കാസർകോട്: ആത്മഹത്യാ ശ്രമത്തെ തുടർന്ന് ചികിത്സയിലായിരുന്ന മൂന്നാം വർഷ നഴ്സിംഗ് വിദ്യാർഥിനി മരിച്ചു. മൻസൂർ നഴ്സിങ് കോളജിലെ മൂന്നാം വർഷ നഴ്സിംഗ് വിദ്യാർഥിനിയായിരുന്നു ചൈതന്യ കുമാരിയാണ് (21) മരിച്ചത്. ഡിസംബറിൽ ആത്മഹത്യയ്ക്ക് ശ്രമിച്ചതിനെത്തുടർന്ന് ചികിത്സയിലായിരുന്നു.
ഡിസംബർ 7ന് ആയിരുന്നു സംഭവം. ഹോസ്റ്റൽ മുറിയിൽ വെച്ചാണ് ചൈതന്യ ആത്മഹത്യക്ക് ശ്രമിച്ചത്. തുടർന്ന് ഏതാനും മാസങ്ങളായി വെന്റിലേറ്ററിലായിരുന്നു. ആദ്യം കോളജിനോട് ചേർന്നുള്ള ആശുപത്രിയിലും പിന്നീട് മംഗളൂരുവിലെ സ്വകാര്യ ആശുപത്രികളിലും ആണ് ചികിത്സയിൽ കഴിഞ്ഞിരുന്നത്.
പിന്നീട് ഈ വർഷം ആദ്യം കണ്ണൂരിലെ സ്വകാര്യ ആശുപത്രിയിലേക്കും അവിടെനിന്ന് കോഴിക്കോട് മെഡിക്കൽ കോളജിലേക്കും മാറ്റിയിരുന്നു. ഹോസ്റ്റൽ വാർഡൻ രജനിയുടെ മാനസിക പീഡനം കാരണമാണ് ചൈതന്യ ആത്മഹത്യയ്ക്ക് ശ്രമിച്ചതെന്ന് ആരോപിച്ച് സഹപാഠികൾ പ്രതിഷേധം നടത്തിയിരുന്നു.
നിരവധി വിദ്യാർത്ഥി സംഘടനകൾ ഹോസ്റ്റലിലേക്ക് മാർച്ച് നടത്തുകയും ചെയ്തിരുന്നു.ദിവസങ്ങളോളം നീണ്ട സമരത്തിന് ഐക്യദാർഢ്യവുമായി ഭരണ – പ്രതിപക്ഷ യുവജന വിദ്യാർഥി സംഘടനകൾ നടത്തിയ സമരത്തെ പൊലീസ് നേരിട്ട രീതിക്കെതിരെയും വൻ പ്രതിഷേധം ആണ് ഉയർന്നിരുന്നത്.
