കൊച്ചി: എൻറോൾമെന്റ് ദിവസം ഹൈക്കോടതി ജഡ്ജിയുടെ ഔദ്യോഗിക വാഹനത്തിന്റെ ദൃശ്യങ്ങള് ദുരുപയോഗം ചെയ്ത യുവ അഭിഭാഷകനെതിരെ നടപടി. ചാവക്കാട് സ്വദേശി മുഹമ്മദ് ഫായിസിനെതിരെയാണ് ബാര് കൗണ്സിലിന്റെ നടപടി.
സ്വമേധയാ എടുത്ത നടപടിയില് അഭിഭാഷകന് കേരള ബാര് കൗണ്സില് കാരണം കാണിക്കല് നോട്ടീസ് നല്കിയിട്ടുണ്ട്. ഔദ്യോഗിക വാഹനത്തിന്റെ ദൃശ്യങ്ങള് സാമൂഹിക മാധ്യമങ്ങള് വഴി റീല് ആയി പ്രചരിപ്പിച്ചതിനാണ് നടപടി.
ജഡ്ജിയുടെ കാറിന്റെ ദൃശ്യങ്ങള് റീല്സില് ഉപയോഗിച്ചത് വഴി നീതിന്യായ വ്യവസ്ഥയുടെ അന്തസ് ഇടിച്ചുതാഴ്ത്താനാണ് ശ്രമിച്ചതെന്നാണ് കേരള ബാര് കൗണ്സിലിന്റെ വിലയിരുത്തല്. ഇത് പ്രഥമദൃഷ്ട്യാ അച്ചടക്ക നടപടിക്ക് മതിയായ കാരണമാണെന്നും ബാര് കൗണ്സില് നല്കിയ നോട്ടീസിൽ പറയുന്നു.
ഷഹബാസ് വധക്കേസ്; പ്രതികള്ക്ക് തുടര് പഠനത്തിന് ഹൈക്കോടതിയുടെ അനുമതി
കൊച്ചി: താമരശ്ശേരി ഷഹബാസ് വധക്കേസില് കുറ്റാരോപിതരായ വിദ്യാര്ഥികള്ക്ക് തുടര്പഠനത്തിന് അനുമതി നൽകി ഹൈക്കോടതി. ഇതിനു ആവശ്യമായ സൗകര്യം ഒരുക്കണമെന്നാണ് കോടതിയുടെ ഉത്തരവ്.
കോഴിക്കോട് ഒബ്സര്വേഷന് ഹോമിലാണ് വിദ്യാര്ഥികള് കഴിയുന്നത്. ഇവര്ക്ക് പ്ലസ് വണ്ണിലേയ്ക്ക് പ്രവേശനത്തിനുള്ള അവസാന തിയതി നാളെയാണ്. ഇതിന് അവസരം ഒരുക്കണം എന്നാവശ്യപ്പെട്ട് പ്രതികള് കോടതിയെ സമീപിക്കുകയായിരുന്നു.
പ്രവേശനം തടയരുതെന്നും ആവശ്യമായ സൗകര്യങ്ങള് ഒരുക്കണമെന്നുമാണ് കോഴിക്കോട് ഒബ്സര്വേഷന് ഹോം സൂപ്രണ്ടിന് കേരള ഹൈക്കോടതി നൽകിയ നിർദേശം. പ്രതികള്ക്ക് സംരക്ഷണം ഉറപ്പാക്കാന് താമരശ്ശേരി പൊലീസിനോടും കോടതി ആവശ്യപ്പെട്ടു.
താമരശ്ശേരിയില് പത്താം ക്ലാസ് വിദ്യാര്ഥിയായിരുന്ന ഷഹബാസിനെ മര്ദിച്ചു കൊലപ്പെടുത്തിയതിനാണ് ആറ് സഹ വിദ്യാര്ഥികളെ അറസ്റ്റ് ചെയ്തത്. പ്രായപൂര്ത്തിയാകാത്തതിനാല് ഒബ്സര്വേഷന് ഹോമിലാണ് ഇവരെ പാര്പ്പിച്ചിരിക്കുന്നത്.
അതേസമയം കേസിൽ ആറു പേരെ പ്രതി ചേർത്തുള്ള കുറ്റപത്രം സമർപ്പിച്ചിരുന്നു. ജുവൈനൽ ജസ്റ്റിസ് ബോർഡ് മുമ്പാകെയാണ് കുറ്റപത്രം സമർപ്പിച്ചത്.
107 സാക്ഷികളെ ഉൾപ്പെടുത്തിയുള്ള കുറ്റപത്രത്തിൽ, ഇൻസ്റ്റഗ്രാം ഗ്രൂപ്പിലെ ചാറ്റ് ഉൾപ്പെടെയുള്ള ഡിജിറ്റൽ തെളിവുകളും ഹാജരാക്കിയിട്ടുണ്ട്. ഗൂഢാലോചനയെ കുറിച്ച് തുടർ അന്വേഷണം നടത്തുമെന്നും കുറ്റപത്രത്തിലുണ്ട്.
