TOP NEWS
ദുബായ്: കുബേരനിലെ ദിലീപ് അവതരിപ്പിച്ച കഥാപാത്രത്തെ ഓർമയില്ലെ. മാസത്തിൽ ഒരു ദിവസം കോടീശ്വരനായി ജീവിക്കുന്ന സതീർഥ്യനെ. ഏതാണ്ട് അതുപോലായിരുന്നു ലോക തൊഴിലാളി ദിനത്തിൽ ദുബായിലെ 16 കെട്ടിട നിർമ്മാണ തൊഴിലാളികൾ ജീവിച്ചത്തൊ ഴിലിടങ്ങളിലെ വസ്ത്രങ്ങൾ ഉപേക്ഷിച്ച് കോട്ടും സ്യൂട്ടും ധരിച്ച് ലക്ഷ്വറി കാറുകളിൽ യാത്ര ചെയ്ത് ഒരു കോടീശ്വരൻ എങ്ങനെയാണോ ജീവിക്കുന്നത് അതുപോലെയാണ് അവർ ഒരു ദിവസം കഴിഞ്ഞത്. ദുബായിലെ ജലാശങ്ങളിലെ ആഡംബര നൗകകളിലും അവർ യാത്ര ചെയ്തു. നഗരത്തിലെ തന്നെ ഏറ്റവും വലിയ ഫൈവ് സ്റ്റാർ ഹോട്ടലുകളിൽ താമസവും ഭക്ഷണവും. വേൾഡ് സ്റ്റാർ ഹോൾഡിംഗ് എന്ന കമ്പനിയിൽ മികച്ച പ്രകടനം കാഴ്ചവച്ച ജീവനക്കാർക്കാണ് കമ്പനി ഒരു ദിവസത്തേക്ക് ആഡംബര ജീവിതം നയിക്കാൻ അവസരം നൽകിയത്.
അവാർഡ് വിതരണത്തിന് ശേഷം നീല നിറത്തിലുള്ള കസ്റ്റമൈസ്ഡ് സ്യൂട്ട് ധരിച്ച തൊഴിലാളികൾ പുറത്ത് കാത്തിരുന്ന ആഡംബര വാഹനങ്ങളിൽ യാത്ര ആരംഭിച്ചു. ഫെരാരി, ലംബോർഗിനി, ബെൻലി, ഫോർഡ് മസ്താംഗ്, കാർഡിലാക്ക് എന്നീ ആഡംബര വാഹനങ്ങളാണ് തൊഴിലാളികൾക്ക് യാത്ര ചെയ്യാൻ കമ്പനി ഒരുക്കിയത്. ഈ വാഹനത്തിൽ കയറിയ തൊഴിലാളികളെ ദുബായ് നഗരത്തെ ചുറ്റിച്ചു. പിന്നീട് ആദ്യം വാഹനം നിർത്തിയത് ദുബായ് മറീനയിലായിരുന്നു. അവിടെ പാർക്ക് ചെയ്ത ആഡംബര നൗകയിൽ ജലാശയത്തെ ചുറ്റി ഒരു യാത്ര. പിന്നീട് താമസത്തിനായി നഗരത്തിലെ പ്രധാനപ്പെട്ട ഫൈവ് സ്റ്റാർ ഹോട്ടലിലേക്ക്.
കഴിഞ്ഞ വർഷം, ജോർജിയയിലേക്കുള്ള എല്ലാ ചെലവുകളും അടയ്ക്കുന്ന ഒരു യാത്ര മികച്ച പ്രകടനം കാഴ്ചവച്ച തൊഴിലാളികൾക്ക് നൽകിയിരുന്നു. ഈ വർഷം മുതൽ ജീവനക്കാരുടെ മക്കളുടെ വിദ്യാഭ്യാസത്തിന് ആവശ്യമായ കാര്യങ്ങളിൽ ശ്രദ്ധ കേന്ദ്രീകരിക്കുമെന്ന് കമ്പനി അറിയിച്ചു.
