കൊച്ചി: സിനിമാ പ്രോമോഷന് താരങ്ങള്‍ സഹകരിച്ചില്ലെന്ന് നിര്‍മ്മാതാവ്. മിസ്റ്റര്‍ ആന്‍ഡ് മിസിസ് ബാച്ചിലര്‍ എന്ന സിനിമയുടെ നിര്‍മാതാവ് പ്രകാശ് ഗോപാലാണ് ആരോപണവുമായി രംഗത്തെത്തിയത്.
ഇന്ദ്രജിത് സുകുമാരന്‍, അനശ്വര രാജന്‍ എന്നിവര്‍ പ്രധാന കഥാപാത്രങ്ങളായെത്തിയ സിനിമയാണ് മിസ്റ്റര്‍ ആന്‍ഡ് മിസിസ് ബാച്ചിലര്‍. ചിത്രം വെള്ളിയാഴ്ച തിയേറ്ററുകളിലെത്തി.
സിനിമ റിലീസ് തീയ്യതി പല തവണ മാറ്റുകയും, റിലീസ് തീയ്യതി പ്രഖ്യാപിച്ചതിന് പിന്നാലെ താരങ്ങള്‍ സിനിമയുമായി സഹകരിച്ചില്ലെന്നാണ് നിര്‍മാതാവിന്റെ ആരോപണം.
താരങ്ങള്‍ വിട്ടു നില്‍ക്കുന്നത് സംബന്ധിച്ച് പ്രൊഡ്യൂസര്‍ അസോസിയേഷനില്‍ പരാതിപ്പെട്ടിരുന്നെന്നും, അസോസിയേഷന്‍ അറിയിച്ചത് പ്രകാരം താരങ്ങള്‍ സഹകരിക്കുമെന്നായിരുന്നുവെന്നും പ്രകാശ് പറയുന്നു.
എന്നാല്‍ സിനിമ തിയേറ്ററിലെത്തിയിട്ടും സോഷ്യല്‍ മീഡിയ പോസ്റ്റുകളല്ലാതെ മറ്റൊരു പ്രൊമോഷന്‍ പരിപാടിക്കും താരങ്ങള്‍ പങ്കെടുത്തിട്ടില്ലെന്നും അദ്ദേഹം പറയുന്നു.
ദീപു കരുണാകരനാണ് ചിത്രത്തിന്റെ സംവിധായകന്‍. പ്രധാന താരങ്ങള്‍ ഉള്‍പ്പെടെയുള്ളവര്‍ പ്രൊമോഷനുമായി സഹകരിക്കാത്തതിനാല്‍ സംവിധായകനും, നിര്‍മ്മാതാവും ചില ഓണ്‍ലൈന്‍ മാധ്യമങ്ങള്‍ക്ക് ഇന്റര്‍വ്യു നല്‍കിയിരുന്നു.
ഇതിന് പിന്നാലെ സംവിധായകന്‍ സിനിമയെക്കുറിച്ച് സംസാരിക്കാതെ താരങ്ങള്‍ക്കെതിരെ ആരോപണം ഉന്നയിച്ചുവെന്നും, സിനിമയെ തകര്‍ക്കാന്‍ ചില ആളുകള്‍ ബോധപൂര്‍വ്വം ശ്രമിക്കുന്നതായും അദ്ദേഹം ആരോപിച്ചു.
.
