യൂറോ കപ്പില്‍ ബെല്‍ജിയത്തിനെതിരെ സമനില വഴങ്ങിയ യുക്രൈന്‍ പ്രീ ക്വാര്‍ട്ടര്‍ കാണാതെ പുറത്ത്. Ukraine is out of the pre-quarter
സ്ലൊവാക്യ – റൊമാനിയ മത്സരം സമനില ആയതോടെയാണ് നാലു പോയന്റുണ്ടായിട്ടും യുക്രൈന്‍ പുറത്തായി.
മത്സരത്തിന്റെ ഏഴാം മിനിറ്റില്‍ തന്നെ കെവിന്‍ ഡിബ്രുയ്‌നിലൂടെ ബെല്‍ജിയത്തിന് അവസരം ലഭിച്ചെങ്കിലും പാസ് സ്വീകരിച്ച ലുക്കാക്കുവിന് ലക്ഷ്യം കണ്ടെത്താനായില്ല. യുക്രൈന്‍ ഗോളി അനട്ടോളി ട്രൂബിന്‍ പന്ത് കൈകളിലാക്കി.
42-ാം മിനിറ്റില്‍ ലഭിച്ച അവസരം യുക്രൈനും മുതലാക്കാനായില്ല. ഷപരെങ്കോന്റെ പാസില്‍ യാരെംചുകിന്റെ ക്രോസ് വലയിലെത്തിക്കാന്‍ ആര്‍ട്ടെം ഡൊവ്ബിക്കിന് കഴിഞ്ഞില്ല. ആദ്യപകുതിയിലുടനീളം പന്തിന്മേല്‍ ആധിപത്യം പുലര്‍ത്തിയത് ബെല്‍ജിയമായിരുന്നു.
തോൽക്കുന്ന ടീമുകൾ പുറത്താവുമെന്നിരിക്കെ സ്ലൊവാക്യ-റൊമാനിയ മത്സരം ആവേശകരമായി. റൊമാനിയക്കെതിരെ 21-ാം മിനിറ്റിൽ സ്ലൊവാക്യ ലീഡ് നേടി. ബോക്സിന്റെ മധ്യത്തിൽനിന്ന് ഒന്ദ്രജ് ഡുഡയുടെ ഹെഡ്ഡർ വലതുപോസ്റ്റിന്റെ മൂലയിൽ കയറി. മിഡ് ഫീൽഡർ ജുരാജ് കുകയുടെ ക്രോസിൽ നിന്നായിരുന്നു ഡുഡയുടെ ഹെഡ്ഡർ.
പെനാൽട്ടി ഗോളിലൂടെ 36-ാം മിനിറ്റിൽ റൊമാനിയ തിരിച്ചടിച്ചു. സ്ലൊവാക്യയുടെ ഡേവിഡ് ഹാങ്കൊയുടെ ബോക്സിലെ ഫൗളിനാണ് വാർപരിശോധനയിൽ പെനാൽട്ടി അനുവദിക്കപ്പെട്ടത്.
റസ്വാൻ മാരിൻ പെനാൽട്ടി ലക്ഷ്യത്തിലെത്തിച്ച് ടീമിന് സമനില നൽകി. രണ്ടാം പകുതിയിൽ ഒട്ടേറെ അവസരങ്ങൾ ലഭിച്ചിട്ടും ഇരു ടീമുകൾക്കും സ്കോർ ചലിപ്പിക്കാനായില്ല. റൊമാനിയ 2000-ത്തിനുശേഷം ആദ്യമായാണ് യൂറോ പ്രീക്വാർട്ടറിൽ കടക്കുന്നത്.
യുക്രൈനെതിരെ ബെൽജിയം ഭാഗ്യംകൊണ്ടാണ് ഗോൾവഴങ്ങാതെ രക്ഷപ്പെട്ടത്. മുന്നേറാൻ വിജയം അനിവാര്യമായിരുന്ന യുക്രൈനാണ് കളിയിൽ കൂടുതൽ അവസരങ്ങൾ സൃഷ്ടിച്ചത്. പ്രീക്വാർട്ടറിൽ ഫ്രാൻസുമായാണ് ബെൽജിയം ഏറ്റുമുട്ടുക.
