ഭാര്യക്ക് ആത്മഹത്യ ചെയ്യാനായി കയർ കുരുക്കി കൊടുത്ത ശേഷം മുങ്ങിയ ഭർത്താവ് അറസ്റ്റിൽ. ഭർത്താവ് സുനിലാണ് അറസ്റ്റിലായത്. ആത്മഹത്യ ചെയ്യാൻ പ്രേരിപ്പിച്ചു എന്നാണ് പോലീസിന്റെ കണ്ടെത്തൽ. പത്തനംതിട്ട റാന്നി വെച്ചൂച്ചിറയിലാണ് സംഭവം. സുനിലിന്റെ ഭാര്യ സൗമ്യ തൂങ്ങിമരിച്ച കേസിലാണ് ഇയാൾ അറസ്റ്റിലായത്. സൗമ്യക്ക് ഒരു മകനും ഉണ്ട്.
സംഭവം ഇങ്ങനെ:
സുനിലിന്റെ ഒരു സുഹൃത്തുമായി സൗമ്യ അടുപ്പത്തിലായിരുന്നു. ഇതിന് സുനിലിന്റെ മൗനസമ്മതവും ഉണ്ടായിരുന്നു. ഇതിനു പകരമായി സുഹൃത്തിന്റെ ഭാര്യയുടെ ആഭരണങ്ങളും കിടപ്പറ ദൃശ്യങ്ങളും സുഹൃത്ത് സുനിലിന് നൽകിയിരുന്നു. ഇതുവച്ച് സുഹൃത്തിന്റെ ഭാര്യയെ സുനിൽ ഭീഷണിപ്പെടുത്താൻ ആരംഭിച്ചു. ഈ യുവതി പോലീസിൽ പരാതി നൽകിയതോടെ നാണക്കേട് ഒഴിവാക്കാൻ എന്ന വ്യാജേനയാണ് ഒരുമിച്ച് മരിക്കാം എന്ന് സുനിൽ ഭാര്യയെ പ്രേരിപ്പിച്ചത്. എന്നാൽ ഭാര്യ കയറിൽ തൂങ്ങിയതോടെ ഇയാൾ മുങ്ങുകയായിരുന്നു. സൗമ്യ ഉയരത്തിലുള്ള മേൽക്കൂരയിൽ തൂങ്ങിയതിൽ പോലീസിന് സംശയം തോന്നിയതാണ് കേസ് തെളിയാൻ ഇടയാക്കിയത്. തുടർന്നുള്ള ചോദ്യം ചെയ്യലിൽ സുനിൽ കുറ്റം സമ്മതിച്ചു. ഒരുമിച്ച് മരിക്കാം എന്ന് സമ്മതിപ്പിച്ചശേഷം സുനിൽ സൗമ്യക്ക് കുരുക്കിട്ട് കൊടുക്കുകയായിരുന്നു. ഇതിനായി കട്ടിൽ ചെരിച്ചിട്ട് കയറിനിൽക്കാൻ സൗകര്യം ഒരുക്കുകയും ചെയ്തു. സൗമ്യ മരിച്ച ശേഷം താനും മരിക്കും എന്നാണ് സുനിൽ ഉറപ്പു നൽകിയിരുന്നത്.
