തൃശ്ശൂര്: പോലീസ് അക്കാദമിയിൽ വനിതാ ഉദ്യോഗസ്ഥയോട് ലൈംഗികാതിക്രമം കാട്ടിയെന്ന പരാതിയിൽ വിവാദ ഉദ്യോഗസ്ഥനെതിരെ നടപടി. രാമപുരം കേരള പോലീസ് അക്കാദമിയിലെ ഓഫീസർ കമാൻഡന്റ് പ്രേമനെയാണ് അക്കാദമി ഡയറക്ടർ എഡിജിപി പി വിജയൻ സസ്പെൻഡ് ചെയ്തത്. വനിതാ ഉദ്യോഗസ്ഥ നൽകിയ പരാതിയില് ആഭ്യന്തര അന്വേഷണ സമിതി നടത്തിയ അന്വേഷണ റിപ്പോര്ട്ടിന്റെ അടിസ്ഥാനത്തിലാണ് നടപടി.
ഉദ്യോഗസ്ഥയുടെ പരാതിയുടെ അടിസ്ഥാനത്തില് വിയ്യൂര് പോലീസ് കമാന്ഡന്റിനെതിരെ കേസെടുത്തിട്ടുണ്ട്. പരാതി ലഭിച്ചയുടന് പ്രാഥമികാന്വേഷണം തുടങ്ങി അതിവേഗത്തിലാണ് നടപടികളിലേക്ക് കടന്നത്. ഈ മാസം 18നും 22നുമാണ് ഉദ്യോഗസ്ഥനില് നിന്നും അതിക്രമം നേരിട്ടതെന്നാണ് യുവതിയുടെ പരാതിയില് പറയുന്നത്. ഉദ്യോഗസ്ഥനെതിരെ കടുത്ത നടപടി വേണമെന്നും അക്കാദമിയില് തുടരാനാകില്ലെന്നും മാനസികമായും പീഡിപ്പിക്കുന്നുവെന്നും ഇവര് നല്കിയ പരാതിയില് പറഞ്ഞു. ഇതേ തുടര്ന്നാണ് പരാതിയില് എഡിജിപി അടിയന്തര നടപടി സ്വീകരിച്ചത്.
