തമിഴ്നാട് സംസ്ഥാന ചലച്ചിത്ര പുരസ്കാരം: തിളങ്ങി മലയാളി താരങ്ങൾ
ചെന്നൈ: തമിഴ്നാട് സർക്കാരിന്റെ സംസ്ഥാന ചലച്ചിത്ര പുരസ്കാരങ്ങൾ പ്രഖ്യാപിച്ചപ്പോൾ മലയാളി താരങ്ങൾ ശ്രദ്ധേയമായ നേട്ടവുമായി മുന്നിലെത്തി.
2016 മുതൽ 2022 വരെ ഏഴ് വർഷത്തെ അവാർഡുകളാണ് ഇപ്പോൾ തമിഴ്നാട് സർക്കാർ പ്രഖ്യാപിച്ചിരിക്കുന്നത്. ഇതിൽ മികച്ച നടി വിഭാഗത്തിൽ അഞ്ചു വർഷവും മലയാളി നടിമാർ പുരസ്കാരം സ്വന്തമാക്കിയതാണ് പ്രധാന ശ്രദ്ധാകേന്ദ്രം.
2016-ൽ ‘പാമ്പു സട്ടൈ’യിലെ അഭിനയത്തിലൂടെ കീർത്തി സുരേഷ് മികച്ച നടിയായി തിരഞ്ഞെടുക്കപ്പെട്ടു. 2017-ൽ ‘അരം’ എന്ന ചിത്രത്തിലെ ശക്തമായ പ്രകടനത്തിന് നയൻതാര മികച്ച നടി പുരസ്കാരം നേടി.
2018-ൽ ‘ചെക്ക ചിവന്ത വാനം’ സിനിമയിലൂടെ ജ്യോതികയും പുരസ്കാരം കരസ്ഥമാക്കി.
2019-ൽ വെട്രിമാരൻ സംവിധാനം ചെയ്ത ‘അസുരൻ’ എന്ന ചിത്രത്തിലൂടെ മഞ്ജു വാരിയർ മികച്ച നടിയായി. ഇത് മഞ്ജുവിന്റെ ആദ്യ തമിഴ് ചിത്രമായിരുന്നു എന്നതും ശ്രദ്ധേയമാണ്.
2020-ൽ ‘സൂരറൈ പോട്ര്’ സിനിമയിലെ അഭിനയത്തിന് അപർണ ബാലമുരളിയും മികച്ച നടി പുരസ്കാരം നേടി.
2021-ൽ ‘ജയ് ഭീം’ ചിത്രത്തിലെ സെങ്കിണി എന്ന കഥാപാത്രത്തിലൂടെ ലിജോ മോൾ ഈ നേട്ടത്തിലേക്ക് എത്തി. 2022-ൽ ‘ഗാർഗി’യിലെ പ്രകടനമാണ് സായ് പല്ലവിക്ക് മികച്ച നടി പുരസ്കാരം നേടിക്കൊടുത്തത്.
മികച്ച നടൻ പുരസ്കാരം
മികച്ച നടൻ വിഭാഗത്തിലും പ്രമുഖ താരങ്ങൾ പുരസ്കാരം നേടി. 2016-ൽ ‘പുരിയാത്ത പുതിർ’ എന്ന ചിത്രത്തിലൂടെ വിജയ് സേതുപതി മികച്ച നടനായി.
2017-ൽ ‘തീരൻ അധികാരം ഒൺട്ര്’ എന്ന ചിത്രത്തിലെ അഭിനയത്തിന് കാർത്തി പുരസ്കാരം നേടി. 2018-ൽ ‘വട ചെന്നൈ’യിലൂടെ ധനുഷും, 2019-ൽ ‘ഒത്ത സെരുപ്പ് സൈസ്-7’ എന്ന ചിത്രത്തിലൂടെ ആർ. പാർഥിപനും മികച്ച നടനായി.
2020-ൽ ‘സൂരറൈ പോട്ര്’ സിനിമയിലെ പ്രകടനത്തിന് സൂര്യയും, 2021-ൽ ‘സർപാട്ട പരമ്പരൈ’ എന്ന ചിത്രത്തിലൂടെ ആര്യയും, 2022-ൽ ‘താണാക്കാരൻ’ എന്ന ചിത്രത്തിലെ അഭിനയത്തിന് വിക്രം പ്രഭുവും പുരസ്കാരം നേടി.
മറ്റ് വിഭാഗങ്ങളിലും മലയാളി സാന്നിധ്യം
മറ്റ് പ്രധാന വിഭാഗങ്ങളിലും മലയാളികളുടെ നേട്ടം ശ്രദ്ധേയമായി. 2016-ൽ ‘വേലൈനു വന്തിട്ടു വെള്ളക്കാരൻ’ എന്ന ചിത്രത്തിലൂടെ വൈക്കം വിജയലക്ഷ്മി മികച്ച പിന്നണി ഗായികയായി തിരഞ്ഞെടുക്കപ്പെട്ടു.
‘ഒരു മുഗത്തിറൈ’ എന്ന സിനിമയിലെ അഭിനയത്തിന് റഹ്മാൻ മികച്ച പ്രതിനായകനായി.
2017-ൽ ‘മകളിർ മട്ടും’ എന്ന ചിത്രത്തിലൂടെ ഉർവശി മികച്ച ഹാസ്യനടിക്കുള്ള പുരസ്കാരം നേടി. 2020-ൽ ‘തായ് നിലം’ സിനിമയിലെ ‘ആഗായം മേലെ’ ഗാനത്തിലൂടെ വർഷാ രഞ്ജിത്ത് മികച്ച ഗായികയായി.
മികച്ച സിനിമകൾ
മികച്ച സിനിമകളായി
2016: ‘മാനഗരം’
2017: ‘അരം’
2018: ‘പരിയേറും പെരുമാൾ’
2019: ‘അസുരൻ’
2020: ‘കൂഴാങ്കൾ’
2021: ‘ജയ് ഭീം’
2022: ‘ഗാർഗി’
എന്നിവ തിരഞ്ഞെടുക്കപ്പെട്ടു.
മികച്ച സംവിധായകർ
മികച്ച സംവിധായകർക്കുള്ള പുരസ്കാരം ലഭിച്ചത്:
ലോകേഷ് കനകരാജ് (മാനഗരം)
പുഷ്കർ–ഗായത്രി (വിക്രം വേധ)
മാരി സെൽവരാജ് (പരിയേറും പെരുമാൾ)
ആർ. പാർഥിപൻ (ഒത്ത സെരുപ്പ് സൈസ്-7)
സുധ കൊങ്കര (സൂരറൈ പോട്ര്)
ടി.ജെ. ജ്ഞാനവേൽ (ജയ് ഭീം)
ഗൗതം രാമചന്ദ്രൻ (ഗാർഗി)
പുരസ്കാര വിതരണം ഫെബ്രുവരി 13-ന്
ഫെബ്രുവരി 13-ന് ചെന്നൈയിലെ കലൈവാനർ അരങ്ങിൽ നടക്കുന്ന ചടങ്ങിൽ ഉപമുഖ്യമന്ത്രി ഉദയനിധി സ്റ്റാലിൻ പുരസ്കാരങ്ങൾ വിതരണം ചെയ്യും.
മികച്ച നടനും നടിക്കും ഒരു പവൻ സ്വർണ മെഡലും മെമന്റോയും സർട്ടിഫിക്കറ്റും നൽകും. മികച്ച സിനിമകൾക്ക് രണ്ട് ലക്ഷം രൂപയാണ് സമ്മാനത്തുക.
ENGLISH SUMMARY
Tamil Nadu government announced State Film Awards for 2016–2022, with Malayali artistes dominating major categories. Five out of seven Best Actress awards went to Malayali actresses including Keerthy Suresh, Nayanthara, Jyothika, Manju Warrier, Aparna Balamurali, Lijomol Jose and Sai Pallavi. Awards will be presented on February 13 in Chennai.
tamil-nadu-state-film-awards-2016-2022-malayali-stars-best-actress
Tamil Nadu, State Film Awards, Malayalam actors, Keerthy Suresh, Nayanthara, Jyothika, Manju Warrier, Aparna Balamurali, Lijomol Jose, Sai Pallavi, Tamil cinema, Chennai
