എംഎൽഎമാർക്ക് ഓഫിസ് വാടകയ്ക്കായി മാസം 25,000 രൂപ; അതിവേഗ വിവരാവകാശ രേഖ പുറത്ത്
തിരുവനന്തപുരം: വട്ടിയൂർക്കാവിൽ എംഎൽഎ ഓഫിസ് പ്രവർത്തിക്കുന്ന കെട്ടിടത്തെച്ചൊല്ലി വി.കെ. പ്രശാന്തും സാമൂഹ്യ പ്രവർത്തക ശ്രീലേഖയും തമ്മിലുള്ള തർക്കം ശക്തമായതിനിടെ, എംഎൽഎ ഓഫിസ് അലവൻസുമായി ബന്ധപ്പെട്ട് സമൂഹമാധ്യമങ്ങളിൽ പ്രചരിച്ച ആരോപണങ്ങൾക്ക് വ്യക്തത നൽകുന്ന രേഖകൾ പുറത്തുവന്നു.
എംഎൽഎമാർക്ക് ഓഫിസ് വാടകയ്ക്കായി മാസം 25,000 രൂപ ലഭിക്കുന്നുണ്ടെന്നും വി.കെ. പ്രശാന്ത് വാടകയായി 872 രൂപ മാത്രമാണ് നൽകുന്നതെന്നുമായിരുന്നു സമൂഹമാധ്യമങ്ങളിൽ വ്യാപകമായി പ്രചരിച്ച ആരോപണം.
ഈ പ്രചാരണം നിഷേധിച്ച് വി.കെ. പ്രശാന്ത് നേരത്തെ രംഗത്തെത്തിയിരുന്നെങ്കിലും വിവാദം അവസാനിച്ചിരുന്നില്ല. ഇപ്പോഴിതാ, വിവരാവകാശ നിയമപ്രകാരം നിയമസഭാ സെക്രട്ടേറിയറ്റ് നൽകിയ മറുപടിയാണ് വിഷയത്തിൽ വ്യക്തത വരുത്തുന്നത്.
കെ. ശ്രീകുമാർ എന്ന വ്യക്തി ഡിസംബർ 29ന് നൽകിയ വിവരാവകാശ അപേക്ഷയ്ക്ക്, ഒറ്റ ദിവസത്തിനകം നിയമസഭാ സെക്രട്ടേറിയറ്റ് മറുപടി നൽകിയിരുന്നു.
വട്ടിയൂർക്കാവ് എംഎൽഎയ്ക്ക് മണ്ഡലത്തിൽ ഓഫിസ് നടത്തുന്നതിനായി വാടക ഇനത്തിൽ 25,000 രൂപ നൽകുന്നുണ്ടോ എന്ന ചോദ്യത്തിനാണ് മറുപടി നൽകിയത്.
നിയമസഭാ സെക്രട്ടേറിയറ്റ് വ്യക്തമാക്കുന്നത്, എംഎൽഎമാർക്ക് ഓഫിസ് വാടകയ്ക്കായി പ്രത്യേക തുകയൊന്നും നൽകുന്നില്ലെന്നാണ്. പകരം, എല്ലാ സാമാജികർക്കും മാസം 25,000 രൂപ വീതം മണ്ഡലം അലവൻസായാണ് അനുവദിക്കുന്നത്.
ഈ തുക എല്ലാ എംഎൽഎമാർക്കും ഒരുപോലെ ലഭിക്കുന്നതാണെന്നും രേഖയിൽ വ്യക്തമാക്കുന്നു.
ഈ വിവാദത്തിന്റെ പശ്ചാത്തലത്തിൽ, മുൻ എംഎൽഎമാരെ അടക്കം ബന്ധപ്പെട്ട് മനോരമ ഓൺലൈൻ നേരത്തേ തന്നെ വിശദീകരണം തേടിയിരുന്നു.
ആദ്യകാലങ്ങളിൽ മണ്ഡലങ്ങളിൽ പ്രത്യേക എംഎൽഎ ഓഫിസുകൾ ഉണ്ടായിരുന്നില്ലെന്നും, ഭൂരിഭാഗം ജനപ്രതിനിധികളും സ്വന്തം വീടുകളെയോ പാർട്ടി ഓഫിസുകളെയോ ആശ്രയിച്ചാണ് ജനങ്ങളുമായി ബന്ധം പുലർത്തിയിരുന്നതെന്നും അവർ വ്യക്തമാക്കി.
മണ്ഡലത്തിനു പുറത്തു താമസിക്കുന്ന എംഎൽഎമാരാണ് പിന്നീട് ജനങ്ങളെ കാണുന്നതിനായി പ്രത്യേക എംഎൽഎ ഓഫിസ് എന്ന സംവിധാനം ആരംഭിച്ചതെന്ന് രാഷ്ട്രീയ നിരീക്ഷകനും കോൺഗ്രസ് നേതാവുമായ ചെറിയാൻ ഫിലിപ്പ് അഭിപ്രായപ്പെട്ടു.
English Summary
The Kerala Legislative Secretariat has clarified that MLAs do not receive a separate office rent allowance. Instead, all MLAs are given a uniform constituency allowance of ₹25,000 per month. This clarification comes amid social media claims related to the Vattiyoorkavu MLA office dispute involving VK Prasanth, where it was alleged that rent payments were subsidized.
vattiyoorkavu-mla-office-controversy-allowance-clarification
Vattiyoorkavu, VK Prasanth, MLA office controversy, Kerala Assembly, constituency allowance, RTI reply, political controversy
