ചെന്നൈ:ഇന്ഷുറന്സ് തുക കൈപ്പറ്റാനുള്ള അത്യന്തം ക്രൂരമായ പദ്ധതിയുടെ ഭാഗമായി സ്വന്തം പിതാവിനെ വിഷപ്പാമ്പിനെക്കൊണ്ട് കടിപ്പിച്ച് കൊലപ്പെടുത്തിയ കേസില് മക്കള് അറസ്റ്റില്.
തമിഴ്നാട്ടിലെ തിരുവള്ളൂര് ജില്ലയിലാണ് മനസ്സാക്ഷിയെ നടുക്കുന്ന സംഭവം പുറത്തുവന്നത്.
തിരുവള്ളൂര് പോത്താട്ടൂര്പേട്ടൈ സ്വദേശിയും സര്ക്കാര് സ്കൂളിലെ ലബോറട്ടറി അസിസ്റ്റന്റുമായ ഇ.പി. ഗണേശന് (56) ആണ് ഇര.
കഴിഞ്ഞ ഒക്ടോബറില് ഗണേശന് പാമ്പ് കടിയേറ്റ് വീട്ടില്വെച്ച് മരിച്ചെന്നായിരുന്നു ആദ്യം ബന്ധുക്കള് നല്കിയ മൊഴി.
കോടികളുടെ പോളിസികള് മരണത്തിന് മുന്പ്
ഇതിന്റെ അടിസ്ഥാനത്തില് പൊലീസ് അപകടമരണമെന്ന് കരുതി കേസെടുത്തു. എന്നാല് ഗണേശന്റെ മരണത്തിനു പിന്നാലെ ഉയര്ന്ന തുകയുടെ ഇന്ഷുറന്സ് പോളിസികളില് ക്ലെയിം നടപടികള് ആരംഭിച്ചതോടെയാണ് മരണത്തില് സംശയം ഉയര്ന്നത്.
ഗണേശന്റെ പേരില് വളരെ കുറച്ച് സമയത്തിനുള്ളില് കോടികള് മൂല്യമുള്ള നിരവധി ഇന്ഷുറന്സ് പോളിസികള് എടുത്തിരുന്നതും,
മരണത്തിനു ശേഷമുള്ള കുടുംബാംഗങ്ങളുടെ പെരുമാറ്റത്തിലെ അസ്വാഭാവികതയുമാണ് ഇന്ഷുറന്സ് കമ്പനിയെ സംശയത്തിലാക്കിയത്.
ഇന്ഷുറന്സ് കമ്പനി നല്കിയ പരാതിയാണ് വഴിത്തിരിവായത്
തുടര്ന്ന് തമിഴ്നാട് നോര്ത്ത് ഐജിക്ക് നല്കിയ പരാതിയുടെ അടിസ്ഥാനത്തില് പുനരന്വേഷണം ആരംഭിച്ചു.
വിശദമായ അന്വേഷണത്തില് ഗണേശന്റെ ആണ്മക്കളായ മോഹന്രാജ് (26), ഹരിഹരന് (27) എന്നിവരാണ് കൊലപാതകത്തിന് പിന്നിലെന്ന് വ്യക്തമായി.
കോഴിക്കോട് നാടിനെ നടുക്കിയ കൊലപാതകം: ആറു വയസ്സുള്ള മകനെ കഴുത്ത് ഞെരിച്ച് കൊലപ്പെടുത്തി അമ്മ
അച്ഛന്റെ പേരില് ഏകദേശം മൂന്ന് കോടിയോളം രൂപയുടെ ഇന്ഷുറന്സ് പോളിസികള് എടുത്ത ശേഷമാണ് പ്രതികള് കൊലപാതക പദ്ധതി ആസൂത്രണം ചെയ്തത്.
സംഭവം അപകടമരണമായി ചിത്രീകരിക്കാനായിരുന്നു ലക്ഷ്യം.ഇതിന് വേണ്ടി പ്രതികള് ചില സഹായികളുടെ സഹായത്തോടെ വിഷപ്പാമ്പുകളെ സംഘടിപ്പിച്ചു.
ആദ്യ കൊലശ്രമം പരാജയം; പിതാവ് രക്ഷപ്പെട്ടു
ഗണേശന് മരിക്കുന്നതിന് ഒരാഴ്ച മുന്പ് തന്നെ ആദ്യ കൊലപാതകശ്രമം നടന്നിരുന്നു. മൂര്ഖനെ ഉപയോഗിച്ച് പിതാവിന്റെ കാലില് കടിപ്പിച്ചെങ്കിലും വിഷം മാരകമായി ബാധിക്കാതിരുന്നതിനാല് ഗണേശന് രക്ഷപ്പെട്ടു.
അയല്ക്കാരും ബന്ധുക്കളും ചേര്ന്ന് അദ്ദേഹത്തെ ആശുപത്രിയില് എത്തിച്ച് ജീവന് രക്ഷിക്കുകയായിരുന്നു.
കൂടുതല് സഹായികള് ഉണ്ടോ? അന്വേഷണം തുടരുന്നു
എന്നാല് രണ്ടാം ശ്രമത്തില് പദ്ധതി വിജയിക്കുകയും ഗണേശന് മരണപ്പെടുകയും ചെയ്തു. തുടര്ന്ന് ഇന്ഷുറന്സ് തുക കൈപ്പറ്റാന് ശ്രമിക്കുന്നതിനിടെയാണ് പ്രതികള് കുടുങ്ങിയത്.
കേസില് കൂടുതല് പേരുടെ പങ്ക് അന്വേഷിച്ചുവരികയാണെന്ന് പൊലീസ് അറിയിച്ചു.
English Summary
In a shocking crime from Tamil Nadu’s Tiruvallur district, two sons were arrested for murdering their father by arranging a deadly snake bite to claim insurance money worth nearly ₹3 crore. The crime initially appeared as an accidental death but was exposed after an insurance company raised suspicion, leading to a detailed investigation by police.
