ഇന്ത്യൻ റെയിൽവേയുടെ അത്യാധുനിക വന്ദേ ഭാരത് സ്ലീപ്പർ ട്രെയിനുകൾ ഉടൻ ട്രാക്കിൽ ഇറങ്ങും. സെക്കന്തരാബാദ് – പൂനെ റൂട്ടിലായിരിക്കും ഇന്ത്യയിലെ ആദ്യത്തെ വന്ദേ ഭാരത് സ്ലീപ്പർ ട്രെയിൻ യാത്ര നടത്തുക. ഈ വർഷാവസാനം തന്നെ വന്ദേ ഭാരത് സ്ലീപ്പർ ട്രെയിനുകൾ ട്രാക്കിൽ എത്തുമെന്നാണ് റിപ്പോർട്ട്.
വന്ദേഭാരതിന്റെ സ്ലീപ്പർ കോച്ചുകൾ രാജധാനി എക്സ്പ്രസുകൾക്ക് ബദലായി ഓടുമെന്നാണ് മുൻപ് പുറത്തുവന്ന റിപ്പോർട്ട്. എന്നാൽ സെക്കന്തരാബാദ് – പൂനെ റൂട്ടിലെ മുൻപ് ഓടിക്കൊണ്ടിരുന്ന ശതാബ്ദി എക്‌സ്‌പ്രസിന് പകരമായി വന്ദേ ഭാരത് സ്ലീപ്പർ ട്രെയിൻ വരുമെന്നാണ് പുതിയ വിവരം.
നിലവിൽ ശതാബ്ദി എക്സ്പ്രസ് ഏകദേശം എട്ട് മണിക്കൂറും 30 മിനിറ്റും എടുത്താണ് സെക്കന്തരാബാദ് – പൂനെ റൂട്ടിൽ ഓടുന്നത്. വന്ദേ ഭാരത് സ്ലീപ്പർ ട്രെയിൻ ഈ റൂട്ടിൽ വന്നാൽ യാത്ര സമയം രണ്ട് മണിക്കൂറെങ്കിലും കുറയും. കൂടാതെ യാത്രക്കാർക്ക് കൂടുതൽ സൗകര്യങ്ങളോടെ യാത്ര ചെയ്യാനും കഴിയും. എന്നാൽ വന്ദേ ഭാരത് സ്ലീപ്പർ ട്രെയിനിന്റെ സമയവും സ്റ്റോപ്പുകളും തീരുമാനിച്ചിട്ടില്ല. സർവീസ് ആരംഭിക്കുന്ന മുറയ്ക്ക് അവ വെളിപ്പെടുത്തുമെന്നാണ് അധികൃതർ അറിയിച്ചത്.
അതേസമയം കേരളത്തിനായുള്ള മൂന്നാം വന്ദേ ഭാരത് ട്രെയിൻ ഉടൻ എത്തുമെന്ന് നേരത്തെ റിപ്പോർട്ടുകൾ പുറത്തുവന്നിരുന്നു. തിരുവനന്തപുരം – കോയമ്പത്തൂർ, കൊച്ചി – ബംഗളൂരു റൂട്ടുകളായിരിക്കുമെന്നാണ് വിവരം. നിലവിൽ സംസ്ഥാനത്ത് ഓടുന്ന വന്ദേഭാരത് എക്സ്പ്രസുകൾ സൂപ്പർ ഹിറ്റാണ്. മികച്ച വരുമാനമാണ് രണ്ട് ട്രെയിനുകളും റെയിൽവെയ്ക്ക് നൽകുന്നത്.
Read More: ഒടുവിൽ ഭാഗ്യശാലിയെ കണ്ടെത്തി; വിഷു ബമ്പർ 12 കോടി ആലപ്പുഴ പഴവീട് സ്വദേശി വിശ്വംഭരൻ
