തിരുവനന്തപുരം: നാടിനെ നടുക്കിയ വെഞ്ഞാറമൂട് കൂട്ടക്കൊലപാതക കേസിൽ പരിക്കേറ്റ ഷെമിയുടെ ആരോഗ്യസ്ഥിതി മെച്ചപ്പെട്ടെന്ന് ഡോക്ടര്മാര്. എന്നാൽ ഷെമി പൂര്ണ്ണമായും അപകടനില തരണം ചെയ്തെന്ന് പറയാന് കഴിയില്ലെന്നും പൊലീസിന് മൊഴി നല്കാന് കഴിയുന്ന ആരോഗ്യാവസ്ഥയിലാണെന്നും ഡോക്ടര്മാര് അറിയിച്ചു. സംസാരിച്ചപ്പോള് ബന്ധുക്കളെ അന്വേഷിച്ചെന്നും ചികിത്സിക്കുന്ന ഡോക്ടര് പറഞ്ഞു.
ഷെമിയുടെ തലയില് മുറിവുകളുണ്ട്. എന്നാല് ചുറ്റിക കൊണ്ട് അടിച്ചതാണോയെന്ന് പറയാന് സാധിക്കില്ല. കഴുത്തില് ചെറിയ തോതിലുള്ള നിറവ്യത്യാസം ഉണ്ട് എന്നും ഡോക്ടർമാർ പ്രതികരിച്ചു.
പ്രതി അഫാന്റെ ആക്രമണത്തില് നിന്നും രക്ഷപ്പെട്ടത് ഉമ്മ ഷെമി മാത്രമായിരുന്നു. അര്ബുദ രോഗിയായ ഉമ്മ മരിച്ചെന്നായിരുന്നു അഫാന് കരുതിയിരുന്നത്. എന്നാല് പൊലീസ് വീട്ടിലെത്തിയപ്പോള് ഷെമീന് ജീവനുണ്ടെന്ന് കണ്ടെത്തുകയായിരുന്നു.
