11 സുപ്രധാന വിസ മാറ്റങ്ങളുമായി യു.എ.ഇ
ലോകോത്തര പ്രതിഭകളെയും വൻ നിക്ഷേപങ്ങളെയും രാജ്യത്തേക്ക് കൂടുതൽ ആകർഷിക്കാനുള്ള ദീർഘകാല ദർശനത്തിന്റെ ഭാഗമായാണ് യുഎഇ അധികൃതർ വീസ നിയമങ്ങളിൽ ചരിത്രപരമായ മാറ്റങ്ങൾ നടപ്പാക്കിയിരിക്കുന്നത്.
പ്രവാസികൾക്കും നിക്ഷേപകർക്കും സംരംഭകർക്കും അനുകൂലമായ അന്തരീക്ഷം സൃഷ്ടിക്കുന്ന ഈ പരിഷ്കാരങ്ങൾ, 2025ൽ മാത്രം ഗോൾഡൻ വീസ, സന്ദർശക വീസ തുടങ്ങിയ വിഭാഗങ്ങളിലായി കൊണ്ടുവന്ന 11 പ്രധാന മാറ്റങ്ങളിലൂടെ വ്യക്തമായി കാണാം.
ഈ തീരുമാനങ്ങൾ ലക്ഷക്കണക്കിന് പ്രവാസികളുടെ ജീവിതത്തെയും തൊഴിൽ സാധ്യതകളെയും നേരിട്ട് സ്വാധീനിക്കുന്നതാണ്.
സന്ദർശക വീസ വിഭാഗത്തിൽ നാല് പുതിയ കാറ്റഗറികൾ അവതരിപ്പിച്ചിരിക്കുന്നത് വലിയ ശ്രദ്ധ നേടുന്നു. നിർമിത ബുദ്ധി, വിനോദമേഖല, അന്താരാഷ്ട്ര ഇവന്റുകൾ, ആഡംബരക്കപ്പൽ യാത്രകൾ എന്നീ മേഖലകളിൽ പ്രവർത്തിക്കുന്ന വിദഗ്ദ്ധർക്കായാണ് പുതിയ വീസകൾ.
പ്രത്യേകിച്ച് എഐ രംഗത്ത് പ്രവർത്തിക്കുന്ന പ്രൊഫഷണലുകൾക്ക് സിംഗിൾ എൻട്രിയും മൾട്ടിപ്പിൾ എൻട്രിയുമുള്ള പെർമിറ്റുകൾ അനുവദിച്ചതിലൂടെ യുഎഇ സാങ്കേതിക രംഗത്ത് കൂടുതൽ കരുത്താർജിക്കുകയാണ്.
ഇന്ത്യൻ പൗരന്മാർക്കുള്ള വീസ ഓൺ അറൈവൽ സൗകര്യങ്ങളും കൂടുതൽ വിപുലമാക്കി. നിലവിൽ യുഎസ്, യൂറോപ്യൻ യൂണിയൻ, യുകെ എന്നിവിടങ്ങളിലെ സാധുവായ വീസയോ റസിഡൻസ് പെർമിറ്റോ ഉള്ള ഇന്ത്യക്കാർക്ക് ലഭിച്ചിരുന്ന ഈ ആനുകൂല്യം ഇനി കൂടുതൽ രാജ്യങ്ങളിലേക്ക് വ്യാപിപ്പിച്ചു.
ഓസ്ട്രേലിയ, കാനഡ, ജപ്പാൻ, ന്യൂസീലൻഡ്, റിപ്പബ്ലിക് ഓഫ് കൊറിയ, സിംഗപ്പൂർ എന്നിവിടങ്ങളിലെ സാധുവായ റസിഡൻസ് പെർമിറ്റുള്ള ഇന്ത്യക്കാർക്കും ഇനി യുഎഇയിൽ എത്തുമ്പോൾ വീസ ഓൺ അറൈവൽ ലഭിക്കും. ഇത് യാത്രയും തൊഴിൽ അവസരങ്ങളും കൂടുതൽ ലളിതമാക്കും.
പാക്കിസ്ഥാൻ പൗരന്മാർക്കായി അഞ്ച് വർഷത്തെ മൾട്ടിപ്പിൾ എൻട്രി ടൂറിസ്റ്റ് വീസ പ്രഖ്യാപിച്ചതും ശ്രദ്ധേയമാണ്. സ്പോൺസറോ ഹോസ്റ്റോ ഇല്ലാതെ തന്നെ നിരവധി തവണ യുഎഇ സന്ദർശിക്കാൻ ഈ വീസ അനുവദിക്കുന്നു.
വ്യാപാര ആവശ്യങ്ങൾക്കും കുടുംബസന്ദർശനങ്ങൾക്കും വിനോദയാത്രകൾക്കും ഇത് വലിയ ആശ്വാസമാകും.
എൻട്രി പെർമിറ്റിനുള്ള അപേക്ഷകളിലും പുതിയ നിബന്ധനകൾ ഏർപ്പെടുത്തി. സെപ്റ്റംബർ മുതൽ അപേക്ഷ സമർപ്പിക്കുമ്പോൾ പാസ്പോർട്ടിന്റെ പുറം കവർ പേജിന്റെ കോപ്പി നിർബന്ധമാക്കി. രേഖകളുടെ പരിശോധന കൂടുതൽ കാര്യക്ഷമമാക്കുകയാണ് ഇതിന്റെ ലക്ഷ്യം.
സുഹൃത്തുക്കളെയോ ബന്ധുക്കളെയോ സന്ദർശക വീസയിൽ യുഎഇയിലേക്ക് സ്പോൺസർ ചെയ്യുന്നതിനും പുതിയ ശമ്പള മാനദണ്ഡങ്ങൾ നിലവിൽ വന്നു.
റസിഡൻസി വീസയുള്ളവർക്ക് ബന്ധത്തിന്റെ അടുത്തതനുസരിച്ച് 4,000, 8,000, 15,000 ദിർഹം എന്നിങ്ങനെ കുറഞ്ഞ പ്രതിമാസ ശമ്പളം നിർബന്ധമാക്കിയിട്ടുണ്ട്.
ഇത് സ്പോൺസറിംഗ് പ്രക്രിയയിൽ കൂടുതൽ വ്യക്തതയും ഉത്തരവാദിത്തവും ഉറപ്പാക്കും. ദുബായിൽ താമസിക്കുന്നവർക്കായി മറ്റൊരു പ്രധാന മാറ്റം ട്രാഫിക് പിഴകളുമായി ബന്ധപ്പെട്ടതാണ്.
ഇനി താമസ വീസ പുതുക്കുന്നതിന് മുമ്പ് കുടിശ്ശികയുള്ള ട്രാഫിക് പിഴകൾ അടച്ചുതീർക്കണം.
വീസ പുതുക്കൽ നടപടികളുമായി ട്രാഫിക് പിഴകൾ ബന്ധിപ്പിച്ചുകൊണ്ട് പൈലറ്റ് സംവിധാനം നടപ്പാക്കിയതോടെ നിയമലംഘനങ്ങൾ കുറയ്ക്കാനാണ് അധികൃതരുടെ ലക്ഷ്യം.
11 സുപ്രധാന വിസ മാറ്റങ്ങളുമായി യു.എ.ഇ
പരിസ്ഥിതി സംരക്ഷണ രംഗത്ത് അസാധാരണ സംഭാവനകൾ നൽകിയവർക്കായി ‘ബ്ലൂ റസിഡൻസി’ എന്ന 10 വർഷത്തെ പുതിയ വീസയും യുഎഇ അവതരിപ്പിച്ചു.
പരിസ്ഥിതി പ്രവർത്തകരെയും ഗവേഷകരെയും രാജ്യത്തേക്ക് ആകർഷിക്കാനാണ് ഈ നീക്കം. വിദേശത്തുനിന്ന് അപേക്ഷിക്കുന്നവർക്ക് 180 ദിവസത്തെ മൾട്ടിപ്പിൾ എൻട്രി പെർമിറ്റും അനുവദിക്കും.
ആരോഗ്യ മേഖലയിലെ സേവനങ്ങൾക്കുള്ള അംഗീകാരമായി നഴ്സുമാർക്കും പ്രത്യേക പരിഗണന ലഭിച്ചു. ദുബായ് ഹെൽത്തിന്റെ കീഴിൽ 15 വർഷത്തിലധികം സേവനം അനുഷ്ഠിച്ച നഴ്സുമാർക്ക് ഗോൾഡൻ വീസ നൽകാൻ തീരുമാനിച്ചു.
ഇത് ആരോഗ്യ രംഗത്തെ പ്രൊഫഷണലുകൾക്ക് വലിയ പ്രോത്സാഹനമാണ്.
ഡിജിറ്റൽ ലോകത്ത് പ്രവർത്തിക്കുന്ന കണ്ടന്റ് ക്രിയേറ്റർമാർക്കും ഇനി ഗോൾഡൻ വീസ ലഭിക്കും. സോഷ്യൽ മീഡിയ ഇൻഫ്ലുവൻസർമാർ, പോഡ്കാസ്റ്റർമാർ, ഡിജിറ്റൽ കണ്ടന്റ് നിർമ്മാതാക്കൾ
തുടങ്ങിയവർക്ക് ‘ക്രിയേറ്റേഴ്സ് എച്ച് ക്യു’ പ്ലാറ്റ്ഫോം വഴിയാണ് അപേക്ഷ നൽകേണ്ടത്. ഇതിലൂടെ സൃഷ്ടിപരമായ മേഖലകൾക്ക് യുഎഇ കൂടുതൽ പിന്തുണ നൽകുന്നു.
മാനുഷിക പ്രവർത്തനങ്ങൾക്ക് ധനസഹായം നൽകുന്ന വഖഫ് ദാതാക്കളെയും ഗോൾഡൻ വീസ വിഭാഗത്തിൽ ഉൾപ്പെടുത്തി.
ചാരിറ്റബിൾ ട്രസ്റ്റുകൾക്ക് സംഭാവന നൽകുന്നവർക്കും ഇതുവഴി ദീർഘകാല താമസാവകാശം ലഭിക്കും.
കൂടാതെ ഗോൾഡൻ വീസ ഉടമകൾക്കായി വിദേശകാര്യ മന്ത്രാലയം പ്രത്യേക കോൺസുലാർ സേവനങ്ങളും പ്രഖ്യാപിച്ചിട്ടുണ്ട്.
അടിയന്തര സാഹചര്യങ്ങളിൽ സഹായം, ദുരന്തസമയങ്ങളിൽ ഒഴിപ്പിക്കൽ, വിദേശത്ത് മരണപ്പെട്ടാൽ മൃതദേഹം സ്വദേശത്തേക്ക് എത്തിക്കുന്നതിനുള്ള സഹായം എന്നിവ ഇതിൽ ഉൾപ്പെടുന്നു.
