മധ്യവേനൽ അവധിക്കുശേഷം സംസ്ഥാനത്തെ സ്കൂളുകൾ ജൂൺ ഒന്നിന് തുറക്കും. ജൂൺ മൂന്നിലെ പ്രവേശനോത്സവത്തോടെ ഈ അധ്യായന വർഷത്തിന് തുടക്കമാകും. മുഖ്യമന്ത്രി വിളിച്ച ഉന്നത തല യോഗത്തിലാണ് തീരുമാനം. സ്കൂളുകൾ തുറക്കുന്നതിന് മുൻപേ സുരക്ഷ ഉറപ്പുവരുത്തണമെന്നും അറ്റകുറ്റി പണികൾ നടത്തണമെന്നും യോഗത്തിൽ നിർദ്ദേശിക്കുന്നു.
പ്രധാന നിർദ്ദേശങ്ങൾ ഇങ്ങനെ:
അധ്യയന വർഷം ആരംഭിക്കുന്നതിനു മുൻപ് എല്ലാ സ്കൂൾ കെട്ടിടങ്ങൾക്കും ഫിറ്റ്നസ് സർട്ടിഫിക്കറ്റ് ലഭ്യമാക്കണം
സ്കൂളും പരിസരവും വൃത്തിയാക്കുകയും ശുദ്ധജലം ഉറപ്പാക്കുകയും ചെയ്യണം.
സ്കൂളുകളിലെ ഉപയോഗശൂന്യമായ ഫർണിച്ചറുകൾ, ഉപകരണങ്ങൾ എന്നിവ നീക്കം ചെയ്യുകയോ പ്രത്യേകം മുറിയിൽ സൂക്ഷിക്കുകയോ ചെയ്യണം.
സ്കൂൾ പരിസരത്തെയും സ്കൂളിലേക്ക് വരുന്ന വഴിയിലുമുള്ള അപകടാവസ്ഥയിൽ നിൽക്കുന്ന വൈദ്യുത പോസ്റ്റുകൾ വൈദ്യുത കമ്പികൾ മറ്റ് ഉപകരണങ്ങൾ എന്നിവ ഒഴിവാക്കണം
സ്കൂൾ പരിസരത്ത് അപകടാവസ്ഥയിൽ നിൽക്കുന്ന മരങ്ങൾ ബോർഡുകൾ എന്നിവ ഒഴിവാക്കണം
ജില്ലാതല ജാഗ്രത സമിതി നിശ്ചയിച്ച ഇടവേളകളിൽ യോഗം ചേർന്ന് സ്കൂളുകളിലെ ലഹരിവിരുദ്ധ പ്രവർത്തനങ്ങൾ വിലയിരുത്തണം.
