ഏറ്റവും ജനകീയമായ കാർ ഫീച്ചർ ഏതെന്നു മലയാളിയോട് ചോദിച്ചാൽ ഒരുപക്ഷേ സൺറൂഫ് എന്നായിരിക്കും ഉത്തരം. അത്രയേറെ ജനപ്രീതിയുണ്ട് സൺറൂഫ് എന്ന ഫാൻസി ഫീച്ചറുള്ള കാർ മോഡലുകൾക്ക്. അധിക വിൽപനക്കുള്ള എളുപ്പവഴിയായി കാർനിർമാണ കമ്പനികളും തിരിച്ചറിഞ്ഞതോടെ സൺറൂഫ് ജനകീയ മോഡലുകളുടേയും അവിഭാജ്യ ഘടകമായി. അപ്പോഴും നമ്മുടെ സാഹചര്യങ്ങളിൽ സൺറൂഫിന് എത്രത്തോളം പ്രായോഗിക ഉപയോഗമുണ്ടെന്നത് ചോദ്യമായി അവശേഷിക്കുന്നുണ്ട്.
ഒറ്റ നോട്ടത്തിൽ തന്നെ ആഡംബരം അനുഭവിപ്പിക്കുമെന്നതാണ് സൺറൂഫുകളേയും പ്രത്യേകിച്ച് പനോരമിക് സൺറൂഫുകളേയും വലിയ തോതിൽ ജനകീയമാക്കിയത്. പിൻ സീറ്റുകളിലെ യാത്രകളിൽ കൂടുതൽ വിശാലമായ കാഴ്ച്ചകൾകൊണ്ട് നിറക്കാൻ പനോരമിക് സൺറൂഫുകൾക്ക് സാധിക്കുമെന്നതാണ് ഈ ഫീച്ചർ ജനപ്രിയമാകാനുള്ള മറ്റൊരു കാരണം. സ്റ്റാൻഡേഡ് ഇലക്ട്രിക് സൺറൂഫുകളേക്കാൾ സ്വാഭാവികമായും പനോരമിക് സൺറൂഫിന് ആരാധക പിന്തുണയും ഏറെയാണ്.
നീലാകാശവും മരങ്ങളും കണ്ടുകൊണ്ടുള്ള യാത്രകളും സൺറൂഫ് തുറന്നു വച്ചുകൊണ്ട് കാറിനകത്തേക്ക് ശുദ്ധവായുവിനെ കയറ്റിക്കൊണ്ടുള്ള യാത്രകളും വേറിട്ട അനുഭവമാണ് സമ്മാനിക്കുന്നത്. ഇതെല്ലാം പനോരമിക് സൺറൂഫുള്ള കാറുകൾക്ക് വലിയ ജനപ്രീതി സമ്മാനിച്ചു. അപ്പോഴും കാറിന്റെ പ്രധാന ഭാഗമായ മുകൾഭാഗത്തിന്റെ കരുത്ത് പനോരമിക് സൺറൂഫുകൾ കുറക്കുമെന്ന ആശങ്കയും സജീവമാണ്.
കേരളം പോലുള്ള ചൂടും പൊടിയും കൂടുതലുള്ള രാജ്യങ്ങളിൽ സൺറൂഫുകൾ തുറന്നിട്ട് യാത്ര ചെയ്യുന്നത് അത്ര പ്രായോഗികമല്ലെന്നതാണ് മറ്റൊരു കാര്യം. മാത്രമല്ല നഗരങ്ങളിൽ മലിനീകരണങ്ങൾക്കിടയിൽ സൺറൂഫ് തുറക്കാൻ അധികമാരും താൽപര്യപ്പെട്ടെന്നു വരില്ല. യാത്രകൾക്കിടെ കുട്ടികളും മറ്റും സൺറൂഫിലൂടെ തല പുറത്തേക്കിട്ട് യാത്ര ചെയ്യുന്നതും വലിയ അപകടങ്ങൾ ക്ഷണിച്ചു വരുത്തും. അതുമാത്രമല്ല ഇത്തരം യാത്രകൾക്ക് നിയമപരമായും അനുമതിയില്ല.
പുതുതലമുറ വാഹനങ്ങളിലെ സൺറൂഫ് സൗകര്യം ഉപയോഗിക്കുന്നതിൽ ശ്രദ്ധ വേണമെന്ന വീഡിയോ സന്ദേശവുമായി മോട്ടോർ വാഹന വകുപ്പ് രംഗത്തെത്തിയിട്ടുണ്ട്. സാമൂഹിക മാധ്യമങ്ങളിലൂടെയാണു എംവിഡി സുരക്ഷാ നിർദേശം നൽകിയിരിക്കുന്നത്. സൺറൂഫുള്ള വാഹനങ്ങളിൽ പുറംകാഴ്ച കാണുന്നതിനായി കുട്ടികളെ കയറ്റി വാഹനമോടിച്ചു പോകുന്നവരുണ്ട്. ഇതപകടകരമാണെന്ന് അധികൃതർ മുന്നറിയിപ്പു നൽകുന്നു. പെട്ടെന്നു ബ്രേക്ക് ചെയ്യേണ്ടി വന്നാൽ കുട്ടികൾ തെറിച്ചുപോകാൻ സാധ്യതയുണ്ട്. കഴുത്തോ നെഞ്ചോ അതിശക്തിയായി റൂഫിന്റെ വശത്തിടിച്ചു ഗുരുതരമായ പരിക്കേൽക്കാമെന്നും വീഡിയോയിൽ പറയുന്നു.
https://www.facebook.com/share/r/1685zA1yTp
മുതിർന്നവരാണെങ്കിൽ വയറിനാകും ക്ഷതമേൽക്കുക. ഇത് ആന്തരിക അവയവങ്ങളെ തകർക്കും. അതുകൊണ്ടു തന്നെ ഇത്തരത്തിൽ യാത്ര ചെയ്യരുതെന്നാണ് എംവിഡി നൽകുന്ന സന്ദേശം. ഈ വീഡിയോ ഇപ്പോൾ സോഷ്യൽ മീഡിയയിൽ വൈറലാണ്. കുറഞ്ഞ വേഗത്തിൽ പോകുമ്പോൾ കാറിൽ ശുദ്ധവായു കയറുന്നതിനും മഞ്ഞുള്ളപ്പോൾ കാഴ്ചഭംഗിക്കും സൺറൂഫ് സഹായകരമാണെങ്കിലും വേഗം കൂടിയ യാത്രകളിൽ വാഹനത്തിന്റെ എയ്റോ ഡൈനാമിക്സിൽ മാറ്റമുണ്ടാകുന്നതു മൂലം ഇന്ധനക്ഷമത കുറയും.
