തൊടുപുഴ: മലയാളി യുവാവ് ബെംഗളൂരുവിൽ മരിച്ച സംഭവത്തിൽ ദുരൂഹത ആരോപിച്ച് കുടുംബാംഗങ്ങൾ രംഗത്ത്. കഴിഞ്ഞ ദിവസമാണ് തലയിലേറ്റ മുറിവിനെ തുടർന്ന് തൊടുപുഴ ചിറ്റൂർ സ്വദേശി ലിബിൻ മരിച്ചത്.
കുളിമുറിയിൽ വീണതാണ് തലയിലെ പരിക്കിന് കാരണമെന്നാണ് കൂടെയുണ്ടായിരുന്നവർ വീട്ടുകാരെ വിളിച്ചു പറഞ്ഞത്. എന്നാൽ മുറിവിൽ ആസ്വാഭാവികതയുണ്ടെന്ന് യുവാവിനെ ചികിത്സിച്ച ഡോക്ടർമാർ പറഞ്ഞതായി ലിബിൻ്റെ സഹോദരി പ്രമുഖ മാധ്യമത്തോട് പറഞ്ഞു.
ശനിയാഴ്ച രാത്രിയോടെയാണ് ലിബിന് പരുക്കേറ്റതായി വീട്ടുകാർക്ക് വിവരം ലഭിക്കുന്നത്. ഒപ്പം താമസിച്ചിരുന്നവർ പരസ്പര വിരുദ്ധമായാണ് വിഷയത്തിൽ സംസാരിച്ചിരുന്നതെന്നും, തലയിലെ മുറിന് കുളിമുറിയിൽ വീണപ്പോൾ സംഭവിച്ചത് പോലെയല്ല എന്നാണ് ഡോക്ടർമാർ പറഞ്ഞതെന്നും ലിബിൻ്റെ സഹോദരി പറഞ്ഞു.
ബെംഗളൂരു നിംഹാൻസ് ആശുപത്രിയിൽ ചികിത്സയിലിരിക്കെ ഇന്നലെയാണ് ലിബിന് മസ്തിഷ്കമരണം സംഭവിച്ചത്. സംഭവത്തിൽ ഹെബ്ബ ഗുഡി പൊലീസ് അസ്വാഭാവിക മരണത്തിന് കേസെടുത്തിട്ടുണ്ട്. മരിച്ച ലിബിന്റെ ആന്തരികാവയവങ്ങൾ 8 പേർക്ക് ദാനം ചെയ്തതായി കുടുംബാംഗങ്ങൾ അറിയിച്ചു.
