കൊച്ചി: യൂട്യൂബർ അശ്വന്ത് കോക്കിനെതിരെ സിനിമ റിവ്യു ബോംബിങ് പരാതിയുമായി നിർമ്മാതാവ് സിയാദ് കോക്കർ. ‘മാരിവില്ലിൻ ഗോപുരങ്ങൾ’ എന്ന സിനിമയുടെ റിവ്യുവിനെതിരെയാണ് പോലീസിൽ പരാതി നൽകിയിരിക്കുന്നത്. അതേസമയം പരാതിയിൽ പറയുന്ന സിനിമയുടെ റിവ്യു അശ്വന്ത് യൂട്യൂബിൽ നിന്ന് പിൻവലിച്ചു.
റിവ്യു ബോംബിങ്ങുമായി ബന്ധപ്പെട്ട് ഹൈക്കോടതിയിൽ പരാതി നിലനിൽക്കുന്നതിനിടെയാണ് നിർമ്മാതാവായ സിയാദ് കോക്കർ രംഗത്തെത്തിയത്. റിവ്യൂ ബോംബിങ് സിനിമകളെ തകർക്കുന്നുവെന്ന് ആരോപിച്ച് ‘ആരോമലിന്റെ ആദ്യത്തെ പ്രണയം’ സിനിമയുടെ സംവിധായകൻ മുബീൻ റഊഫ് ഹർജി സമർപ്പിച്ചിരുന്നു. ഈ ഹർജി കോടതിയുടെ പരിഗണനയിലാണ്. സിനിമ റിലീസ് ചെയ്തശേഷം രണ്ട് ദിവസത്തേക്ക് റിവ്യൂ നൽകരുത് തുടങ്ങിയ നിർദേശങ്ങൾ അമിക്കസ് ക്യൂറി റിപ്പോർട്ടിലുണ്ട്.
അരുൺ ബോസ് സംവിധാനം ചെയ്ത് ഇന്ദ്രജിത്ത്, വിൻസി അലോഷ്യസ്, സർജാനോ ഖാലിദ്, ശ്രുതി രാമചന്ദ്രന് തുടങ്ങിയവർ കേന്ദ്ര കഥാപാത്രങ്ങളായ ചിത്രമാണ് മാരിവില്ലിൻ ഗോപുരങ്ങൾ. മെയ് 10ന് ആണ് ചിത്രം റിലീസ് ചെയ്തത്.
