summary:
In Australia, Erin Patterson (50) has been sentenced to life imprisonment for murdering her former husband’s parents and a relative by serving them food laced with poisonous mushrooms. The shocking incident took place on July 29, 2023.
