തിരുവനന്തപുരം: സഹോദരിമാരായ 13ഉം 17ഉം വയസുള്ള പെൺകുട്ടികളെ പീഡിപ്പിച്ച രണ്ടുപേരെ പിടികൂടി പോലീസ്. തിരുവനന്തപുരം വർക്കലയിലാണ് സംഭവം. കൊല്ലം ശക്തികുളങ്ങര സ്വദേശി മനു എന്നു വിളിക്കുന്ന അഖിൽ(23), 17കാരനായ പ്ലസ് ടു വിദ്യാർത്ഥി എന്നിവരാണ് അറസ്റ്റിലായത്.
പരവൂർ- ഭൂതക്കുളം റൂട്ടിലെ ബസ് കണ്ടക്ടർ ആണ് പിടിയിലായ അഖിൽ. 17 കാരിയായ പെൺകുട്ടിയും പ്രതികളിലൊരാളായ 17കാരനും സഹപാഠികളാണ്. 2023 മുതൽ പെൺകുട്ടിയെ 17കാരൻ പ്രണയം നടിച്ച് നിരന്തരമായി ശാരീരിക പീഡനത്തിന് ഇരയാക്കിയിരുന്നു. പെൺകുട്ടികളെയും 17കാരനെയും ബസിൽ വെച്ചാണ് അഖിൽ പരിചയപ്പെടുന്നത്.
തുടർന്ന് ഇവരുമായി സൗഹൃദം സ്ഥാപിക്കുകയും കണ്ടക്ടര് അഖിലും പ്രണയം നടിച്ച് കുട്ടികളെ പീഡനത്തിനിരയാക്കുകയായിരുന്നു എന്ന് പോലീസ് പറഞ്ഞു. കുട്ടികളുടെ അധ്യാപികമാരാണ് ചൈൽഡ് ലൈനിലും പൊലീസിലും ഇക്കാര്യം അറിയിച്ചത്. 17കാരനായ വിദ്യാർഥിയെ ജുവനൈൽ ജസ്റ്റിസ് ആക്ട് പ്രകാരം ജുവനയിൽ ഹോമിലേക്ക് അയച്ചു. അഖിലിനെ കോടതിയിൽ ഹാജരാക്കി റിമാൻഡ് ചെയ്തു.
