അന്താരാഷ്ട്ര ബഹിരാകാശ നിലയത്തിലേക്കുള്ള ഇന്ത്യക്കാരനായ ശുഭാംശു ശുക്ലയുടെ ബഹിരാകാശയാത്ര വീണ്ടും മാറ്റിവെച്ചു. ജൂൺ 11-ലേക്ക് ആണ് മാറ്റിയത്.
ഇന്ത്യൻ സമയം വൈകിട്ട് 5.52-നാണ് ആക്സിയം ഫോർ ദൗത്യത്തിന്റെ ഭാഗമായി ശുഭാംശു ശുക്ലയുടെ ബഹിരാകാശ യാത്ര ആരംഭിക്കുക. നേരത്തെ ജൂൺ എട്ടിനായിരുന്നു ദൗത്യം തീരുമാനിച്ചിരുന്നത്. ഇത് മൂന്നാം തവണയാണ് ദൗത്യം മാറ്റിവയ്ക്കുന്നത്.
ദൗത്യത്തോടെ അന്താരാഷ്ട്ര ബഹിരാകാശ നിലയത്തിലെത്തുന്ന ആദ്യത്തെ ഇന്ത്യൻ പൗരനെന്ന നേട്ടം ശുഭാംശു ശുക്ല സ്വന്തമാക്കും. ആക്സിയം സ്പേസിന്റെയും നാസയുടെയും ഐ എസ് ആർ ഒ യുടെയും സംയുക്ത ദൗത്യമാണിത്.
14 ദിവസം ശുഭാംശു ശുക്ല ബഹിരാകാശ നിലയത്തിൽ ചിലവഴിക്കും. അതേസമയം ബഹിരാകാശയാത്രയില് ഇന്ത്യയില്നിന്നുള്ള ചില ഭക്ഷണങ്ങള് അദ്ദേഹം കൊണ്ടുപോകുമെന്നാണ് ഐഎസ്ആര്ഒ പുറത്തുവിട്ട വിവരം.
മാങ്ങകൊണ്ടുള്ള മധുരമുള്ള ഒരു പാനീയം, അരി, മൂങ് ദാല് ഹല്വ എന്നിവയാണ് ഇതിനായി തിരഞ്ഞെടുത്തിരിക്കുന്നത്.
ഇന്ത്യയുടെ സാംസ്കാരിക സ്വത്വത്തേയും പാചകപൈതൃകത്തേയും പ്രതിനിധാനം ചെയ്യുന്നതിന് വേണ്ടിയാണു രാജ്യത്തു നിന്ന് ഭക്ഷണം കൊണ്ടുപോകുന്നത്.
