മുംബൈ: ഐപിഎൽ കാണാൻ എത്തിയ ചീഫ് ജുഡീഷ്യൽ മജിസ്ട്രേറ്റിന് നഷ്ടമായത് ഐഫോൺ. മുംബൈയിലെ വാങ്കഡെ സ്റ്റേഡിയത്തിൽ കുടുംബത്തോടൊപ്പം ഐപിഎൽ മത്സരം കാണുന്നതിനിടെ ചീഫ് ജുഡീഷ്യൽ മജിസ്‌ട്രേറ്റിന്‍റെ ഐ ഫോണ്‍ മോഷണം പോകുകയായിരുന്നെന്ന് പൊലീസ് പറഞ്ഞ.
മുംബൈ ഇന്ത്യൻസും സൺറൈസേഴ്സ് ഹൈദരാബാദും തമ്മിലുള്ള മത്സരം കാണാനാണ് ജഡ്ജിയും കുടുംബവും വാങ്കഡെ സ്റ്റേഡിയത്തിൽ എത്തിയത്.
വ്യാഴാഴ്ച വൈകുന്നേരം സൗത്ത് മുംബൈയിലെ ഒരു കോടതിയിലെ ചീഫ് ജുഡീഷ്യൽ മജിസ്‌ട്രേറ്റ് ഭാര്യ, മകൻ, മറ്റ് ബന്ധുക്കൾ എന്നിവരോടൊപ്പം മുംബൈ ഇന്ത്യൻസും സൺറൈസേഴ്സ് ഹൈദരാബാദും തമ്മിലുള്ള മത്സരം കാണാൻ സ്റ്റേഡിയത്തിലേക്ക് പ്രവേശിക്കുമ്പോളാണ് സംഭവം നടന്നതെന്ന് പൊലീസ് പറഞ്ഞു.
തിക്കിനും തിരക്കിനുമിടയിൽ ആരോ അദ്ദേഹത്തിന്‍റെ ഐഫോൺ 14 മോഷ്ടിച്ചുവെന്നാണ് വിവരം. ഫോൺ നഷ്ടപ്പെട്ടതായി മനസിലായതിന് ശേഷം അദ്ദേഹം പോലീസിന്ഓൺലൈനിൽ പരാതി നൽകുകയായിരുന്നു. തുടർന്ന് മറൈൻ ഡ്രൈവ് പൊലീസ് സ്റ്റേഷനിൽ മോഷണക്കേസ് രജിസ്റ്റർ ചെയ്തു. അന്വേഷണം പുരോഗമിക്കുകയാണെന്നും പൊലീസ് പറഞ്ഞു.
