വിഴിഞ്ഞം ലോകത്തിന്റെ ഷിപ്പിങ് ഹബ്ബാകുന്നു;പൈലിങ്ങിന്റെ സ്വിച്ച്ഓണ്‍ നിര്‍വഹിച്ച് മുഖ്യമന്ത്രി, രണ്ടാംഘട്ട നിര്‍മാണത്തിന് തുടക്കം

തിരുവനന്തപുരം: കേരളത്തിന്റെ സാമ്പത്തിക അടിത്തറ മാറ്റിയെഴുതാൻ പോകുന്ന വിഴിഞ്ഞം രാജ്യാന്തര തുറമുഖം രണ്ടാം ഘട്ട വികസനത്തിലേക്ക്.

പതിനായിരം കോടി രൂപയുടെ ബൃഹദ് വികസന പദ്ധതികൾക്ക് മുഖ്യമന്ത്രി പിണറായി വിജയൻ തുടക്കം കുറിച്ചു.

ശനിയാഴ്ച വൈകിട്ട് വിഴിഞ്ഞത്ത് നടന്ന പ്രൗഢഗംഭീരമായ ചടങ്ങിൽ പൈലിങ് പ്രവർത്തനങ്ങളുടെ സ്വിച്ച് ഓൺ കർമ്മം മുഖ്യമന്ത്രി നിർവഹിച്ചു.

കേന്ദ്ര ഷിപ്പിങ് മന്ത്രി സർവാനന്ദ സൊനോവാൾ മുഖ്യാതിഥിയായ ചടങ്ങിൽ അദാനി ഗ്രൂപ്പ് എം.ഡി കരണ്‍ അദാനി ഉൾപ്പെടെയുള്ള പ്രമുഖർ സന്നിഹിതരായിരുന്നു.

ഇന്ത്യൻ തീരത്തെ ഏറ്റവും വലിയ ബെർത്ത് വരുന്നു: ഒരേസമയം നാല് കൂറ്റൻ മദർഷിപ്പുകളെ സ്വീകരിക്കാൻ വിഴിഞ്ഞം സജ്ജം

രണ്ടാം ഘട്ട വികസനത്തിന്റെ ഏറ്റവും വലിയ ആകർഷണം തുറമുഖത്തിന്റെ ബെർത്ത് വികസനമാണ്.

നിലവിലുള്ള 800 മീറ്റർ ബെർത്ത് 2000 മീറ്ററായി നീട്ടുന്നതോടെ, രാജ്യത്തെ ഏറ്റവും നീളം കൂടിയ കണ്ടെയ്‌നർ ബെർത്ത് എന്ന റെക്കോർഡ് വിഴിഞ്ഞത്തിന് സ്വന്തമാകും.

ഇതോടെ ലോകത്തിലെ ഏറ്റവും വലിയ ചരക്കുകപ്പലുകളായ നാല് മദർഷിപ്പുകൾക്ക് ഒരേസമയം ഇവിടെ അടുക്കാൻ സാധിക്കും.

15 ലക്ഷം ടിഇയുവിൽ നിന്ന് 50 ലക്ഷം ടിഇയുവിലേക്ക് ചരക്കുനീക്ക ശേഷി ഉയർത്താനാണ് ലക്ഷ്യമിടുന്നത്.

ഭൂമി ഏറ്റെടുക്കലില്ലാതെ വൻ വികസനം: 50 ഹെക്ടർ കടൽ നികത്തി നിർമ്മിക്കുന്ന അത്യാധുനിക ടെർമിനലുകൾ

തുടർ വികസനത്തിനായി പുതിയതായി ഭൂമി ഏറ്റെടുക്കാതെ തന്നെ പദ്ധതി പൂർത്തിയാക്കുന്നു എന്നതാണ് രണ്ടാം ഘട്ടത്തിന്റെ പ്രത്യേകത.

50 ഹെക്ടറോളം കടൽ നികത്തി റെയിൽവേ യാർഡ്, മൾട്ടി പർപ്പസ് ബെർത്ത്, ലിക്വിഡ് ടെർമിനൽ, ടാങ്ക് ഫാം എന്നിവ സജ്ജമാക്കും.

കൂടാതെ, 2.96 കിലോമീറ്റർ നീളമുള്ള പുലിമുട്ട് 3.88 കിലോമീറ്ററായി വർദ്ധിപ്പിക്കും.

പുലർച്ചെ 3 മണിക്ക് പത്രക്കെട്ടുകൾ തരംതിരിക്കുന്നതിനിടെ പത്രവിതരണക്കാരനെ വെട്ടിപ്പരിക്കേൽപിച്ചു; ഇടത് തള്ളവിരൽ പൂർണ്ണമായും അറ്റുപോയി

2028-ൽ ഈ നിർമ്മാണ പ്രവർത്തനങ്ങൾ പൂർത്തിയാകുന്നതോടെ വിഴിഞ്ഞം ലോകത്തിലെ തന്നെ മുൻനിര ട്രാൻസ്ഷിപ്പ്മെന്റ് ഹബ്ബായി മാറും.

കയറ്റുമതി-ഇറക്കുമതി മേഖലയിൽ വൻ കുതിപ്പ്: എക്സിം കാർഗോ സേവനങ്ങളും പുതിയ ഹൈവേ റോഡും തുറന്നു

തുറമുഖത്തെ ദേശീയപാതയുമായി ബന്ധിപ്പിക്കുന്ന പുതിയ പോർട്ട് റോഡിന്റെ ഉദ്ഘാടനവും മുഖ്യമന്ത്രി ചടങ്ങിൽ നിർവഹിച്ചു.

ഇതോടൊപ്പം കേരളത്തിലെ വ്യാപാരികൾക്കും വ്യവസായികൾക്കും വലിയ ആശ്വാസമാകുന്ന എക്സിം (EXIM) കാർഗോ സേവനങ്ങളും പ്രവർത്തനമാരംഭിച്ചു.

തുറമുഖം വഴി നേരിട്ട് ചരക്കുകൾ കയറ്റി അയക്കാനും ഇറക്കുമതി ചെയ്യാനും സാധിക്കുന്നതോടെ ചെലവും സമയവും ഗണ്യമായി കുറയും.

ഇത് കേരളത്തിന്റെ വ്യാവസായിക മേഖലയ്ക്ക് പുതിയ ഉണർവ് നൽകും.

English Summary:

CM Pinarayi Vijayan has inaugurated the ₹10,000 crore second phase of the Vizhinjam International Seaport. This expansion will increase the port’s capacity to 50 lakh TEUs annually and create India’s longest 2000-meter container berth. The project, involving 50 hectares of land reclamation and an extended breakwater, is set for completion by 2028.