വൈപ്പിൻ: ചക്കയോളം വലുപ്പമുള്ള കപ്പയാണ് താരം. എടവനക്കാട് പഞ്ചായത്തിലെ തൊഴിലുറപ്പുകാർ കാടുമുടിക്കിടന്ന പറമ്പ് വൃത്തിയാക്കവെയാണ് വമ്പൻ വലുപ്പമുള്ള കപ്പക്കിഴങ്ങുകൾ കണ്ടെത്തിയത്. വിളവെടുക്കാതെ കിടന്ന കപ്പക്കിഴങ്ങ് സാധാരണയിലും കവിഞ്ഞ് വളരുകയായിരുന്നു.

ഏറെനാളായി ഉയരത്തിൽ കാടുവളർന്നു നിന്നിരുന്ന ഒരു പുരയിടം വെട്ടിത്തെളിക്കുന്നതിനിടെയാണ് എടവനക്കാട് പഞ്ചായത്തിലെ തൊഴിലുറപ്പ് തൊഴിലാളികൾ കപ്പ കണ്ടെത്തിയത്. പണ്ടെങ്ങോ നട്ട ചില കപ്പക്കമ്പുകൾ ഇവരുടെ ശ്രദ്ധയിൽപ്പെടുകയായിരുന്നു.

പാടുപെട്ട് വലിച്ച് പുറത്തിട്ടപ്പോൾ എല്ലാം മൂട്ടിലും ഞെട്ടിക്കുന്ന വലുപ്പത്തിൽ ഭീമൻ കപ്പകൾ. 5 കിലോഗ്രാം വരെ ഭാരമുള്ളവ. തീരദേശത്ത് കപ്പ ഇത്തരത്തിൽ വിളയുന്നത് അപൂർവം ആണ്. അതിനാൽ കാഴ്ചക്കാർക്ക് കുറവുണ്ടായില്ല. ഒരുപാട് മൂത്ത് പോയിട്ടും രുചിയിലും മുന്നിലെന്ന് കഴിച്ചവർ സാക്ഷ്യപ്പെടുത്തുകയും ചെയ്യുന്നു