ഈ വനിതാ ദിനം ആഘോഷമാക്കാൻ കോവളത്തേക്ക് വരൂ! കലയും വർണ്ണങ്ങളും ചേരുന്ന പെൺകരുത്തിന്റെ ഉത്സവം; ‘WOW’ വുമൺസ് വീക്ക് വരുന്നു!
പൈതൃകവും ആധുനികതയും കൈകോർക്കുന്ന കലാവിരുന്നിന് കോവളം സജ്ജമാകുന്നു. അന്താരാഷ്ട്ര വനിതാദിനത്തോടനുബന്ധിച്ച് കേരള ആർട്സ് ആൻഡ് ക്രാഫ്റ്റ്സ് വില്ലേജ് (KACV) ‘WOW’ വുമൺസ് വീക്ക് സംഘടിപ്പിക്കുന്നു.
മാർച്ച് 6 മുതൽ 8 വരെ നീളുന്ന ആഘോഷങ്ങളിൽ കഥകളി–കൺടെംപററി ഫ്യൂഷൻ, ഹോളി സംഗീതോത്സവം, രാജാ രവിവർമ്മ ചിത്രങ്ങളുടെ നൃത്താവിഷ്കാരം എന്നിവ പ്രധാന ആകർഷണങ്ങളാകും.
കോവളത്തെ കേരള ആർട്സ് ആൻഡ് ക്രാഫ്റ്റ്സ് വില്ലേജ് (KACV) അന്താരാഷ്ട്ര വനിതാദിനാഘോഷങ്ങളുടെ ഭാഗമായി ‘WOW’ (Women’s Week) വാരാഘോഷങ്ങൾ സംഘടിപ്പിക്കുന്നു.
ടിക്കർ ഇവന്റ്സിന്റെ സഹകരണത്തോടെ മാർച്ച് 6 മുതൽ 8 വരെ നടക്കുന്ന ഈ കലാമേള പൈതൃകവും പുതുമയും സമന്വയിപ്പിക്കുന്ന വേദിയാകുമെന്ന് സംഘാടകർ അറിയിച്ചു.
മാർച്ച് 6-ന് ‘ഗോസിപ്പ്’ എന്ന തിയേറ്റർ ഡാൻസ് അവതരണത്തോടെയാണ് പരിപാടികൾക്ക് തുടക്കമാകുന്നത്.
കഥകളിയുടെ ശാസ്ത്രീയ ആഢ്യത്തവും സമകാലീന നൃത്തത്തിന്റെ ലാളിത്യവും കൂട്ടിയിണക്കുന്ന ഈ ഫ്യൂഷൻ അവതരണത്തിൽ പൂർണ വേഷത്തിലുള്ള കഥകളി കലാകാരനും ആധുനിക നർത്തകരും ഒരുമിച്ച് വേദി പങ്കിടും.
പാരമ്പര്യം നിശ്ചലമല്ല, അത് പരിണമിക്കുന്ന സൃഷ്ടിപ്രവാഹമാണെന്ന സന്ദേശമാണ് ഈ അവതരണം നൽകുന്നതെന്ന് ക്രാഫ്റ്റ്സ് വില്ലേജ് ചീഫ് ഓപ്പറേറ്റിംഗ് ഓഫീസർ ടി.യു. ശ്രീപ്രസാദ് പറഞ്ഞു.
മാർച്ച് 7-ന് ഹോളിയോടനുബന്ധിച്ച് ‘രംഗോത്സവ് 2026’ അരങ്ങേറും. ലൈവ് ഡിജെ, ഡോൾ മേളം, ലേസർ ദർബുക എന്നിവയുടെ താളത്തിൽ ആധുനിക സംഗീതവും പരമ്പരാഗത ചുവടുകളും ഒന്നിക്കുന്ന ആഘോഷമാകും ഇത്.
ഫോം പാർട്ടി, റെയിൻ ഡാൻസ്, സെൽഫി പോയിന്റുകൾ, ഗെയിമുകൾ, വൈവിധ്യമാർന്ന ഭക്ഷണ സ്റ്റാളുകൾ എന്നിവയും ഒരുക്കിയിട്ടുണ്ട്. പരിസ്ഥിതി സൗഹൃദ ഹെർബൽ നിറങ്ങൾ മാത്രമേ ഉപയോഗിക്കൂ എന്നും സംഘാടകർ അറിയിച്ചു.
മാർച്ച് 8-ന് അന്താരാഷ്ട്ര വനിതാദിനാഘോഷങ്ങളുടെ ഭാഗമായി രാജാ രവിവർമ്മയുടെ ചിത്രങ്ങളെ ആസ്പദമാക്കിയ ബൃഹത്തായ തിയേറ്റർ നൃത്താവിഷ്കാരമാണ് സമാപന പരിപാടി.
‘A Galaxy of Musicians’ എന്ന പ്രശസ്ത ചിത്രത്തെ ആധാരമാക്കി ഒരുക്കുന്ന അവതരണം ഭാരതീയ സ്ത്രീത്വത്തിന്റെ വൈവിധ്യഭാവങ്ങളും ദേശീയ ഐക്യത്തിന്റെ സന്ദേശവും വേദിയിൽ പുനർസൃഷ്ടിക്കും.
വസ്ത്രലാവണ്യവും ചടുലമായ നൃത്തചുവടുകളും ചേർന്ന് വനിതാദിനത്തിന് യോജിച്ച കലാസമർപ്പണമായി ഇത് മാറുമെന്ന് സംഘാടകർ വ്യക്തമാക്കി.
കലയും ആഘോഷവും ഒന്നിക്കുന്ന ഈ വാരാഘോഷം കുടുംബങ്ങൾക്കും യുവാക്കൾക്കും ഒരുപോലെ ആസ്വദിക്കാവുന്ന അനുഭവമാകും.
ENGLISH SUMMARY
Kerala Arts and Crafts Village (KACV) in Kovalam is hosting ‘WOW’ Women’s Week from March 6–8 to mark International Women’s Day. The celebrations include a Kathakali–contemporary dance fusion, Holi festival ‘Rangotsav 2026’ with live music and eco-friendly colors, and a grand dance tribute inspired by Raja Ravi Varma’s painting A Galaxy of Musicians.
