തൊടുപുഴ: ഇടുക്കി ജില്ലയുടെ ഹൈറേഞ്ച് മേഖല കടുത്ത വന്യജീവി ആക്രമണ ഭീതിയിലായിട്ട് നാളേറെയായി. ഇപ്പോഴിതാ ലോറേഞ്ചായ തൊടുപുഴയിലും പുള്ളിപ്പുലിയുടെ സാന്നിധ്യം സ്ഥിരീകരിച്ചു. രണ്ടാഴ്ചയിലേറെ ആയി വളർത്തുമൃഗങ്ങൾ കൊല്ലപ്പെടുന്നത് പതിവായതോടെ കരിങ്കുന്നം നിവാസികൾ ഭീതിയിലായിരുന്നു. വനംവകുപ്പ് സ്ഥാപിച്ച നാല് ക്യാമറകളില്‍ രണ്ടെണ്ണത്തിൽ കഴിഞ്ഞ ദിവസം പുള്ളിപ്പുലി പെട്ടതോടെയാണ് സ്ഥിരീകരിക്കാനായതെന്ന് തൊടുപുഴ റേഞ്ച് ഓഫീസര്‍ സിജോ സാമുവല്‍ പറഞ്ഞു. ഇതാദ്യമായാണ് ഈ മേഖലയില്‍ പുലിയിറങ്ങുന്നത്.
പുലിയാണെന്ന് തിരിച്ചറിഞ്ഞതോടെ കൂടുവച്ച് പിടിക്കാനുള്ള ശ്രമങ്ങൾ തുടങ്ങിയിട്ടുണ്ട്. ഇതിനുള്ള അനുമതി ലഭിച്ചതോടെ കൂടു വെക്കൽ വേഗത്തിലാക്കാനാണ് തീരുമാനം. പുലിയുടെ ലൊക്കേഷന്‍ തിരിച്ചറിഞ്ഞിട്ടുണ്ട്. 15 ഹെക്ടർ വരുന്ന ഇല്ലിചാരി റിസര്‍വ് ഫോറസ്റ്റ് കരിങ്കുന്നത്തിന് സമീപത്തുണ്ട്. പാറക്കൂട്ടം നിറഞ്ഞ ഈ പ്രദേശത്ത് പകൽ തങ്ങിയ ശേഷം രാത്രി പുറത്തിറങ്ങുകയാണ് പതിവ് .ഈ പ്രദേശത്തിനും ചുറ്റും ജനവാസമേഖലയാണ്. എന്നാൽ ഇവിടെയാരും ഇതുവരെ പുലിയെ കണ്ടിട്ടില്ല. അതുകൊണ്ട് തന്നെ ഇടുക്കി വനമേഖലയിൽ നിന്നെത്തിയതാണ് എന്നാണ് അനുമാനം. പുത്തന്‍പ്ലാവിലും കരിങ്കുന്നം ഇല്ലിചാരിയിലും വച്ച ക്യാമറകളിലാണ് പുലിയുടെ ദൃശ്യങ്ങള്‍ പതിഞ്ഞത്.
രണ്ട് ആടുകള്‍, കോഴികള്‍, നായകള്‍ തുടങ്ങി പലതും അടുത്തിടെ കൊല്ലപ്പെട്ടു. രാത്രി പുറത്തിറങ്ങാന്‍ പോലും ആളുകള്‍ പേടിച്ചിരിക്കെയാണ് അജ്ഞാതജീവി പുള്ളിപ്പുലിയാണെന്ന് തിരിച്ചറിയുന്നത്. പുലിയാണെന്ന് സംശയം ഉണ്ടായെങ്കിലും ഈ പ്രദേശത്ത് മുൻപ് വന്യജീവി ശല്യമൊന്നും ഉണ്ടായിട്ടില്ല എന്ന ആശ്വാസത്തിലായിരുന്നു നാട്ടുകാർ പലരും. വന്യജീവി സാന്നിധ്യമുള്ള വനമൊന്നും അടുത്തെങ്ങുമില്ല. തൊടുപുഴ ടൗണിനോട് ചേർന്ന പ്രദേശമാണ് ഇതെല്ലാം. ഒരുഭാഗത്ത് തൊടുപുഴ-പാലാ റോഡും മറുവശത്ത് തൊടുപുഴ-മൂലമറ്റം റോഡും, ഇതിനിടയിൽ വരുന്ന ഏതാനും കിലോമീറ്റർ പ്രദേശത്താണ് ഇപ്പോൾ പുലിയുള്ളത്.
