കട്ടു മുടിക്കുന്നത് കണ്ടു മനം മടുത്തു, ഇനി മോദി സർക്കാരിന്റെ വികസന കാഴ്ചപ്പാടിനൊപ്പം : സാബു എം ജേക്കബ്

കട്ടു മുടിക്കുന്നത് കണ്ടു മനം മടുത്തു, ഇനി മോദി സർക്കാരിന്റെ വികസന കാഴ്ചപ്പാടിനൊപ്പം : സാബു എം ജേക്കബ്

തിരുവനന്തപുരം: എൻഡിഎയിൽ ചേരാനുള്ള തീരുമാനം ട്വന്റി ട്വന്റി പാർട്ടിയെ സംബന്ധിച്ച് ഏറ്റവും നിർണായകമായ തീരുമാനമാണെന്ന് കൺവീനർ സാബു എം. ജേക്കബ് വ്യക്തമാക്കി. 

ഏറെ ആലോചനകൾക്കുശേഷമാണ് ഈ തീരുമാനമെടുത്തതെന്ന് അദ്ദേഹം പറഞ്ഞു. താൻ ഒരു രാഷ്ട്രീയക്കാരനല്ല, ഒരു വ്യവസായിയാണെന്നും, എൽഡിഎഫും യുഡിഎഫും മാറിമാറി ഭരിച്ച് കേരളത്തെ നശിപ്പിക്കുന്ന അവസ്ഥ കണ്ട് മാറ്റം വേണമെന്ന ആഗ്രഹത്തിലാണ് രാഷ്ട്രീയത്തിലേക്ക് കടന്നതെന്നും സാബു എം. ജേക്കബ് വിശദീകരിച്ചു.

അങ്ങനെയാണ് ട്വന്റി ട്വന്റി പാർട്ടിക്ക് രൂപം നൽകിയത്. കഴിഞ്ഞ 14 വർഷമായി കേരളത്തിന്റെ വികസനത്തിനും ജനങ്ങളുടെ ക്ഷേമത്തിനുമായി നിരവധി മാതൃകാപരമായ പദ്ധതികൾ നടപ്പാക്കിയിട്ടുണ്ട്. 

ഇതിൽ ഏറ്റവും ശ്രദ്ധേയമായത് ഭക്ഷ്യസുരക്ഷാ മാർക്കറ്റുകളാണെന്നും അദ്ദേഹം പറഞ്ഞു. വിലക്കയറ്റം നിയന്ത്രിക്കുമെന്ന വാഗ്ദാനത്തോടെയാണ് പിണറായി സർക്കാർ അധികാരത്തിലെത്തിയതെങ്കിലും, യാഥാർത്ഥ്യത്തിൽ വില മൂന്നും നാലും ഇരട്ടിയായി ഉയർന്നുവെന്നും സാധാരണക്കാർക്ക് ജീവിക്കാൻ പോലും കഴിയാത്ത സാഹചര്യമാണെന്നും അദ്ദേഹം വിമർശിച്ചു.

ഒറ്റയ്ക്ക് നിന്നാൽ നിലവിലെ അവസ്ഥ മാറ്റിയെടുക്കാൻ കഴിയുമോ എന്ന ആശങ്ക പാർട്ടിക്കുണ്ടായിരുന്നുവെന്നും സാബു എം. ജേക്കബ് പറഞ്ഞു. 

ട്വന്റി ട്വന്റിയുടെ വളർച്ച തടയുക എന്ന ലക്ഷ്യത്തോടെ എൽഡിഎഫ്, യുഡിഎഫ്, വെൽഫെയർ പാർട്ടി, എസ്ഡിപിഐ എന്നിവ ഉൾപ്പെടെ 25 പാർട്ടികൾ ചേർന്ന് ഒരു ജനകീയ മുന്നണി രൂപീകരിച്ച് ഒറ്റ സ്ഥാനാർഥിയെ നിർത്തി ട്വന്റി ട്വന്റിയെ നേരിട്ട സംഭവമാണ് പാർട്ടിയെ പുനർചിന്തനത്തിലേക്ക് നയിച്ചതെന്നും അദ്ദേഹം വ്യക്തമാക്കി.

ഈ സാഹചര്യത്തിലാണ് എൻഡിഎയോടൊപ്പം ചേരാനുള്ള തീരുമാനം കൈക്കൊണ്ടത്. 

മോദി സർക്കാരിന്റെ വികസന കാഴ്ചപ്പാടിനൊപ്പം നിന്നുകൊണ്ട് കേരളത്തെ മാറ്റിയെടുക്കാനുള്ള ദൗത്യം ഏറ്റെടുക്കുകയാണെന്നും, നിലവിലെ നില തുടർന്നാൽ കേരളം എന്ന സംസ്ഥാനം തന്നെ അപകടത്തിലാകുമെന്നും സാബു എം. ജേക്കബ് മുന്നറിയിപ്പ് നൽകി. 

യുവാക്കളും കുട്ടികളും നാടുവിട്ട് പോകുന്ന പ്രവണത മാറ്റി, വികസിത കേരളം യാഥാർത്ഥ്യമാക്കുകയാണ് ട്വന്റി ട്വന്റിയുടെ ലക്ഷ്യമെന്നും അദ്ദേഹം കൂട്ടിച്ചേർത്തു.

English Summary

Twenty Twenty convener Sabu M. Jacob said that joining the NDA is the most crucial decision in the party’s history, taken after careful consideration. He stated that dissatisfaction with the governance of both LDF and UDF prompted him to enter politics to bring change. Citing rising prices, challenges faced by common people, and political isolation, he said aligning with the NDA and the Modi government’s development vision is aimed at transforming Kerala into a developed state.

twenty-twenty-joining-nda-crucial-decision-sabu-m-jacob

Twenty Twenty, NDA, Sabu M Jacob, Kerala Politics, BJP, LDF, UDF, Development Politics, Kizhakkambalam