ഓടുന്ന ട്രെയിനിൽ നിന്ന് ഫോൺ തട്ടിയെടുത്ത ശേഷം യുവാവിനെ താഴേക്ക് തള്ളിയിട്ടു; വീഴ്ചയിൽ ഇടതുകാൽ അറ്റുപോയി
മുംബൈ: മഹാരാഷ്ട്രയിലെ താനെയിൽ ഓടിക്കൊണ്ടിരുന്ന ട്രെയിനിൽ നിന്ന് മൊബൈൽ ഫോൺ തട്ടിപ്പറിക്കുന്നതിനിടെ യുവാവിനെ പാളത്തിലേക്ക് തള്ളിയിട്ടു.
ഗുരുതരമായി പരിക്കേറ്റ 30 വയസ്സുകാരന് ഒരു കാൽ നഷ്ടപ്പെട്ടു. ജനുവരി 18നാണ് സംഭവം നടന്നത്.
ബദ്ലാപൂരിൽ താമസിക്കുന്ന റിതേഷ് രാകേഷ് യെരുങ്കർ രാത്രി വീട്ടിലേക്ക് മടങ്ങുന്നതിനിടെയാണ് ആക്രമണത്തിനിരയായത്. രാത്രി 11.05ഓടെ താനെയിൽ നിന്ന് ബദ്ലാപൂരിലേക്കുള്ള ഫാസ്റ്റ് ലോക്കൽ ട്രെയിനിന്റെ ലഗേജ് കമ്പാർട്ടുമെന്റിലാണ് റിതേഷ് യാത്ര ചെയ്തിരുന്നത്.
ട്രെയിൻ അംബർനാഥിലെത്തുന്നതിന് തൊട്ടുമുൻപ്, സമീപത്ത് നിന്നിരുന്ന ഒരാൾ റിതേഷിന്റെ ഫോൺ തട്ടിപ്പറിച്ച് പുറത്തേക്ക് ചാടാൻ ശ്രമിച്ചു.
ഇത് തടയാൻ റിതേഷ് ശ്രമിച്ചതോടെ പ്രതി അദ്ദേഹത്തെ ട്രെയിനിൽ നിന്ന് പാളത്തിലേക്ക് തള്ളിയിടുകയായിരുന്നു. ട്രെയിനിനടിയിലേക്ക് വീണ റിതേഷിന്റെ ഇടത് കാൽക്കൂടിലൂടെ ട്രെയിൻ കയറിയിറങ്ങി.
ഉടൻ ആശുപത്രിയിൽ എത്തിച്ചെങ്കിലും ഗുരുതരമായി പരിക്കേറ്റ ഇടത് കാൽ മുട്ടിന് താഴെ മുറിച്ചുമാറ്റേണ്ടിവന്നു. തല, ഇടത് കവിൾ, ഇടത് കണ്ണ് എന്നിവിടങ്ങളിലും റിതേഷിന് പരിക്കേറ്റിട്ടുണ്ട്.
സംഭവവുമായി ബന്ധപ്പെട്ട് കൈലാഷ് ബാലകൃഷ്ണ ജാദവ് എന്നയാളെ പൊലീസ് അറസ്റ്റ് ചെയ്തു. റെയിൽവെ പൊലീസാണ് റിതേഷിനെ ആശുപത്രിയിലെത്തിച്ചത്.
നിലവിൽ കെഇഎം ആശുപത്രിയിൽ ചികിത്സയിൽ തുടരുന്ന റിതേഷ്, താനെയിലെ ഒരു സ്വകാര്യ മാളിലെ വസ്ത്രശാലയിൽ ജോലി ചെയ്യുന്ന ജീവനക്കാരനാണ്. പ്രതിക്കെതിരെ കേസ് രജിസ്റ്റർ ചെയ്ത് അന്വേഷണം ആരംഭിച്ചതായി ഉദ്യോഗസ്ഥർ അറിയിച്ചു.
English Summary
A 30-year-old man lost his leg after being pushed off a moving train during a mobile phone snatching incident in Thane, Maharashtra. The incident occurred on January 18 when Ritesh Rakesh Yerungkar was traveling in the luggage compartment of a fast local train from Thane to Badlapur. When he tried to stop the accused from escaping after snatching his phone, the man pushed him onto the tracks. His left leg was crushed under the train and later amputated below the knee. Police arrested the accused, Kailash Balakrishna Jadhav, and further investigation is underway.
thane-train-phone-snatching-man-loses-leg
Thane, Mumbai local train, phone snatching, train crime, Ritesh Yerungkar, railway police, Maharashtra news, Badlapur
