ന്യൂഡൽഹി: സിംഗപ്പൂരിലെ സ്കൂളിൽ തീപിടുത്തം. ആന്ധ്രാപ്രദേശ് ഉപമുഖ്യമന്ത്രി പവൻ കല്യാണിന്റെ മകൻ മാർക് ശങ്കറിന് പൊള്ളലേറ്റു. കുട്ടിയുടെ കൈയ്‌ക്കും കാലിനും പൊള്ളലേറ്റതായാണ് വിവരം.
തീപിടിത്തത്തെ തുടർന്നുണ്ടായ പുക അമിതമായി ശ്വസിച്ചതിനെ തുടർന്ന് ശ്വാസകോശ സംബന്ധമായ പ്രശ്നങ്ങളും കുട്ടിയ്ക്ക് സംഭവിച്ചിട്ടുണ്ട്. സിംഗപ്പൂരിലെ ആശുപത്രിയിൽ കഴിയുന്ന കുട്ടിയുടെ ആരോഗ്യനില തൃപ്തികരമാണെന്ന് അധികൃതർ വ്യക്തമാക്കി. അതേസമയം തീപിടിത്തമുണ്ടാകാനുള്ള കാരണം വ്യക്തമല്ല.
സംഭവസമയത്ത് പവൻ കല്യാൺ അല്ലൂരി സീതാരാമരാജു ജില്ലയിൽ സന്ദർശനത്തിലായിരുന്നു. ഇന്ന് ഉച്ചയ്‌ക്ക് ശേഷം അദ്ദേഹം വിശാഖപട്ടണത്ത് നിന്നും സിംഗപ്പൂരിലേക്ക് യാത്രതിരിക്കും.
നാളെ വിശാഖപട്ടണം സ്റ്റീൽ പ്ലാന്റ് സന്ദർശിക്കാനിരിക്കെയാണ് അപ്രതീക്ഷിത അപകടം നടന്നത്. പവൻ കല്യാണിന്റെ സന്ദർശനത്തോടനുബന്ധിച്ച് വിശാഖ് നഗരത്തിൽ സംഘടിപ്പിച്ചിരുന്ന എല്ലാ പരിപാടികളും റദ്ദാക്കി.
