പിറന്നാളിന് കേക്ക് മുറിക്കാൻ സമയമില്ല, അയാൻ ഓട്ടത്തിലാണ്! മൂന്നാം വയസ്സിൽ മാരത്തൺ; തളർന്നത് കാണികളും നാട്ടുകാരും
കൊച്ചി ∙ മൂന്നാം പിറന്നാൾ സാധാരണയായി കേക്ക് മുറിച്ചും വർണ്ണാഭമായ പാർട്ടികളിലുമാണ് ആഘോഷിക്കാറ്. എന്നാൽ കാലടി സ്വദേശികളായ ശ്യാം ബാബുവിന്റെയും ആതിരയുടെയും മകൻ അയാൻ തന്റെ ജന്മദിനം വ്യത്യസ്തമായി ആഘോഷിച്ചു.
ഫെഡറൽ ബാങ്ക് കൊച്ചി മാരത്തൺ വേദിയിൽ മൂന്ന് കിലോമീറ്റർ ഓടിയാണ് ഈ കുഞ്ഞ് തന്റെ മൂന്നാം പിറന്നാൾ ഓർമപ്പെടുത്തിയത്.
ഫെബ്രുവരി 8-ന് നടന്ന മാരത്തണിൽ, മൂന്ന് വയസ്സുകാരനായ അയാൻ തളരാതെ മൂന്ന് കിലോമീറ്റർ പിന്നിട്ട് ഫിനിഷിംഗ് ലൈൻ കടന്നു. ട്രാക്കിൽ കുഞ്ഞുപാദങ്ങൾ ആവേശത്തോടെ ചുവടുവെക്കുമ്പോൾ കായികപ്രേമികളുടെ വലിയ കൈയടികളാണ് അവനെ വരവേറ്റത്.
കാണികൾക്ക് മുന്നിൽ അയാൻ വിസ്മയമായി മാറി.
മകന്റെ ശാരീരികക്ഷമതക്കും മാനസിക വളർച്ചക്കും മുൻഗണന നൽകുന്ന അമ്മ ആതിരയുടെ പ്രചോദനമാണ് ഈ നേട്ടത്തിന് പിന്നിൽ.
കുട്ടികളെ അമിത നിയന്ത്രണങ്ങളിൽ പൂട്ടാതെ, അവരുടെ സ്വഭാവിക കഴിവുകൾ കണ്ടെത്താൻ അവസരം നൽകണമെന്നും കായിക വിനോദങ്ങൾ അച്ചടക്കവും ആത്മവിശ്വാസവും വളർത്തുന്നതിൽ പ്രധാനമാണെന്നും അവർ വിശ്വസിക്കുന്നു.
മാരത്തണിന് മുന്നോടിയായി മാസങ്ങളോളം സൈക്ലിംഗും ഓട്ടവും ഉൾപ്പെടുത്തി അയാനെ പരിശീലിപ്പിച്ചു.
വിദേശത്തുള്ള പിതാവ് ശ്യാം ബാബുവിന് നേരിട്ട് സാക്ഷിയാകാൻ കഴിഞ്ഞില്ലെങ്കിലും കുടുംബത്തിന്റെ പൂർണ പിന്തുണയാണ് അയാന്റെ കരുത്ത്.
മൂന്നാം വയസ്സിൽ തന്നെ മാരത്തൺ ട്രാക്കിൽ ചുവടുറപ്പിച്ച അയാൻ, അർത്ഥവത്തായ ആഘോഷങ്ങൾ എങ്ങനെ പ്രചോദനമായി മാറാമെന്ന് തെളിയിച്ചിരിക്കുകയാണ്.
English Summary
Three-year-old Ayaan from Kalady celebrated his birthday in a unique way by completing a 3-kilometre run at the Federal Bank Kochi Marathon on February 8. Instead of a traditional birthday party, he chose the marathon track and successfully crossed the finish line, earning applause from spectators. Guided and trained for months by his mother Athira, who believes in promoting physical fitness and discipline through sports, Ayaan marked his third birthday with this remarkable milestone.
three-year-old-ayaan-3km-run-kochi-marathon-birthday
Ayaan, Kochi Marathon, Birthday Celebration, Child Runner, Kalady, Sports News, Inspirational Story, Parenting, Fitness, Kerala News
