റഷ്യയ്ക്ക്അന്ത്യശാസനവുമായി ഡൊണാൾഡ് ട്രംപ്
വാഷിംഗ്ടൺ ∶ 12 ദിവസത്തിനുള്ളിൽ യുക്രൈനുമായി സമാധാന കരാറിൽ എത്തിയില്ലെങ്കിൽ റഷ്യക്കുമേൽ പുതിയ ഉപരോധങ്ങൾ ഏർപ്പെടുത്തുമെന്ന് ഡൊണാൾഡ് ട്രംപിന്റെ അന്ത്യശാസനം. ബ്രിട്ടീഷ് പ്രധാനമന്ത്രിയുമായുള്ള കൂടിക്കാഴ്ചക്കിടെയാണ് ട്രംപ് മാധ്യമങ്ങളോട് ഇക്കാര്യം അറിയിച്ചത്. 50 ദിവസത്തിനകം യുദ്ധം അവസാനിപ്പിക്കണമെന്ന് ഈ മാസം ആദ്യം ട്രംപ് ആവശ്യപ്പെട്ടിരുന്നു.
ഈ മാസം ആദ്യം തന്നെ 50 ദിവസത്തിനകം യുദ്ധം അവസാനിപ്പിക്കണമെന്നായിരുന്നു ട്രംപിന്റെ ആവശ്യം. എന്നാൽ പുരോഗതി ഒന്നും ഉണ്ടായില്ലെന്ന് ചൂണ്ടിക്കാട്ടി, “ഇന്ന് ഞാൻ പുതിയൊരു സമയപരിധി നിശ്ചയിക്കുകയാണ്. ഇന്നുമുതൽ 10–12 ദിവസത്തിനകം യുദ്ധം അവസാനിപ്പിക്കണം. കൂടുതൽ കാത്തിരിക്കാനാകില്ല” എന്നായിരുന്നു ട്രംപിന്റെ പ്രസ്താവന.
ട്രംപിന്റെ നിലപാടിനെ യുക്രൈൻ പ്രസിഡന്റ് വൊളോദിമിർ സെലൻസ്കി സ്വാഗതം ചെയ്തു. “ജീവൻ രക്ഷിക്കുന്നതിലും, ഈ ഭീകരമായ യുദ്ധം അവസാനിപ്പിക്കുന്നതിലും ശ്രദ്ധ കേന്ദ്രീകരിച്ചതിന് പ്രസിഡന്റിന് നന്ദി. അദ്ദേഹത്തിന്റെ നിലപാട് ശരിയും ദൃഢവുമാണ്,” സെലൻസ്കി പ്രതികരിച്ചു.
അതേസമയം, റഷ്യ ഇതുവരെ ഔദ്യോഗികമായി പ്രതികരിച്ചിട്ടില്ല. എന്നാൽ മുൻ പ്രസിഡന്റ് ദിമിത്രി മെദ്വദേവ് എക്സിലെ (X) ഒരു പോസ്റ്റിൽ, ട്രംപിന്റെ ‘അന്ത്യശാസന പരിപാടി’ അമേരിക്ക തന്നെ യുദ്ധത്തിലേക്ക് വലിച്ചിഴക്കാൻ ഇടയാക്കാമെന്ന് മുന്നറിയിപ്പ് നൽകി.
റഷ്യയിൽ നിന്ന് എണ്ണ വാങ്ങുന്ന രാജ്യങ്ങൾക്ക് മേൽ കടുത്ത തീരുവ ചുമത്തുമെന്നും അമേരിക്ക ഇതിനകം സൂചന നൽകിയിട്ടുണ്ട്. “റഷ്യൻ എണ്ണ വാങ്ങുന്ന ചൈന, ഇന്ത്യ, ബ്രസീൽ തുടങ്ങിയ രാജ്യങ്ങൾ വിലകുറഞ്ഞ എണ്ണയുടെ 80 ശതമാനവും സ്വന്തമാക്കുന്നു. അതാണ് പുടിന്റെ യുദ്ധയന്ത്രത്തിന് ഊർജ്ജം നൽകുന്നത്. അതിനാൽ ട്രംപ് ആ രാജ്യങ്ങൾക്ക് 100 ശതമാനം തീരുവ ചുമത്തും,” യുഎസ് സെനറ്റർ ലിൻഡ്സെ ഗ്രഹാം മുന്നറിയിപ്പ് നൽകി.
English Summary :
Donald Trump gave Russia 12 days to reach a peace deal with Ukraine or face new sanctions. Ukraine praised his stance, while Russia stayed silent.
trump-ultimatum-russia-ukraine-war-12-days-sanctions
Donald Trump ultimatum, Russia Ukraine war, Trump sanctions warning, Ukraine peace deal, Keir Starmer meeting, Zelensky response, Medvedev reaction, US tariffs Russia oil
